இன்று திருநெல்வேலி எழுச்சி நாள்.

                     

    இந்திய சுதந்திர போராட்ட வரலாற்றில் (அப்போதைய ஒருங்கிணைந்த)நெல்லை மாவட்டத்திற்கு என்று தனியிடமே உண்டு. வ.உ.சி., வீரபாண்டிய கட்டபொம்மன்,பூலித்தேவர்,  சுந்தரலிங்கம், பாரதியார், வீரவாஞ்சிநாதன் போன்ற பல தியாக சீலர்கள் விடுதலை போராட்ட வரலாற்றில் போற்றப்படுபவர்கள். 

           இவர்கள் மூட்டிய விடுதலை வேட்கையெனும் தீ, நெல்லைப்பகுதியில், கொழுந்து விட்டு எரிந்தது. அதன் எதிரொலியாய், சுதேசி இயக்க உணர்வு சுறுசுறுவென்று பரவியது. இந்த நேரத்தில்தான், வ.உ.சி., தூத்துக்குடி-கொழும்பு துறைமுகங்களுக்கிடையே சுதேசி கப்பல் கம்பெனியைத் துவக்கி, வாடகைக்கப்பல்களை இயக்கினார். கம்பெனியை நடத்த, தமிழகம் முழுவதும் வ.உ.சி. உள்ளிட்ட தலைவர்கள் சுற்றுப்பயணம் மேற்கொண்டு நிதி திரட்டினர்.

                         ஒருங்கிணைந்த திருநெல்வேலி மாவட்டத்தில், திருநெல்வேலி மற்றும் தூத்துக்குடி பகுதிகளில் வ.உ.சி., சுப்பிரமணிய சிவா, பத்மநாப அய்யங்கார்  ஆகியோர் சுதேசி இயக்க பிரசராக்கூட்டங்கள் நடத்தினர். அன்னிய பொருட்களைப் பகிஷ்கரிக்க மக்கள் மத்தியில் வேண்டினர். சுதேசி உணர்வு மிகுந்த குதிரை வண்டி,சலவை மற்றும் சவரத் தொழிலாளிகள் ஆங்கிலேயர்களுக்குப் பணிபுரிய மறுத்தனர். சுதேசியத்திற்கு எதிராய் பேசிய வக்கீல் ஒருவருக்கு பாதி சவரம் பண்ணிய நிலையில் சிகையலங்கார கலைஞர் விட்டுச்சென்ற பரபரப்பு சம்பவங்களெல்லாம் நடந்தேறியது. இதன் விளைவாக, நெல்லை மக்கள் மீது ஆங்கிலேய ஆட்சியாளர்களுக்கு விரோத மனப்பாண்மை தலை தூக்கியது. 

                                 விடுதலைப்போராட்ட வீரர் விபின் சந்திரபால் 08.03.1908ல் விடுதலையானர். அதனை நெல்லை மாவட்டத்தினார்.தாமிரபரணி நதிக்கரையில் கூட்டம் நடத்தி சுயராஜ்ய நாளாக கொண்டாடினர்.துhத்துக்குடியில் நடைபெற்ற கூட்டத்தில் கலந்து கொண்டு நெல்லை கூட்டத்திற்கு வந்த வ.உ.சி., சுப்பிரமணிய சிவா, பத்மநாப அய்யங்கார்ஆகியோர், 12.03.1908ல் கைது செய்யப்பட்டனர். அதன் எதிரொலியாய், நெல்லையில் பெரும் கலவரம் மூண்டது. நெல்லை ரயில் நிலையப் பகுதியில் கடைகள் அடைக்கப்பட்டன. போக்குவரத்து பாதிக்கப்பட்டது. ஆயிரக்கணக்கானோர்  திரண்டு, அருகிலிருந்த இந்து கல்லூரிக்குள் நுழைந்து மாணவர்களை அழைத்து போராட்டத்தில் ஈடுபட்டனர். சி.எம்.எஸ். கல்லுரிக்குள் நுழைந்த போராட்டக்குழுவினர் உதவிப்பேராசிரியார் ஒருவரை அடித்து உதைத்தனர். நெல்லை நகராட்சி அலுவலகக் கட்டிட சுவர்இடிக்கப்பட்டது. ஆவணங்கள் தீ வைத்து கொளுத்தப்பட்டது. அத்துடன் அருகிலிருந்த போஸ்ட் ஆபிஸ்,மற்றும்  மண்ணெண்ணெய் கிடங்கு, காவல் நிலையம், நீதி மன்ற கட்டடிடம் சேதப்படுத்தப்பட்டது. 

   

                        கலவரத்தைக்கட்டுப்படுத்த காவல் துறையினர், துப்பாக்கி சூடு நடத்தினர். கோவில் பூசாரி, முஸ்லீம் இளைஞர்  உட்பட நான்கு பேர் துப்பாக்கி சூட்டில் பலியாயினர். அடக்குமுறையை ஏவியே, ஆங்கிலேயே ஆட்சியாளார்கள், கலவரத்தைக் கட்டுக்குள் கொண்டுவந்தனர். ‘திருநெல்வேலி எழுச்சி’ பிரிட்டன் பார்லிமெண்டிலும் எதிரொலித்தது. விரிவான விவாதம் நடத்தினர். சென்னை, சட்டசபையில் கேள்வி எழுப்பப்பட்டது. அப்போதைய நெல்லை நகர்மன்றத்தில், அலுவலகக்கட்டிடம் சேதப்படுத்தியதைக் குறிப்பிட்டு, ‘திருநெல்வேலி எழுச்சி’யைக் கண்டித்து தீர்மானம் நிறைவேற்றப்பட்டது. அனைத்து தரப்பு மக்களும் பங்கேற்ற ‘திருநெல்வேலி எழுச்சி’, வரலாற்றில் இடம் பெற்ற, பொன்னெழுத்துக்களால் பொறிக்கப்பட்ட நாள். இதுவே, பிற்காலத்தில் பல போராட்டங்களுக்கும் உந்து சக்தியாய் இருந்ததென்பது பல சரித்திர பேராசிரியர்களின் கூற்றாகும். 

                         இத்தனை சிறப்பு வாய்ந்த ‘திருநெல்வேலி எழுச்சி’ நாள் இன்று. வருடங்கள் 103 ஆகிவிட்டாலும் வரலாற்று சிறப்பு மிக்க நாள் இன்று. வாருங்கள், நம் குழந்தைகளுக்கும் தேசபக்தியூட்ட எடுத்துச்சொல்லலாம்.

            குறிப்பு: அப்போதைய நெல்லை நகர்மன்றத்தில், ‘திருநெல்வேலி எழுச்சி’யைக் கண்டித்து நிறைவேற்றப்பட்ட தீர்மானம் சமீபத்திய நெல்லை மாநகராட்சிக்கூட்டத்தில் ரத்து செய்யப்பட்டு, ‘திருநெல்வேலிஎழுச்சி’யை  பாராட்டித் தீர்மானம் நிறைவேற்றப் பட்டது.

                நன்றி: என்னை எழுத வைத்த 'தினமலர்' செய்திக்கு.