கண்ணீருடன் தண்ணீரைத்தேடி!

         தண்ணீர்  எப்போ வரும்? தாகம் எப்போ தீரும்?        

                      இன்று உலக தண்ணீர் தினம். வற்றாத ஜீவ நதிகளெல்லாம் வற்றும்வரை தண்ணீர் திருட்டு. வாழ வீடு கட்ட, வளம் கொழிக்கும் மணல் திருட்டு. வீட்டிலுள்ளோர், வெளியில் சென்று வந்தாலும், விருந்தினர் வந்து சேர்ந்தாலும் வந்தோரை வரவேற்று முதலில் உபசரிப்பது ஒரு குவளை தண்ணீரும், ஒரு துண்டு அச்சு வெல்லமும் கொடுத்துத்தான்.

இன்று, ஒரு  குடம் தண்ணீரை ஒன்பது மைல் நடந்துதான் கொண்டு வரவேண்டுமென்ற நிலையில், வந்தோர்  தாகம் தணிக்க தண்ணீரும் இல்லை, சோகம் உரைக்க சொற்களும் இல்லை.
                                    இன்றைய தலைமுறை வற்றிய வாய்க்காலையும், ஆறையும், வானம் பார்த்த பூமியையும் வரலாற்றுச் சின்னங்களாய் பார்த்து வாய் பிளந்து நிற்கின்றனர். நாளைய தலைமுறைக்கு நாம் இவற்றையெல்லாம், நல்ல பல கதைகளாய், கவிதைகளாய், புவியியல் பாடத்தில் புள்ளிகளாய், கோடுகளாய் மட்டுமே சொல்ல இயலுமென்பதே இன்றைய நிலை.
                              ஆற்றிலே குளித்து, அதன் கரையில் உள்ள மணலில் குதித்தோடி விளையாடி, மகிழ்ந்திருந்த காலம் மலையேறிப் போய்விட்டது. வற்றாத ஜீவ நதிகளிலெல்லாம், வசதி படைத்தோர், மணலை வாரிச்சுருட்டியப பின் விட்டுச் சென்ற பள்ளங்கள் மட்டுமே, மனிதனின் உயிரைக்குடிக்க வாய் பிளந்து நிற்கின்றன.
                                  வளம் கொடுக்கும் வற்றாத நதிகளெல்லாம், வரன் கொடுத்த சிவன் தலையில் கை வைத்த கதைபோல், ஆலைக்கழிவுகளாலும்., சாலையோர சங்கடங்கள் கலப்பாலும் சாபம் பெற்று, கழிவு நீர்க்கால்வாய்களாய் சடுதியில் சுருங்கிவிட்டன.
                             

                                  ஆற்றுநீர் ஓடி, அளப்பரிய வளம் பெற்ற நாட்டினிலே, பாட்டில் நீரை வாங்கி பருக வேண்டிய கட்டாயம். நாம் பணத்தைக் கொடுத்து வாங்குவது, பாட்டில் நீரை  மட்டுமல்ல, புதைக்கப்பட்ட மனிதங்களின் மனசாட்சியையும்தான். 

                                           என்ன செய்யலாம்? 

                                         வீட்டில் வீணாகும் தண்ணீர் குழாய்களை உடனே சரி செய்யலாம்.(ஒரு நாளில், ஒரு குழாயில்,  ஒரு நொடிக்கு ஒரு சொட்டு தண்ணீர் வீணானால், ஓராண்டில் ஏழாயிரம் லிட்டர் தண்ணீர் வீணாகுதாம்)

                              இயற்கை வளங்களை சீர் கெடுப்போரை சிந்திக்கவும் வைக்கலாம்,  சொல்லியும் கேட்காவிட்டால் . . . . . . . . . . . . . . . . . . (உங்கள் சிந்தனைக்கே விடுகிறேன்)