நாலு இன்ஜினியரிங் மாணவர்களின் நச்சென்ற ஒரு கண்டுபிடிப்பு.

           காருன்னா பெட்ரோல்ல ஓடும் டீசல்ல ஓடும். காற்றுல ஓடும்னு கேள்விப்பட்டிருக்கேளோ! கலி முத்திடுத்து! - இன்று காலை நான் கேட்ட ஒரு வசனம்.

          ஆம், நிஜமாகவே காற்றில் ஓடும் காரை கண்டுபிடித்துள்ளனர் கல்லூரி மாணவர்கள். கோவையிலுள்ள தமிழ்நாடு பொறியியல் கல்லூரியில், இயந்திரவியல் துறை மாணவர்கள் நான்கு பேர் சேர்ந்து, காற்றில் ஓடும் கார் ஒன்றைக் கண்டுபிடித்துள்ளனர். 

           மதன்குமார், பூர்ணசந்திரன், சுரேந்தர், ஆனந்தன் ஆகியோர் இணைந்து இம்முயற்சியைச் செய்துள்ளனர். சமுதாயத்திற்காக ஏதாவது செய்ய வேண்டுமென்ற அவர்களின் ஆர்வமும், உடனிருந்த பேராசிரியரின் தூண்டுதலும் அவர்களை வழிநடத்தியுள்ளன. மூன்று மாத இடைவிடாத முயற்சியில், ரூபாய் முப்பத்தைந்தாயிரம் முதலீட்டில் இதனை உருவாக்கியுள்ளனர்.

           ஒருவர் அமர்ந்து பயணம் செய்யும் விதத்தில் வடிவமைக்கப்பட்டுள்ள அந்தக் காரில், 300 பவுண்ட் கொள்ளளவு கொண்ட டேங்க் ஒன்றைப் பொருத்தியுள்ளனர். அந்த டேங்கிலிருந்து அழுத்தத்துடன் வெளியாகும் காற்று, அந்த காரில் பொருத்தப்பட்டுள்ள இன்ஜினை இயக்குகிறது. மற்ற கார்களைப் போன்றே, இந்த காரிலும், கிளட்ச், கியர், பிரேக், இத்யாதிகள் இருக்கும். 

            டேங்கிலுள்ள காற்று தீர்ந்துவிட்டால், வழியிலுள்ள கடைகளில் நிறுத்தி, கம்ப்ரசர் மூலம் காற்றை டேங்கினில் நிரப்பி நம் பயணம் தொடரலாம். புகையில்லையென்பதால், நம் சுற்றுச்சூழலிற்குப் பகையில்லை. விலையென்ன, வேகமென்ன இன்னும்  தெரியவில்லை.

டிஸ்கி: வரவிடுவார்களா பன்னாட்டு பண முதலைகள்.