கற்றல் இனிமை-கற்பித்தல் அதனினும் இனிமை!

கோவை SRKV கல்லூரியில் ஆசிரியர்களுக்கு பயிற்சி.

பள்ளி செல்லும்  பிள்ளைகளுக்கு பாடம் சொல்லி கொடுத்தா பவ்யமா உட்கார்ந்து கேட்பாங்க. நீதிமன்றங்களில் வாதாடும் வக்கீல்களுக்கும், பள்ளிகளில் பாடம் கற்பிக்கும் ஆசிரியர்களுக்கும் பாடம் நடத்திட அழைக்கப்பட்டேன்.எப்படி இருந்தது என் அனுபவங்கள்? பார்க்கலாம்.

நெல்லையில் வக்கீல்கள் சிலர் அரசு வக்கீலாக பணி புரிய, TNPSC தேர்வு எழுத பயிற்சி பெற்று வருவதாகவும், ஒரு நாள் உணவு கலப்படம் மற்றும் உணவு கலப்பட தடை சட்டம் சம்பந்தமாக விளக்க வரவேண்டுமென்று, நெல்லை அரசு உதவி வழக்கறிஞரின் அன்பு கட்டளை. நீதிமன்றங்களில், சாட்சி கூண்டில் நிறுத்தி வைத்து, கேள்வி கேட்டே பழக்கப்பட்டவர்கள் ஆச்சே, நாமும் சென்று சில கேள்விகள் கேட்கலாமே என்று அழைப்பை ஏற்றுகொண்டேன்.

நெல்லையில் வக்கீல்களுக்கு நடைபெற்ற பயிற்சி.

வழக்கில் வாதாடியே பழக்கப்பட்டவர்கள் அங்கும் நன்றாய் வாதாடினார்கள். உணவு கலப்பட தடை சட்டம்-கலப்படம் பற்றி என்ன சொல்கிறது, தண்டனைகள் என்ன, மிக சமீபத்தில் வந்துள்ள பல்வேறு நீதிமன்றங்களின் தீர்ப்புகள் என்ன சொல்கிறதென சென்றது அந்த வகுப்பு. கட்சிகாரர்களுக்கே வாதாடி, வழக்கை தம் பக்கம் வளைக்கும், வாதத்  திறமை படைத்தவர்கள், அரசு தரப்பில் அந்த வழக்குகளை தொடுத்திடவும், வாதங்களை எடுத்து வைத்திடவும், நாங்கள் படும் சிரமங்கள், நடை முறை சிக்கல்கள் பற்றி தெரிந்து கொண்டு வியந்தனர்.

                                            நெல்லையில் வக்கீல்களுக்கு நடைபெற்ற பயிற்சி.

அடுத்து,உணவு ஆய்வாளர் பயிற்சி பெற வந்திருந்த, துறை சார்ந்த சக நண்பர்களுக்கு, வகுப்பெடுப்பதற்கு வந்த வாய்ப்பு. அவர்களும் சளைத்தவர்கள் அல்ல.அடுக்கடுக்காய் கேள்விக் கணைகள் தொடுத்தனர்.  அதில் பல பேர், என்னிடம் களப்பயிற்சிக்கு வந்திருந்தவர்கள்தான். அங்கு, வகுப்பெடுத்ததை  விட, அனுபவப் பகிர்வுகள் மட்டுமே அதிகம் இருந்தது.அங்கிருந்த பகுப்பாய்வாளர் திரு.சந்திரசேகரன்  அவர்கள் நாங்கள் 1995 இல் பயிற்சி எடுத்தபோது, சொல்லிகொடுக்க கூட சீனியர்கள் இல்லாமல் இருந்ததை சுட்டிக்காட்டி, அப்போது பயிற்சி எடுத்த உணவு ஆய்வாளர்கள் தாமாகவே முயற்சி எடுத்து தம் திறன் வளர்த்தது குறித்து குறிப்பிட்டு சிலாகித்தார்.

பயிற்சி உணவு ஆய்வாளர்களுக்கு நடைபெற்ற வகுப்பு.

பயிற்சி உணவு ஆய்வாளர்களுக்கு நடைபெற்ற வகுப்பு. 

மூன்றாவதாய், கற்பிக்க சென்ற இடம், கோயம்புத்தூர், ஸ்ரீ ராமகிருஷ்ணா மிஷன் வித்யாலயா கல்லூரி. அங்கு வந்திருந்த மாணவர்கள் அனைவரும் கல்வி கூடங்களில் கற்பிக்கும் ஆசிரியர்கள். ஆம், அவர்கள் அனைவரும் B.Ed & M.Ed கற்கும் ஆசிரியர்கள். அக்கல்லூரியில் பணிபுரியும் முனைவர் திரு. சுப்பிரமணியன் அவர்களின் முயற்சியால், ஒவ்வொரு வருடமும், எனது 'கெஸ்ட் லெக்சர்' அங்கு உண்டு. அந்த கல்லூரி அமைந்துள்ள அமைதியான் சூழல் எனக்கு ரொம்ப பிடிக்கும். இப்படி ஒரு கல்லூரியில் படித்திட கொடுத்து வைக்க வில்லையே எனும் ஏக்கம்தான். (சிபி நோட் பண்ணிக்குங்க: அது இரு பாலர் பயிலும் கல்லூரியல்ல!)

கோவை SRKV கல்லூரியில் ஆசிரியர்களுக்கு பயிற்சி-அருகில் 
முனைவர் திரு.சுப்பிரமணியன் .

அடிப்படை சுகாதாரக்  கல்வி முதல், அன்றாட வாழ்க்கைக்கு  தேவைப்படும் கலப்படம் குறித்த அடிப்படை விழிப்புணர்வு கருத்துக்களை எடுத்துரைத்தேன். ஏனெனில்,ஒரு ஆசிரியருக்கு எடுத்துரைப்பது, ஓராயிரம் மாணவர் மனங்களை சென்றடையும். 
ஆஹா, என்ன ஒரு எழுச்சி, ஆசிரியர்கள் மத்தியில். வந்திருந்தோரில் ஒரு சகோதரி,சிறுமுகையிலுள்ள  தொழிற்சாலை கழிவு நீர், ஓடுகின்ற ஆற்று நீரில் கலந்து உருவாக்கும் சுற்றுச்சூழல் சீர்கேட்டினை, அவர் வாழும் குக்கிராமத்தில் எதிர்த்திடும் அமைப்பு ஒன்றை வழி நடத்துவதாக சொல்லி, அந்த தொழிற்சாலையிலிருந்து  வெளியேறும் கழிவு நீர் எப்படி, கோவை வரை குடி நீரை பாழாக்குகிறது என்று பரிதவிப்புடன் எடுத்துரைத்தார்.

கோவை SRKV கல்லூரியில் ஆசிரியர்களுக்கு பயிற்சி.

இன்னொரு ஆசிரியரோ, அளவுக்கு அதிகமாய் எடுத்துக்கொள்ளும் பாரசீட்டமால் மாத்திரைகளின் பின் விளைவாய் புற்று நோய் உருவாவது குறித்து கவலை கொண்டார். (அது பற்றி தனி ஒரு பதிவே இடலாம்).ஆஹா, அந்த சகோதரிக்கு 'உள்ள' உணர்வு, நம் ஒவ்வொருவரிடமும் இருந்து விட்டால், இந்தியா இந்நேரம் எங்கோ சென்றிருக்கும்!

கோவை SRKV கல்லூரியில் ஆசிரியர்களுக்கு பயிற்சி. 

டிஸ்கி-1: தவறுகள் கண்டுபிடிப்பதும், தண்டனைகள் பெற்று தருவதும்  மட்டுமல்ல,  அடிப்படை  நுணுக்கங்களை அனைவரும் அறிய செய்வதும் அத்யாவசியமானதுதான்.  

டிஸ்கி-2 : எனவே, 'ஆபிசர்' என்ற அடைமொழி நண்பர்கள் வட்டத்தில் தேவையில்லை என்றே எண்ணுகிறேன்.  அந்த அடைமொழி நீக்கி, என்னை உங்கள் அருகில் நிறுத்துங்கள். நன்றி.