விருது எனும் வினையூக்கி.

                             கடந்த ஒரு வாரமா கரண்ட் ஒரு பக்கம், பிராட்பேண்ட் ஒரு பக்கம்னு பாடாய்ப் படுத்துது. கரண்ட் இருக்கும்போது, நெட் வேலை செய்யாது, நெட் கனெக்சன் கிடைக்கும்போது, கரண்ட் போயிடும். கல்லைக் கண்டால், நாயைக்காணோம், நாயைக்கண்டால் கல்லைக்காணோம்(நாய்நக்ஸ்-மன்னிக்க) என்கிற கதையாக, இடைவெளி இல்லாத் தொடர்கதையாகிப்போச்சு!

                                       நண்பர்கள் பலரின் ப்ளாக் பக்கம் போகமுடியல. இது போதாதென்று, நெற்றிக்கண் திறப்பவரின் அன்புத்தொல்லை அழைப்புகள் அப்பப்ப வரும்! சரி பேசலாமென்று சென்றமர்ந்தால்,  வீடியோவில் அருவாளைத்தூக்கும் மனோ, வீட்டிலிருந்து கொண்டே வீடியோவில் வரமறுக்கும் விக்கி, வீடு சுரேஷ், செல்பேசியில் செல்லமாய்ப் பேசும் சிவா என்றொரு பட்டாளமே மொத்தமாய் வந்து கலக்குவர். அத்தனை பேரும் வரும்போது,  அறுந்து விழும் நெட் கனெக்சன்.

                              இத்தனை போராட்டங்கள் மிகுந்த வாரம், சென்னைப் பித்தன் அய்யா தந்த அவார்டால் களைகட்டியது.ஆம், விருது எனும் வினையூக்கி பதிவெழுத வித்திட்டது. அத்தோடு ஐந்து நண்பர்களுக்கு இந்த அவார்ட் செல்ல வேண்டுமென்ற அன்புக்கட்டளையும் வேறு. நன்றி.

                                      யாரைத் தேர்வு செய்வது, யாரை விடுவது?  சிக்கலில் நம்மை ஆழ்த்திவிட்டார் அய்யா.முதலில், எனக்குப் பிடித்த ஏழு விஷயங்களைப் பகிர்ந்து கொள்ள வேண்டும். 

   1.  அன்னையின் அன்பு.

   2.  கவிதை.

   3.  பதிவுலகம்.

   4.  நண்பர்கள் அறிமுகம் .

   5.  சாதனைகள்.

   6.  நெல்லை அல்வா.

   7.  வார இறுதி பயணங்கள்.

                  சரி, எனக்குத்தெரிந்த,நான் படிக்கும் வலைபூக்களிலிருந்து ஐந்து பூக்களைத்தேர்வு செய்துள்ளேன். ஒன்று மட்டும் உண்மை, இந்த விருதுகளை வழங்குவதால், பெருமை எனக்கே.

நாஞ்சில் மனோ : இவரது வலைப்பக்கத்தில், அரசியலிருக்கும், (அருவா) மொக்கையும் இருக்கும். கதை, கவிதை, வசனகவிதை என பல்சுவையும் பொதிந்திருக்கும்.பாசத்தில் உருகும் பன்முக குணம்.  பார்க்கத்தான் ஆளு பயங்கரமா இருப்பார் (அருவாளுடன்). ஆனா, பழக இனிமையானவர். 

கொஞ்சம் வெட்டிபேச்சு: சிரிக்கவும், சிந்திக்கவும் வைக்கத்தெரிந்தவர் இந்தத் தங்கை. இவரது வலைப்பூவில், ”உடம்பு இளைப்பது எப்படி?” என்று உடல் ஆரோக்கியம், தந்தை, பட்டிமன்ற பேச்சாளர் திரு.பொ.ம.ராசாமணியின் வழிகாட்டலில், மனம் லேசாவது எப்படி என்று மன ஆரோக்கியம் ம்ற்றும் அமெரிக்க அனுபவங்கள்,  தத்துவங்கள், தெய்வ நம்பிக்கை, இந்திய அரசியல் என பல்சுவையும் இருக்கும்.

விக்கிஉலகம்: ”அகட விகடம்” என்று பெயர் வைத்தாலும், சூடான அரசியல், சுவையான சுற்றுப்பயணங்கள், வீரதீர போர்முனை டைரி, வியக்கவைக்கும் கிச்சிளிக்காஸ், துள்ளி விளையாடிய பள்ளிநாள் நினைவுகள், உள்ளிருந்து வைக்கும் குத்து(!) என பல்சுவையும் நிறைந்திருக்கும். பதிவர்கள், அதிலும் அவரின் நண்பர்கள், தடம் புரளும்போது,  தன்னிலை உணரவைப்பதற்கு மட்டுமே எய்தப்படும் இந்த  அம்பு.

ஸ்டார்ட் மியூசிக்: நகைச்சுவை ததும்பும் இந்த நண்பரின் வலைப்பூவில், நக்கலும், நையாண்டியும், திரை விமர்சனமும், திகட்டாத பயடேட்டாவும் அனைவரையும் கவர்ந்திழுக்கும். அறிவியல் சார்ந்த கதை இவருக்கு அத்துப்படி.ஒரு நடிகரின்பால் கொண்ட ஈர்ப்பால், அவர் படமே இவருக்கு ப்ரோஃபைல் படம். இன்னும் இரு நடிகர்கள் இவரிடம் படும்பாடு அப்பாடக்கர்பா  சாரி அப்பப்பா . 

பசுமை விடியல்: சிரிக்கவும், சிந்திக்கவும் வைக்கும் வலைப்பூக்கள் மத்தியில், சுற்றுச்சூழல் விழிப்புணர்வில் சுறு சுறுப்பாய் இறங்கி விட்ட நால்வர் அணி. திருவாளர்கள்:ISR.செல்வகுமார்,பிரபுகிருஷ்ணா,சூர்ய பிரகாஷ் மற்றும் திருமதி.கௌசல்யா. குறைந்து வரும் இயற்கை வளங்கள் காப்பது, நிறைந்து வரும் சீமைக்கருவேல மரங்களை அழிப்பது, பிளாஸ்டிக் ஒழிப்பது என்று சமூக சிந்தனை சார்ந்த வலைத்தளம் இது.

                      இந்த ஐந்து தளங்களின் ஆக்கபூர்வ சிந்தனையாளர்களை, இந்த அன்பு விருதை ஏற்றுக்கொள்ள அழைப்பதுடன்,அவர்கள் மனம்கவர்ந்த ஐவருக்கு இந்தத் தொடர் விருதை வழங்கவும் கேட்டுக்கொள்கிறேன்.