சிங்காரச் சென்னையில் சிறு சந்திப்பு.

சிவகுமார், தஞ்சை குமணன், நான், ஆரூர் மூனா செந்தில்.
இயக்கம்:கே.ஆர்.பி.செந்தில்                                   

                       கடந்த ஒரு வாரமாய், சிங்காரச் சென்னையில் முகாம். குளிரின் கொடுமை குறைந்து, வெயிலின் தாக்கம் வெளிவந்து கொண்டிருக்கிறது. பயணங்கள் மட்டும் நம் உடலைப் பதம் பார்க்கிறது. 

                         முதல் மூன்று நாட்களும், கடைவீதி பக்கம் கண்ணும் கருத்துமாயிருந்தனர் என் குடும்பத்தினர். சனிக்கிழமை மாலை நண்பேண்டா சிவாவைத் தொடர்பு கொண்டேன். படம் பார்ப்பதில் பயங்கர பிஸி போல! பிறகென்ன, இருக்கவே இருக்கார், நம்ம நக்கீரர். என்னங்க சிவா ஃபோனை எடுக்கவே மாட்டேங்கறாருன்னு சொன்னதுதான் தாமதம்,மனுஷன் என்ன பண்ணினார்னு தெரியல! அடுத்த அஞ்சு நிமிஷத்தில் சிவா ஃபோனில் அலறிட்டார். சினிமா தியேட்டரில் இருந்தேன். ஃபோனை எடுக்கல, அதுக்காக இப்படியா நக்கீரர்கிட்ட மாட்டி விடுவீங்க. சரி, சரி, மனோ வாரார். அவர்கிட்ட நக்கீரரை மாட்டிவிட்ரலாம்னு சொன்ன பிறகுதான் சிவாவின் உதறல் நின்னுது! நாளை மாலை சந்திப்போம் சார் என்றார்.

                            ஞாயிறு மாலை 6 மணியளவில், தி.நகர், சரவணபவனில் கடைவீதிக்கு வந்திருந்த என் குடும்பத்தினருடன் காத்திருந்தேன். முதலில் திருவாளர்கள் சிவாவும், எங்கே செல்லும் இந்த பாதை கே.ஆர்.பி. செந்திலும் வந்தனர். பதிவுலகம், சென்னைப் பதிவர்கள் என்று கொஞ்ச நேரம் பேச்சு சென்று கொண்டிருந்தது. 

                                அடுத்த சில நிமிடங்களில், திரு.ஆரூர் மூனா செந்தில் வருவதாக சிவா சொன்னார். அவருடன்,புன்னகை மன்னன் தஞ்சைக் குமணனையும் அழைத்து வந்தார். பதிவுலகம் பற்றிய பேச்சுக்கள் தொடர்ந்தன.  சிவாவுடனாவது அடிக்கடி ஃபோனில் பேசியிருக்கிறேன். செந்தில் சாரைப்பற்றி மற்றவர்கள் சொல்லக் கேள்விப்பட்டுள்ளேன். ஆரூர் மூனா செந்தில் மற்றும் தஞ்சைக் குமணன் அன்றுதான் அறிமுகம். ஆனால் பல நாள் பழகிய நண்பரைப்போல, அவர்கள் அன்று சந்திக்க வந்ததும், பேசியதும், இன்னும் என்னை விட்டு விலகாத ஆச்சரியம்தான். 

                           

தஞ்சை குமணன், சிவகுமார்,    நான், ஆரூர் மூனா செந்தில்.
புகைப்படம்:கே.ஆர்.பி.செந்தில்

                      சிறிது நேரம் பேசிவிட்டு, என் மகளின் திருமண அழைப்பிதழை நண்பர்களுக்குக் கொடுத்து, திருமணத்திற்கு கட்டாயம் வரவேண்டுமென அழைத்தேன். அடுத்து புகைப்படம் எடுத்துக்கொண்டோம்.  மீண்டும், மார்ச் மாதம் நான் மட்டும் சென்னை வருவேன். அப்போது, மீதமுள்ள சென்னைப் பதிவர்களையும் சந்திக்கலாமென்று சிவா சொல்ல, சென்னை நண்பர்கள் அடுத்து வரும் நண்பர்களைச் சந்திக்கப் புறப்பட, நான் குடும்பத்துடன், கடைவீதிக்கு அடுத்த பயணம் புறப்பட்டேன்.