வகையாய் மாட்டிவிட்ட வள்ளி

                                    

                 கடந்த வருடம், மாதாந்திர ஆய்வின்போது,ஒரு  லாலாக்கடையில் விற்பனை செய்து கொண்டிருந்த சிப்ஸ் பாக்கட், பார்க்க கவர்ச்சியா இருந்தது.அதுல ஒரு சிப்ஸ் பாக்கட்டை உணவு மாதிரியாக எடுத்து அனுப்பினா, அந்த சிப்ஸ் அட்ராக்சனா இருக்க, அதில் செயற்கை வண்ணங்கள் சேர்த்திருக்கிறதும்,அந்த பாக்கட்டுகள் மீது, உணவு கலப்படத்தடைச்சட்டத்தின் கீழ் குறிப்பிட வேண்டிய தயாரிப்பு தேதி, பாட்ச் எண், சிப்ஸில் சேர்க்கப்பட்டுள்ள பொருட்களின் பட்டியல் இல்லையென்பதும் தெரிய வந்தது.

                                       

            அப்புறமென்ன, சிப்ஸை வித்தவரு, வித்த கடையோட ஓனரு, தயாரிச்சவர்னு மூணு பேர் மீதும், வழக்குத்தொடர, துறை இயக்குநருக்குப் பரிந்துரைக்கப்பட்டது. வழக்குத்தொடர அனுமதியும் வந்தது. தற்போது வழக்கு, நீதிமன்ற விசாரணையில்.சின்ன புள்ளைங்க சாப்பிடுறதுய்யா, அதுல, கண்ட கண்ட கலருல்லாம் சேர்க்கக்கூடாதுங்க.

                வள்ளி எப்படி வகையா மாட்டிவிட்டான்னு பார்க்கிறீங்களா? வள்ளின்னா அது வள்ளிக்கிழங்குங்க. பலவகை கிழங்குகளில் சிப்ஸ் தயாரித்து பஜாருக்கு வருவது வாடிக்கை. அதில் வள்ளிக்கிழங்கும் ஒரு வகை.

                         இது கடந்தவார பத்திரிக்கை செய்தி. நெய்யைத்தயாரிச்சமா, வீடு வீடாக் கொண்டுபோய் வித்தமான்னு காசு பார்த்தது அந்த காலம். இப்பல்லாம், பாட்டிலிலோ, பாக்கட்டிலோ அடைச்சு வித்தாத்தான், விலை போகுது.  நெய்யைப் பாட்டிலில் அடைச்சு விற்கணும்னா, அதுல தயாரிப்பு தேதி, பாட்ச் எண், எந்த தேதிவரை பயன்படுத்தலாம் என்ற விபரம், சைவ வகை உணவிற்கான குறியீடு, தயாரிப்பாளரின் முழுவிலாசம் அப்படின்னு பல விபரங்கள் தெரிவிக்கணும். இது பற்றி மேலும் அறிய :உணவு பொட்டலங்களில் என்ன பார்க்கவேண்டும்? இப்ப இதெல்லாம் போக, அந்த உணவுப்பொருளில் உள்ள சத்துக்கள் பட்டியலும் லேபிளில் இடம்பெறணும். 

                             இப்படில்லாம் சட்டம் சொன்னா, கேட்கணுமா? கேட்கலைன்னா, வழக்குத்தான்! வழக்குன்னா வக்கீல் இல்லாமலா? குறுக்கு விசாரணைன்னு பெட்டியில ஏத்திவிட்டு, கேட்கப்படும் கேள்விகள்-அப்பப்பா. இந்த வழக்கிலும், நீங்க கடைக்கே போகலை, உணவு மாதிரியே எடுக்கலைன்னு சொன்னாங்க. அப்புறமா, நீங்க உங்க வீட்டுக்கு நெய் ஃப்ரீயா கேட்டீங்க, கடைக்காரர் கொடுக்கலைன்னு அவர்மேல, மோட்டிவ்ல கேஸ் போட்டிருக்கீங்கன்னாங்க. கடைக்கே போகாம எப்படிங்க வீட்டுக்கு நெய் கேக்குறதுன்னு கடைசிவரை எனக்குப் புரியவே இல்லை. 

                                     கடந்த வாரம், தீர்ப்பும் வந்தது. உணவுக் கலப்படத்தடைச்சட்டத்திற்கு உட்பட்டு, நெய் பாட்டில்கள் தயாரிக்கப்படாததால், அதனைத் தயாரித்தவருக்கு, மூன்று மாதம் சிறைத்தண்டனையும், இரண்டாயிரம் ரூபாய் அபராதமும் விதிக்கப்பட்டது.