திருமலை-திருப்பதி-திருத்தணி திகட்டாத அனுபவங்கள்.

                                       

                         சென்ற வார இறுதி. சென்னை சென்று திருப்பதி செல்ல திட்டமிட்டோம். எங்களுடன், புது மணத்தம்பதியினரான என் மகளையும், மருமகனையும் அழைத்துச்செல்லத்தீர்மானித்தோம். விடுமுறை நாளென்றால், வசதியாயிருக்குமென்று, சனிக்கிழமை திருப்பதி சென்று தங்குவதென்றும், ஞாயிறு அதிகாலை திருமலைவாசனை தரிசிப்பதென்றும் முடிவெடுத்தோம். 

அதிகாலைத்திருப்பதி.

                      ஆந்திராவைச்சேர்ந்த என் நண்பர் திரு.சீனிவாசனைத்தொடர்பு கொண்டு, திருப்பதி செல்லவேண்டுமென்றேன். எப்ப வாறீங்க, எத்தனை நாள் இருப்பீங்க என்றார். அவர் கோவையில் தற்போது குடியிருக்கிறார். எனினும்,அவர் பணிபுரியும் நிறுவனம், ஆந்திராவில் ஐம்பது வருடங்களாய்க் கொடிகட்டிப்பறக்கும் நிறுவனம் என்பதால், அனைத்து ஏற்பாடுகளையும் நேர்த்தியாய் செய்திருந்தார்.

ஐந்து மணிக்கு அறையிலிருந்து எடுத்த படம்.

                     அவருடன், அவரது துணைவியார் திருமதி.கீதாவும் நகரியில் வந்து சேர்ந்து கொண்டார். அவருக்குத் தனியே நன்றி சொல்லவேண்டும். ஏனெனில், திருமதி. கீதாவால்தான், எங்களுக்கு திருமலைவாசனை அருகில் சென்று தரிசிக்கும் பாக்கியம் கிடைத்தது. ஞாயிறு காலை 5.30 மணிக்கு தரிசனம் செய்ய அனுமதிச்சீட்டுடன் வந்தார். அதிகாலை 3.00 மணிக்கெல்லாம் எழுந்து, ஏழுமலையானை எண்ணத்தில் இருத்தி, வரிசையில் சென்று கொண்டிருந்தோம்.பிரதான வாயிலின் உள்ளே எங்கள் வரிசை நுழைந்ததும், எதிரில் வந்த ஒரு பிரமுகரைப்பார்த்து, சீனிவாசன் சார் வணங்கினார். அவரும், பதிலுக்கு ஏதோ சொல்லிவிட்டுச்சென்றார். அவருடன், அரசியல் பிரமுகர் ஒருவரும் சென்றார். அவர்கள் பேசியது, தெலுங்கில் என்பதால், நான் ஙே!

நாங்கள் தங்கியிருந்த காட்டேஜ்.

நாங்கள் தங்கியிருந்த காட்டேஜ்.

                                   அடுத்த ஐந்து நிமிடங்களில், ஏழுமலையான் எங்களை முழுமையாய் தரிசிக்க அழைத்த அந்த அதிசயம் நடந்தது. ஆம், அந்த முக்கிய பிரமுகர்,  அவருடன் சென்ற அந்த அரசியல் பிரமுகரை தரிசனம் முடித்து வழியனுப்பிவிட்டு, அவசரமாய் வந்து எங்களை வரிசையிலிருந்து வெளியில் வரவைத்து தனித்துக் கோவிலின் உள்ளே அழைத்துச்சென்றார். வெங்கடேசப்பெருமான் சன்னதியிலுள்ள முதல் அறையில் எங்களுடன் அவரும் தரையிலமர்ந்து அளவளாவினார். அப்போது, சீனிவாசன் சார் அறிமுகம் செய்தபோதுதான் தெரிந்தது, அவர் ஒரு ஐ.ஏ.எஸ் அதிகாரி என்று. மிகச் சாதாரணமாய் இருந்தார். 

                         அவரின் தம்பியும், சீனிவாசன் சாரும் பால்ய நண்பர்கள். இருவரும் பரஸ்பரம் பேசி நலம் விசாரித்து முடிக்கவும், அதிகாலை தரிசனத்திற்கு அனுமதிக்கப்பட்டிருந்த நபர்கள் வருகை முடியவும் மிகச்சரியாயிருந்தது. அடுத்த அரைமணி நேரம், பக்தர்கள் உள்ளே அனுமதிக்கப்படுவதில்லை. அந்த நேரத்தில், எங்களை மூலஸ்தானத்திற்கு அருகிலுள்ள அறைக்கு அழைத்துச்சென்று, ஏழுமலைவாசனுக்கு கற்பூர ஆரத்தியெல்லாம் காட்டச்சொல்லி, நன்றாய் நின்று தரிசனம் செய்யுங்கள் என்று அவரும் நின்றிருந்தார். 

                         ”ஜருகண்டி, ஜருகண்டி” எனச் சடுதியில் நம்மைத்தள்ளிவிட ஆளே இல்லை. எத்தனையோ முறை, திருப்பதி சென்றிருந்தாலும், இந்த முறை ஒரு இனிய அனுபவம்தான். நிம்மதியாய் பல நிமிடங்கள் நின்று தரிசித்து வெளியில் வந்தால், பகவானுக்குச் சாத்திய வஸ்த்திரங்கள் இருக்கும் அறைக்கு அழைத்துச்சென்று, அட்சதையை தலையில் போட்டு, அங்கவஸ்த்திரத்தால் ஆசிர்வதித்தனர்.  புல்லரித்த உடல், புரிந்துகொள்ள சிறிது நேரமாயிற்று. மஹாபிரசாதம் அளித்து வழியனுப்பினர்.

நானும் என் மருமகனும்.

                     

நானும் நண்பர் சீனிவாசனும்.

                                              அடுத்து அலமேல்மங்காபுரம் வந்து, அம்மனை தரிசித்து, அங்குள்ள நடசத்திர ஹோடலில் உணவருந்தி, திருத்தணி நோக்கிப்புறப்பட்டோம்.

                     

                       திருத்தணி அருகில் நண்பரின் ’பாஸ்’ பராமரித்துவரும் தோட்டத்தில் சென்று நின்றது கார்.    சென்றவுடன் தாகம் தணிக்க, கூந்தலுடன் குளிரூட்டப்பட்ட இளநீர்,  அடுத்த சில நிமிடங்களில், சிறந்த மாம்பழங்களின் தோல்நீக்கிய துண்டுகள் என இயற்கை உணவுகள் வழங்கி,எதை உண்பது, எதைத்தவிர்ப்பது என்று எங்களைத் திக்குமுக்காட வைத்தனர்.                                                                                               

                   

                    அந்த மாம்பழ உலகம், அங்கு விளையும் மாங்கனிகள், இயற்கையின் ரசிகரான,அறுபத்தைந்து வயது இளைஞர்-அதன் உரிமையாளர் திரு.பிரபாகர் சார் பற்றியும் அடுத்த பதிவில் பார்ப்போம்.

              மாம்பழங்கள் பற்றி எடுத்துரைக்கும் மேலாளர்

எழில்கொஞ்சும் ஏழுமலை

தூரத்தில் புள்ளிகளாய் திருப்பதி நகர கட்டடங்கள்