உணவுஉலகம்

பண்பலையில் பல தகவல் பகிர்வு.

2012-02-02T07:26:00.001+05:30

கடந்த ஆண்டில், நெல்லை ஹலோ எஃப்.எம்.மில், கல கல அறிவிப்பாளர் திரு. ராஜசேகர் ,”புகார் பெட்டி”யில், கலப்படம் குறித்த விழிப்புணர்வு பேட்டி ஒன்று வேண்டுமென்றார். அதில் கலப்படம் .குறித்த அவரது சந்தேகங்களும், அதற்கான எனது பதில்களும்:

வியாபாரம் மட்டும் நோக்கமல்ல விழிப்புணர்வும்தான்.

2012-01-24T09:29:00.000+05:30

கடந்த சில நாட்களுக்கு முன், காலை நேரத்தில் ஒரு அலைபேசி அழைப்பு. தெரியாத எண் என்பதால், மிகுந்த யோசனையுடனே எடுத்தேன். மறுமுனையில் பேசியவரோ, தம்மை காளீஸ்வரன் என்று அறிமுகம் செய்து கொண்டு, என் பெயரைச் சொல்லி, என்னிடம் பேச வேண்டுமென்கிறார். எனக்கோ ஆச்சரியம்.

எப்படி என்னைத் தெரியுமென்றேன்? எல்லாம் கூகுளாண்டவர் உபயம் என்றார். புரியவில்லை, சற்றே விளக்கமாய்ச் சொல்லுங்கள் என்றேன். தாம் காரைக்குடி பேக்கரி ஓனர்ஸ் அசோசியேசனின் கௌரவ செயலாளர் என்றும், 22.01.2012ல், காரைக்குடியில், முகவை மண்டல விழிப்புணர்வு மாநாடு நடத்த இருப்பதாகவும் தெரிவித்தார். அந்த மாநாட்டில், புதிய உணவு பாதுகாப்பு சட்டம் குறித்து விளக்க, பயிற்றுநர் நாடி, "TOP TEN FOOD SAFETY TRAINERS IN TAMILNADU" என்று கூகுளில் கொடுத்தேன். அதில் உங்கள் பெயர் இருக்கிறது. கண்டிப்பாக வந்து கலந்து கொள்ளவேண்டுமென்று அன்புக் கட்டளையிட்டார். சரியென்று ஏற்றுக்கொண்டேன்.

அதே விழாவிற்கு, கர்நாடக மாநில, தார்வார்டு, வேளாண்மை விஞ்ஞான பல்கலைக்கழக விஞ்ஞானி மற்றும் பேக்கரித்துறை தலைமை பேராசிரியை முனைவர்.திருமதி.சகுந்தலா மசூர் அவர்களையும் அழைத்திருந்தார். சாதாரணமாய் எண்ணிச்சென்ற எனக்கு,திரு.காளீஸ்வரன், விழிப்புணர்வு மாநாட்டினை, அரசியல் கட்சி மாநாட்டிற்கு இணையாக ஏற்பாடு செய்திருந்ததைக் கண்டு சற்றே மலைப்பாகத்தான் இருந்தது. அதன் பின்னே இருந்த அந்த நாற்பது வயது இளைஞரின் உழைப்பும், உத்வேகமும் புரிந்தது. சங்கரன்கோயில், தரங்கம்பாடி, திருப்பத்தூர்,சிவகங்கை, கோயம்புத்தூர் என பல்வேறு பகுதிகளிலிருந்தும் பலர் வந்திருந்தனர்.

மாநாடு நடைபெற்ற மண்டபத்தின் தரைத்தளத்தில், பேக்கரித்தொழிலுடன் சம்பந்தப்பட்ட பல்வேறு இயந்திரங்கள், சாதனங்கள் உற்பத்தி செய்யும் நிறுவனங்களின் கண்காட்சி நடைபெற்றது. அதில், CHAT COUNTERS தயாரிக்கும்,கோவை, ஈரோ ஸ்டைல் என்ஜினியர்ஸ், ROTARY RACK OVENS தயாரிக்கும் வி.எஸ். என்ஜினியரிங், பேக்கரி பொருள்களை பேக்கிங் செய்ய பயன்படும் கண்டெய்னர்கள் தயாரிக்கும், மதுரை, பேக்கரி வேல்ட், பேக்கரி இயந்திரங்கள் தயாரிக்கும் கும்பகோணம்,சாமுண்டி நிறுவனம், குளிர்சாதன இயந்திரங்கள் தயாரிக்கும் பெங்களூர், எக்செல் நிறுவனம், உலகத்தரமான பேக்கரி தொழில் நுட்பம் மற்றும் சர்வீஸ் வழங்கும் மதுரை, M-IMPEX நிறுவனம்,கோவை, SEEDS ENVIRO LABS மற்றும் பேக்கரி தொழிலிற்குத் தேவையான எசன்ஸ் தயாரிக்கும் நிறுவனம் ஆகியவற்றினை அங்கு அழைத்து வந்தது, மாநாட்டிற்கு வந்த வணிகர்களுக்கு, தொழில் சார்ந்த உதவி புரிவதாய் இருந்தது பாராட்டத்தக்கது.

கடும் போட்டி நிறைந்த இந்த தொழிலில்,ஆண்களுக்கு இணையாக, உலகத்தரமான பேக்கரி தொழில் நுட்பம் மற்றும் சர்வீஸ் வழங்கும் மதுரை, M-IMPEX நிறுவனத்தை வெற்றிகரமாக நடத்துவது நெல்லையை சார்ந்த திருமதி. சுதாகிருஷ்னண் என்று அறிந்தபோது, மனம் மிக மகிழ்ந்தது.HATS OFF TO YOU Mrs.SUDHA KRISHNAN.

முதல் தளத்தில் நடந்த மாநாட்டில், தமிழ்நாடு பேக்கர்ஸ் பெடரேசன் தலைவர் திரு.குமார், அன்னபூர்ணா திரு.முருகேசன், பெரீஸ் பிஸ்கட்ஸ் திரு.மகேந்திரவேல் ஆகியோரின் வாழ்த்துரைகளுக்குப்பின், முனைவர்.திருமதி.சகுந்தலா மசூரின் ”சத்தான பேக்கரி உணவு தயாரிப்பு” என்ற ஆங்கில உரையினை, திருச்சி, ரமணாஸ் பேக்கரி, திரு.சுந்தரராஜன் மொழிபெயர்த்தார். அடுத்து,மதுரை மாநகரில் பணிபுரியும் திரு.மணிவண்ணன், சட்டத்தின் சாராம்சங்களை எடுத்துரைத்தார்.

பேக்கரி மற்றும் உணவகத் தொழில் துறைகளிலிருந்து வந்திருந்த அனைவரின் பேச்சிலும் , புதிய சட்டம், அவர்தம் தொழிலை நசுக்கிவிடுமோ என்ற ஐயமே தலைதூக்கி நின்றது. அதனை தெளிவு படுத்த, அடுத்து நான் பேச அழைக்கப்பட்டேன்.பேக்கரி தொழிலின் பரிணாம் வளர்ச்சியைக்கூறி, ஈரட்டி(BISCUIT),மடக்கு ரொட்டி(PUFFS),பம்பர ரொட்டி(MACRONS)என்று சுத்த தமிழில், காரைக்குடி மண்ணில் பேக்கரி பொருள்களை குறிப்பிடுவதை சொல்லி அவையோரின் கவனத்தை என் பக்கம் ஈர்த்தேன்.
எப்படி கற்காலத்தில், தானியங்களை கூழாக்கி, சூடான பாறைகளில் சுட்டுத்துவங்கிய இந்த தொழில் நுட்பம், இன்றுமின்சார அடுப்புகளில் பப்ஸ், பன், கேக் போன்றவை தயாரிக்கும் அளவிற்கு முன்னேறியுள்ளதோ, அதேபோல், பழைய உணவுக்கலப்பட தடை சட்டம் சீர்திருத்தப்பட்டு, இந்த புதிய சட்டம் அமலுக்கு வந்துள்ளதுஎன்றும், இந்திய உணவினை, உலகத்தரத்திற்கு உயர்த்துவது ஒன்றே புதிய சட்டத்தின் நோக்கம் என்றும், தவறுகளைத் திருத்திக்கொள்ள பல்வேறு சந்தர்ப்பங்கள் அளிக்க, புதிய சட்டத்தில் வழிவகை செய்யப்பட்டுள்ளதென்பதையும் தெள்ளத்தெளிவாய் எடுத்துரைத்தேன். பாதுகாப்பான பேக்கரித் தொழில் நடத்தி, சுகாதாரமான உணவினை அளிப்பது எப்படி என்பதை விளக்கும் நடைமுறைகளை எடுத்து சொன்னேன்.

பேக்கரிதொழிலில் பின்பற்ற உணவுபாதுகாப்பு நடைமுறைகள்:

Ø தொழில் செய்ய உரிய உரிமம் பெறுதல்

Ø புதியசட்டம் குறித்த விழிப்புணர்வுக் கூட்டங்களில் கலந்து கொள்ளுதல்.

Ø உணவுபாதுகாப்பு சட்டம் குறித்து பணியாளர்களுக்கு உரிய பயிற்சி அளித்தல்.

Ø தொழிற்சாலைகளில்,விழிப்புணர்வு வாசகங்கள், சுவரொட்டிகள் அனைவரும் அறியும் வண்ணம் வைத்தல்.

Ø பயன்படுத்த தகுதியற்ற/காலாவதியான உணவுப்

பொருள்களை,உடனுக்குடன் அப்புறப்படுத்துதல்.

Ø பணியாளர்களுக்குசுத்தமான, முறையான சீருடைகளை வழங்குதல்.

Øஉணவுப்பொருள்கையாளும் அனைவருக்கும், மருத்துவ பரிசோதனை செய்து, உடற்தகுதி சான்று பெறுதல்.

Øஉணவுஉற்பத்தி கூடங்களை, காலமுறைப்படி வெள்ளையடித்தல்.

Øஉணவுப்பொருள்தயாரிக்க,சுத்தமான, பாதுகாப்பான தண்ணீரையே பயன்படுத்துதல்.

Øமுதலுதவிப்பெட்டிகளை, அனைவரும் அறியும் வண்ணம் வைத்திருத்தல்.

Ø உணவுப்பொருள்பாக்கட்கள் மீது ஒட்டப்படும் லேபிள்கள் தயாரிப்பில் தனிக்கவனம் செலுத்துதல்.

Øமூலப்பொருள்கள நம்பிக்கையான விநியோகஸ்தர்களிடமிருந்து மட்டுமே வாங்குதல்.

Øவளாகத்தில்உள்ள சிலந்திவலை/ஒட்டடையினை, உடனுக்குடன் அப்புறப்படுத்துதல்.

Ø உணவுதயாரிக்குமிடங்களிலுள்ள தேவையற்ற பொருள்களை அவ்வப்போது அகற்றுதல்.

Ø உணவுதயாரிக்குமிடத்தின் தரையைத் தினசரி கழுவுதல்.

Ø தயாரானஉணவுப்பொருள்களை பாதுகாப்பாக இருப்பு வைத்தல்.

Ø சிறுபூச்சிகள், எலிகள் போன்றவை, உணவு தயாரிக்கும்/விற்பனை செய்யும் இடங்களில்உலவுவதைத் தடுக்க, முறையான பூச்சி/எலி கொல்லும் நடைமுறைகளை அனுசரித்தல்.

Ø உணவுப்பொருள்கையாள்பவர்கள் கையுறை, தலைத்தொப்பி, மேலாடை(Apron) அணிவதை கட்டாயமாக்குதல்.

Ø உணவுப்பொருள்களைபொதியும் பொருள்கள் உணவுத்தரம் வாய்ந்தவையா என உறுதிப்படுத்தி, வாங்கி தேவையானஅளவில் இருப்பு வைத்தல்.

Ø இருப்பில்உள்ள பொருள்கள், தயாரித்த, விற்ற பொருள்களின் கணக்கு பராமரித்தல்.

Ø உணவுப்பொருள்களைஎடுத்துச் செல்லும் வாகனங்களை சுத்தமாகப் பராமரித்தல்.

Ø உணவுப்பொருள்கையாள்பவர்கள் அவர்தம் கைகளை சுத்தமாகக் கழுவிட அறிவுறுத்துதல்.

Ø உணவுதயாரித்த பாத்திரங்களை சுத்தம் செய்திட தனியாக இடம் ஒதுக்குதல்.

Øகெட்டுப்போன உணவுப்பொருள்களை தொழிற்சாலைவளாகத்திலிருந்து அப்புறப்படுத்துதல்.

பயிற்சியில் பங்கு பெற்றவர்களின் சந்தேகங்களுக்கு விளக்கமளிக்கும் நிகழ்ச்சிக்குப் பின், சென்னை, Everonn நிறுவனத்தினர், மாநாட்டில் கலந்து கொண்ட வியாபாரிகளுக்கு, கேள்வித்தாள் ஒன்றை அளித்து, நிகழ்சி ஏற்படுத்திய விழிப்புணர்வை தெரிந்துகொண்டு, அதற்கான சான்றிதழ் அளிக்க முன்வந்ததும், பங்கு பெற்றோர், உணவு பாதுகாப்பு பயிற்சி பெற்ற சான்றிதழ் பெற உதவியதும்,வித்யாசமான ஒரு அணுகுமுறையாக இருந்தது.

நன்றி: மதுரை,தினமலர் செய்தி

துரித உணவு தரும் துன்பங்கள்.

2012-01-17T10:16:00.000+05:30

இன்றெல்லாம் கடைக்குப் போனால், எல்லாமே ரெடிமேட்தான். ”ரெடி டூ ஈட்” வகை உணவுகள், நம்ம வீட்டு மஹாலக்‌ஷ்மிகளை, நச்சென்று கவர்ந்துவிடும். நம் முன்னோர்கள், வீட்டு வேலைகளுக்குக்கூட, பெண்களுக்கு உடல் வலுவேற வேண்டும் என்ற நோக்கத்தில்தான்,அதற்கான உபகரணங்களைப் படைத்துள்ளனர்.
வீடு பெருக்குவதும், முற்றம் தெளிப்பதும், கோலமிடுவதும், அம்மி அரைத்தலும், அவரவர் வேலையினூடாக அவர்களுக்குக் கிடைக்கும் உடற்பயிற்சி எனலாம். அவையெல்லாம், அவசர யுகத்தில், தேவையற்று, தேடிப்பிடிக்க வேண்டியது போதாதென்று, அன்றாடம் நம் உடல் நலத்தைக் குறி வைத்துத் தாக்கும் அணு குண்டுகளாய் வந்து இறங்குவன, துரித உணவுகள் என்லாம்.

நம்ம ஊர் பேக்கரியில, நாளும் செய்து வெளிவரும் ரொட்டிகள், நாலு நாள் இருந்தாலே, நார் நாரா, பூஞ்சக்காளான் புடிச்சிக்கும். ஆனா, இன்னைக்கு, பல சூப்பர் மார்க்கட் ஷெல்ஃபுகளை அலங்கரிக்கும், வண்ண வண்ண தாள்களில் பொதியப்பட்ட பிரட்களோ, பத்து நாட்களுக்கும் மேலாகவே, பிரஷா இருக்கே, அது எப்படி?
விஞ்ஞான வளர்ச்சியை, நல்ல விஷயத்திற்கு பயன்படுத்துறோமோ இல்லையோ, இது போன்ற படு பாதகச்செயல்களுக்கு, பயப்படாம பயன்படுத்துறோம். ஆம், ’பிரிசர்வேட்டிவ்ஸ்’ என்று சொல்லப்படும் வேதிப்பொருட்களைப் பயன்படுத்தியே, துரித உணவுகள் மற்றும் ரெடி டூ ஈட் உணவுகளின், உயிர்வாழும் காலத்தை உயர்த்துகிறார்கள்.
துரித உணவுகள் பலவற்றில், ’மோனோசோடியம் குளுடாமேட்’ (இதன் மார்கட் பெயர் சொன்னால் அனைவருக்கும் தெரியும்-அதை நான் சொல்வது கூடாது என்பதால் சொல்லவில்லை) எனும் சுவையூக்கி(TASTE IMPROVER) சேர்க்கப்படுகிறது. அதேபோல், ரொட்டி போன்ற பேக்கரி பொருட்களில், சேர்ர்க்கப்படும் சிலவகை வேதிப்பொருட்கள், அவை நெடு நாட்கள் கெட்டுப்போகாமல் வைத்திருக்கும். நல்ல விஷயம்தானே என்று சொல்லலாம்.ஆனால், சேர்க்கப்படும் பொருளின் பெயரும், பக்க விளைவுகளும் தெரிந்து கொண்டால், இத்தகைய கேள்வி எழாது.
பேக்கரிப் பொருட்கள் கெடாமலிருக்க, அவற்றில் காளான் படராதிருக்க, கால்சியம் ப்ரொபியோனேட் மற்றும் சோடியம் ப்ரொபியோனேட்(CALCIUM PROPIONATE & SODIUM PROPIONATE) என்ற இரு வேதிப்பொருட்கள் சேர்க்கின்றனர். அவைதான், ரொட்டி வகை உணவுகள் கெட்டுப்போகாமலிருக்கச் செய்கின்றன.அரசு அனுமதித்துள்ள அள்விற்கு அதிகமாகவே இதனைச் சேர்க்கின்றனர். ஆனால், இந்த வேதிப்பொருட்கள் அதிகம் கலந்த உணவினை நாம் உண்ணும்போது, அவை நம் வயிற்றிலுள்ள குடல் சுவற்றினை நிரந்தரமாக சேதப்படுத்தும்.
அதிலும், குடல் அழற்சி(ULCER) உள்ளவர்களென்றால், அவற்றிற்கு கூடுதல் குஷி. ஆம், நம் வயிற்றில் வாயுக்கள் உருவாகவும், அழற்சியை அதிகப்படுத்தவும் வல்லவை இந்த வேதிப்பொருட்கள். இதன் பயனாக, குடல் அழற்சி மட்டுமல்ல,தலைவலி, சிறு குழந்தைகளின் தூக்கமின்மை, கவனமின்மை போன்ற பல பிரச்சனைகளும் உருவாகும். துரித உணவுகள் மற்றும் பேக்கரி பொருட்கள் மட்டுமின்றி, காய்ந்த பழவகைகள், பால் பொருட்கள், பழச்சாறுகள், ரெடி டூ ஈட்- சப்பாத்தி, பூரி என்று இதனைப்பயன்படுத்தும் உணவுப்பொருட்களின் பட்டியல் நீண்டுகொண்டே செல்கிறது
இவையும் ஒரு வகை கலப்படமே. எனவே, அடுத்த முறை கடைக்குப்போகும்போது, அந்த உணவுப்பொருள் பாக்கட்டின் மீது, என்னென்ன வேதிப்பொருட்கள் சேர்க்கப்பட்டுள்ளது என்று அச்சிட்டிருப்பதைப் படித்துப் பார்த்து, உடல் நலத்தைக்கெடுக்கும் இத்தகைய வேதிப்பொருட்கள் கலந்திருந்தால், அவற்றைத் தவிர்த்திடுங்கள். தவிர்ப்பது ஒன்றே நமக்கும், நம் குடும்பத்தினருக்கும், நம் சந்ததிக்கும் நன்மை பயக்கும்.

விசாலினி இந்தியாவின் விடிவெள்ளி

2012-01-03T08:26:00.000+05:30

ஓடி விளையாடும் வயதில் உலக சாதனை படைத்துவிட்டு, சத்தமேயில்லாமல் அடுத்த சாதனைக்குத் தயாராகும் விசாலினி - சந்தேகமின்றி இந்தியாவின் விடிவெள்ளிதான்!

வயது பதினொன்று(பிறந்த தேதி:23.05.2000). IQ லெவல் 225. நம்ப முடிகிறதா? நம்பத்தான் வேண்டும். ஏனெனில், விசாலினி படைத்துள்ளது உலக சாதனை.கின்னஸ் சாதனையாளரான கிம்-யுங்-யோங்கின் (Kim Ung-Yong) I.Q. அளவான 210 என்பதைவிட, இது இன்னும் அதிகம். இந்தியாவென்பதால்தான் இன்னும் இவள் புகழ் பரவவில்லை. இன்னொரு நாடென்றால், இவளை இதற்குள் உலகமறிய பாராட்டியிருப்பார்கள். ஆம், நெல்லை மண்ணின் மகள் இவள்.

வயதிற்கேற்றார்போல் சைக்கிள் ஓட்டுவதும், கார்ட்டூன் பார்ப்பதும் இவள் பொழுதுபோக்கென்றாலும், இவள் படைத்துள்ளது இமாலய சாதனை. கின்னஸ் புத்தகத்தில் இவள் சாதனை இடம்பெற இவள் வயது காணாதாம். ஆம், பதினான்கு வயது நிறைவடைந்தால்தான் கின்னஸ் புத்தகத்தில் இவள் சாதனை இடம்பெறுமாம். இந்த வயதிலேயே, பள்ளிப்படிப்பிலும் இருமுறை இவள் தாவியுள்ளாள். ஆமாம், இரண்டுமுறை இவளுக்கு கிடைத்துள்ளது டபுள் புரமோசன்.

கல்லூரியில் பயிலும் B.E., B.TECH மாணவர்களுக்கு கணினிப்பிரிவில் உரையாற்றும் அளவிற்கு ஆற்றல் பெற்றுள்ளாள். சமீபத்தில் மங்களூரிலுள்ள NITMல் நடைபெற்ற அனைத்துலக மாநாட்டில் (INTERNATIONAL CONFERENCE), விசாலினிதான் சிறப்பு அழைப்பாளர். அதில் கலந்து கொண்ட பல்வேறு நாடுகளைச் சார்ந்த அறிஞர்களும் விசாலினியின் அறிவுத்திறனைக் கண்டு வியப்புற்றுள்ள்னர்.

15.12.2011 அன்று ஆவடி வேல்டெக் பல்கலைக்கழகத்தில் அளிக்கப்பட்ட
பாராட்டு சான்றுடன்
விசாலினியின் பாட்டி,அம்மா மற்றும் விசாலினி.

இத்தனை சாதனைகள் படைத்துள்ள இந்தக் குழந்தை சிறு வயதில் பேச, சற்றே சிரமப்பட்டிருக்கிறது. அக்குழந்தையின் தாய் திருமதி.சேதுராகமாலிகா, மருத்துவர் ஒருவர் அளித்த ஆலோசனையின்படி, அந்தக் குழந்தையுடன் இடைவிடாது அளவளாவியதின் பலன், அடுத்த ஒன்பது மாதங்களில் விசாலினியின் பேசும் திறனை பெருகச்செய்தது. இன்று உலகமே விசாலினியின் திறனைக்கண்டு வியந்துகொண்டிருக்கிறது.

உலக சாதனை படைத்துள்ள இந்த குழந்தையின் தந்தை திரு.கல்யாண குமாரசாமி ஒரு எலக்ட்ரிசியன். அவரது குழந்தை படைத்துள்ள சாதனைகள் இதோ:

MCP (Microsoft CertifiedProfessional)

CCNA (Cisco Certified NetworkAssociate),

CCNA Security(Cisco CertifiedNetwork

Associate Security),

OCJP (Oracle Certified Java

Professional).

CCNAவில் இவள் பெற்ற மதிப்பெண் 90 சதவிகிதம். இதுவும் ஒரு உலக சாதனைதான்.மங்களூரிலுள்ள NITயும், திருவில்லிபுத்தூரிலுள்ள பொறியியல் கல்லூரி ஒன்றும் விசாலினியை தங்கள் கல்லூரியில் சேர அழைத்தும் இவர் பெற்றோர்கள், இன்னும் சில ஆண்டுகளுக்கு, இந்த இளம் அறிவாளியை, கல்லூரி வாழ்க்கைக்கு அனுப்பி வைக்கத் திட்டமிடவில்லை.பாகிஸ்தானில் உள்ள பன்னிரண்டு வயது மாணவர் இரிடிசா ஹைதரின் சாதனையை பத்து வயதில் முறியடித்து THE YOUNGEST CCNA WORLD RECORD HOLDER என்ற உலக சாதனை படைத்துள்ளார்.

உலகமே இந்தக் குழந்தையின் சாதனைகளை உற்றுப்பார்க்கும் இந்த நேரத்திலும்,உள்ளூரில் இன்னும் இந்த குழந்தையை உச்சி முகர்ந்து பார்க்கவில்லையென்பதே இவள் பெற்றோரின் ஆதங்கம். ஆம் நம் மத்திய, மாநில அரசுகளின் பார்வை இந்த உலக சாதனையாளர் மீது இன்னும் படவில்லை.பதிவுலகில் குவியும் பாராட்டுக்களாவது, இந்தத் தெய்வக்குழந்தையை உலக அரங்கிலும், உள்ளூரிலும் உச்சத்திற்குக் கொண்டு செல்லட்டும்.

நன்றி:தகவல் பகிர்வு:திருமதி.சேதுராகமாலிகா மற்றும் http://www.visalini.com

வேண்டுகோள்:1) ஒரு இந்திய்ர்,அதிலும் தமிழ்நாட்டைச் சார்ந்த இந்த சிறுமியின் சாதனை உலகறியச் செய்திட, முடிந்தவரை அனைத்து நண்பர்களும் இந்தச் செய்தியினை அவரவர் தளத்தில் பகிருங்கள்.
2)விசாலினியின் இ-மெயில் ஐ.டி: visalini2000@gmail.com. இதற்கு நம்மாலானது, ஒரு பாராட்டு மெயிலை அனுப்பி அப்பெண்ணை ஊக்குவிக்கலாமே!

இன்று (05.01.2012)குற்றாலத்தில் விடிவெள்ளி விசாலினிக்கு நடைபெற்ற பாராட்டு விழா புகைப்படங்கள் உங்கள் பார்வைக்கு:

விசாலினியின் டுடும்பத்தினருடன் பதிவர்கள் சங்கரலிங்கம்,செல்வகுமார்,
மதுரை சரவணன்,சீனா அய்யா.

அம்பாசமுத்திரம் சட்டமன்ற உறுப்பினர் விசாலினிக்கு,
தமிழ்பதிவர்கள் சார்பாக கேடயம் வழங்குகிறார்.

தொலைக்காட்சி பேட்டியில் விசாலினி

விசாலினியின் பெற்றோருடன் உணவு உலகம் சங்கரலிங்கம்,
செல்வா ஸ்பீக்கிங் செல்வகுமார்.

நிகழ்ச்சியின் வீடியோ தொகுப்பு:

நன்றி:தேவா (தடை பல கடந்து, படம் வெளியிட துணை புரிந்ததற்கு)

தினமலரில் நிகழ்ச்சி குறித்த செய்தி:

வந்த பாதையும் வழிகாட்டிய நண்பர்களும்.

2011-12-29T22:19:00.000+05:30

அன்றாடம் ஆன்மீகப் பதிவுகள் மூலம், பதிவுலகில் தனக்கென்றோர் தனியிடம் பிடித்து வரும் சகோதரி ராஜராஜேஸ்வரியின் அழைப்பை ஏற்று ”இந்த வருடத்தில் நான்” என்ன எழுதியுள்ளேன் என்று திரும்பி பார்க்கின்றேன். ‘நான்” என்ற வார்த்தை தலைப்பில் வருவதைத் தவிர்த்திடவே தலைப்பை மாற்றியுள்ளேன்.

துறை சார்ந்த விஷயங்களை, பலரும் அறிந்து கொள்ளும் வண்ணம் பகிர்ந்து கொள்ள வேண்டுமென்ற ஆசையில், எறும்பு வலைப்பூவில், நீங்கள் வாங்கும் உணவுப்பொருட்கள் தரமானதா ?? என்ற தலைப்பில் முதன்முதலில் பகிர்ந்து கொண்டேன். அப்போதுதான், ஏன் நாமும் வலைப்பூ ஒன்றை தொடங்கக்கூடாதென எண்ணினேன்.

எண்ணம் செயல் வடிவானது. நவம்பர்-2009ல், பதிவுலகில் ”உணவு உலகம்” என்ற வலைப்பூவின் மூலம் அடியெடுத்து வைத்தேன். என்னைப்போல் பணியாற்றும் சகாக்களுக்கு உதவிடும் விஷயங்களையும், கலப்படம் குறித்த விழிப்புணர்வு தகவல்களையும் மட்டுமே பகிர்ந்து வந்தேன்.

ஒரு கால கட்டத்தில், துறை சார்ந்த தகவல்களுடன், பல்சுவைப் பதிவுகளையும் பகிர ஆரம்பித்தேன். இந்த நேரத்தில்தான், சகோதரி கௌசல்யாவின் அறிமுகம் கிடைத்தது. தினசரிகளில் நாங்கள் நடத்தும் ரெய்டு சம்பந்தமாக வரும் செய்திகளை கவனித்து வந்த அவரது கணவர் திரு.ஜோதிராஜ், என்னை மனதோடு மட்டும்... வலைப்பூவில் அறிமுகப்படுத்தச் சொல்லியுள்ளார். அதனால் தங்கை கௌசல்யா எழுதிய பதிவு: இன்று ஒரு பதிவர் - விமர்சனம் - 1 , என்னைப் பதிவுலகில் பலரும் திரும்பிப் பார்க்க வைத்தது.

சித்ரா: இந்த நேரத்தில் சகோதரி சித்ரா பற்றி நினைக்காமலிருக்க முடியாது. அமெரிக்காவிலிருந்து கொண்டு, தமிழ்ப் பதிவுலக சொந்தங்கள் எங்கிருந்தாலும், அவர்கள் பதிவிற்கெல்லாம் சென்று படித்து, ஓட்டுப்போட்டு அவர்களை உற்சாகப்படுத்துவதில் அலாதி இன்பம் காண்பவர். என் பதிவுகளையும் எதேச்சையாக படிக்க ஆரம்பித்தவர், நெல்லப்பதிவர் என்றதும் தனி ஆர்வத்துடன் வந்து கருத்துக்களைப் பதிவு செய்து செல்வார். பின்னாளில், நெல்லையில் முதல் முறையாக ஒரு பதிவர் சந்திப்பு வெற்றிகரமாக நிகழ்ந்திட இந்தத் தங்கையின் அன்பு அடித்தளம் அமைத்துக் கொடுத்தது என்றால் அது மிகையன்று.

நெல்லை பதிவர் சந்திப்பு: சென்ற வருடத்தில் மறக்க முடியாத நிகழ்வு நெல்லைப் பதிவர் சந்திப்பு. விளையாட்டாக ஆரம்பித்து, வெகு விமரிசையாக நடைபெற ஒத்துழைத்த மனோ,இம்சை அரசன், சிபி, செல்வா,சகோதரிகள் சித்ரா, கௌசல்யா,ரூஃபினா,துபாய்ராஜா, கருவாலி ராமலிங்கம், வெடிவால் சகாதேவன் சார், யானைக்குட்டி ஞானேந்திரன் மற்றும் பலர். இந்த பதிவர் சந்திப்பில் திரட்டிய நிதியில், சமூக சேவை ஒன்றை செய்து சரித்திரம் படைக்கவும் வித்திட்டது.

முதல் வருடம்: 11,000 ஹிட்ஸ்.

இரண்டாம் ஆண்டு மட்டும்:34,000 ஹிட்ஸ்.

இந்த மாதம் வரை: 50,000 ஹிட்ஸ்.

தொடர்பவர்கள்: 256

இண்ட்லியில்: 118
இது என் 325வது பதிவு.

வேலைப்பழுவின் காரணமாக பல நாட்கள் பதிவுலகம் பக்கம் வராமலே இருந்துள்ளேன். அல்லது எல்லோரும் பார்த்து கமெண்டிய பின்னர், காலதாமதமாக பார்வையிட்டு கருத்துக்களைப் பதிவு செய்துள்ளேன். பல வலைப்பூக்களை இன்னும் பார்க்கக்கூட நேரம் கிடைத்ததில்லை. ஒவ்வொரு பகிர்விலும் புதுப்புது நண்பர்கள் வந்து வாழ்த்தும்போது, என் எழுத்திலும் ஏதோ இருப்பதாக எண்ணிக்கொள்வேன். நட்பு நம்மை எங்கெல்லாம் அழைத்துப்போகிறது என்றெண்ணி வியந்ததும் உண்டு.

நாஞ்சில் மனோ: அவரது வலைத்தளத்தில், ”உணவு உலக ஆஃபிசரின் வலைத்தளம்” என லிங்க் கொடுத்து அதில் இவருடன் நான் மதுரைக்குப் பயணித்தபோது எடுத்த என் ஃபோட்டோவையும் போட்டு பய்முறுத்தியுள்ளார். நெல்லைப்பதிவர் சந்திப்பில் முதல் முறை பார்த்ததும் ’பச்சக்’ என்று அன்பால் ஒட்டிக்கொண்டவர்.
பன்னிகுட்டி ராம்சாமி:ஸ்டார்ட் மியூசிக் வலைப்பூவில் என் தளத்திற்கு தனியிடம் கொடுத்து என் மனதில் இடம் பிடித்த முதல்வர். இதன்மூலம் என் தளம் வந்த பார்வையாளர்கள் அதிகம். கும்மி விஷயங்களில் நான் விலகியே இருக்கும்படி, நண்பர் இம்சை அரசன் பாபு மூலம் அக்கறையுடன் அறிவுரைகள் பல வழங்கியவர்.

பலே பிரபு:உணவு உலகம் டொமைனுக்கு மாறிட, இவர் எழுதிய பதிவொன்றே காரணம். எனது வலைப்பூவின் தலைப்பு தனியாக ஒளிர்ந்திடச் செய்தவரும் இவரே.

விக்கி உலகம்: வலைப்பூவிலும்,பதிவுலக நடைமுறைகளிலும் சந்தேகம் வரும்போதெல்லாம், பலமுறை இவரிடம் கேட்டுத் தெளிவு பெற்றுள்ளேன்.

சிபி:எத்தனை அடித்தாலும் தாங்கும் அகல முதுகு படைத்த இவர், பதிவில் பலமுறை என்னை இழுத்துவிட்டு,எனது தளத்திற்கு இலவச விளம்பரம் கொடுத்தவர்.

நிரூபன்: ஒருமுறை எனது மெயில் ஐ.டியிலிருந்து,தவறான ஸ்பாம் மெயில்கள் செல்கிறதென ஒரு பதிவில் நான் புலம்பியபோது, எனக்கு அக்கறையாக் மெயில் அனுப்பி, சில மாற்றங்கள் செய்ய பரிந்துரைத்தவர். அது ஸ்பாம் மெயில் தொல்லையிலிருந்து விடுபட பெரிதும் உதவியது.
இம்சை அரசன் பாபு:இப்பல்லாம் இவர் பதிவுலகம் பக்கம் வருவதே அதிசயம். நெல்லைப்பதிவர் சந்திப்பில் நெஞ்சம் நிறைந்தவர்.

அப்புறம் பலாபாடறை-ஷங்கர்,மணிஜீ,ஷர்புதீன்,செங்கோவி,கருண், கவிதை வீதி,செல்வா,விஜயன்,தங்கசிவம்,சிவகுமார்,கலியுகம் தினேஷ், நக்கீரன்,ஸ்டார்ஜன்,யாஹூராம்ஜி,ரத்னவேல்அய்யா,ரஹீம்கசாலி, ரஜீவன்,அன்புத்தங்கைகள் மதுரை ஆனந்தி,கல்பனா,அமைதிச்சாரல் . . . . என்று நீளும் இந்த சொந்தங்களின் நட்பு எல்லைகளற்றது. என் தாய் உடல் நலம் குன்றி, மருத்துவமனையில் இருந்தபோதும் சரி, அவர் இம்மண்ணுலகை விட்டு மறைந்த பொழுதும் சரி, என் உற்றார், உறவினரை விட, என்னிடம் அதிகம் அக்கறையுடன் பேசி என்னைத்தேற்றியது இந்த பதிவுலகச் சொந்தங்கள்தான்.
இந்த வருடத்தில் எனது புதிய முயற்சி ஆங்கில வலைப்பூ. அதில் உணவு சம்பந்தமான தகவல்கள் மட்டுமே பகிர்ந்துகொள்கிறேன். அதை எனது வலைப்பூ தொடங்க பல்வேறு வகையிலும் உதவிய நண்பரும் குருவுமான ஜோசப்(தற்போது மதுரை வாசம்) சாரின் ஊக்கத்தினாலும், பலே பிரபுவின் வழிகாட்டுதலிலும்,டொமைனிற்கு மாற்றியுள்ளேன். FOOD SAFETY.

பிறக்கின்ற புத்தாண்டில், இணையம் நமக்கு வழங்கியுள்ள இந்த மாபெரும் வாய்ப்பினை, நமக்குத் தெரிந்தவை இந்த உலகம் தெரிந்திட நல்ல வழியில் நட்புடன் பயன்படுத்துவோமென்ற உறுதிபூண்டிட வேண்டி முடித்துகொள்கிறேன்.
நினைத்து, நினைத்து எழுதினாலும், சிலரை எழுத மறந்திருக்கலாம். எழுதும் வாய்ப்பை எனக்கு ஏற்படுத்திய பதிவுலக சொந்தங்களுக்கு நன்றிகளுடன்.
டிஸ்கி: இந்த பதிவை, எழுத நேரம் கிடைக்கும் அனைவரும், தொடர வேண்டுகிறேன்.

பாம்பாறு வழி வாணதீர்த்தம்

2011-12-28T10:23:00.001+05:30

கதிரவனின் கதிர்களின் பிண்ணனியில் வாணதீர்த்தம்

கடந்த வாரத்தில் ஒரு நாள். காலை நேரத்தில் களை கட்டியது எங்கள் பயணம். நண்பர்கள் நால்வர் சேர்ந்து போட்ட திட்டத்தின்படி, அவரவர் வீட்டில், அழகாய் ஒரு (பொய்க்)காரணம் சொல்லிவிட்டு, சந்திக்க ஒரு இடத்தைத் தேர்ந்தெடுத்து, அதிகாலையில் அனைவரும் சந்தித்தோம்.

கடல்போல் காட்சியளிக்கும் காரையாறு அணை.

எங்கு செல்வது என்று திட்டமிடாமலே, பயணம் செல்லவேண்டுமென மட்டும் முடிவெடுத்தது அப்போதுதான் உரைத்தது. நால்வரில் ஒருவர் பாபநாசம் பகுதியிலிருக்கும் அவரது நண்பர் ஒருவரைத் தொடர்பு கொண்டு, அங்கு நண்பர்கள் நான்கைந்து பேர் வருவதாகச் சொன்னார். எதிர்முனையிலிருந்து இன்முக வரவேற்பு என்பது பேசியவரின் முகத்தில் தெரிந்தது.

காலை உணவை நண்பர் சுதனின் கடையில் தயார் செய்து புறப்பட மணி பத்தானது. சோதனை சாவடி அருகிலேயே எங்களை அழைக்க வந்த நண்பர் காத்திருந்தார். சோதனை சாவடி கடந்து, காரையாரை நாங்கள் அடையும்போதே மணி 12. அங்கிருந்து அணைக்குள் படகில் பயணம். பதினைந்து நிமிடபயணத்தில், பக்கத்தில் ஒரு பங்களா(!) அருகில் சென்று நின்றது.

முதலில் உணவருந்த அணைக்குள் ஓரிடம்

உணவருந்திய பின் சற்றே ஓய்வு.
சுடலையாண்டி சார், காளிமுத்து, நான்.

ஆம், அது ஒரு ஒற்றை ஓட்டு வீடு. முன் பக்கம், அணையில் அலையடிக்கும் தண்ணீர். சுற்றிலும், அடர்ந்த காடு. அமர்வதற்கு ஒரு அழகிய மர பெஞ்ச். அனைவரும் பயணக்களைப்பு தீர உணவருந்தி, சற்றே ஓய்வெடுத்தோம். அப்பப்பா, சொர்க்கம் இதுதானடா என்று சொக்கியது தூக்கம். அங்கிருந்த காவலர், அடிக்கடி மிருகங்கள் இங்கு வருமென்று சொன்னதும், வந்த தூக்கம், சென்ற வழி தெரியவில்லை.

மீண்டும் படகில் பயணம். சுற்றிலும் உள்ள இயற்கையின் அழகை ரசித்துக்கொண்டே சென்றோம். படகு வாணதீர்த்தத்தை தாண்டியும் பயணித்தது. கேட்டபோதுதான் நண்பர் சொன்னார். இங்கு விடுமுறை நாளென்பதால், கூட்டம் அதிகமிருக்கும். அருமையான இடம் ஒன்று, சற்றே அருகில் இருக்கிறது. சென்றபின் சொல்லுங்கள் உங்கள் கருத்தையென்றார்.

படகிலிருந்து வாணதீர்த்தம்

அடுத்த பத்து நிமிடத்தில், படகு நின்றது. வாவ்! அழகிய ஆற்றின் கரையது. வெள்ளிப்பனியுருகி அங்கே, வீறு கொண்டு சென்று கொண்டிருந்தது. அதில் குளிப்பதற்கென்று ஒரு இடம் உள்ளதென அங்கு அழைத்துச் சென்றார். ஆர்ப்பரித்து வந்த ஆறு, அங்கே அமைதியான நீரோட்டமாக சென்றுகொண்டிருந்தது. ஆற்று நீரில் முகம் பார்க்கலாம். அத்தனை தெளிவு. அருகில் குளிப்பதற்கு ஒரு சிறிய அருவி.

நாங்கள் சென்ற பாம்பாறு.

குளித்து முடித்ததும் உடலும்,மனமும் லேசானது. வீடு நோக்கிய எங்கள் பயணமும் தொடங்கியது. அடுத்தமுறை வாருங்கள், அணைக்கு மேலே ஒரு தனியார் எஸ்டேட்டும், அங்கு ஆனந்தமாய்க் குளித்திட அருவியொன்றும் இருக்கிறது, அழைத்துச்செல்கிறேன் என்று சொல்லியுள்ளார். அன்றைய பொழுதை இனிமையாக்கியதற்கு நன்றி சொல்லி புறப்பட்டோம்.

நாங்கள் குளித்த பாம்பாற்றின் கரையில்
நண்பர்கள் சுதன்,பழனி,முத்துகிருஷ்ணனுடன் நான்

டிஸ்கி-1:இனிமை நிறைந்த இந்த பயணங்கள், இயந்திர வாழ்வின் இன்னல்கள் மறக்கத் தேவைதான்.

புன்னகையுடன் படகு பயணத்தில் பழனி

டிஸ்கி-2:புத்தாண்டில், பன்னிரெண்டாம் வயதில், பலர் புருவம் உயர்த்த வைக்கும் சிறுமியின் அறிமுகத்தோடு சந்திக்கின்றேன்.

அனைவருக்கும் இதயம் கனிந்த இனிய

புத்தாண்டு நல்வாழ்த்துக்கள்.

நெஞ்சில் சுமந்து நிற்கும் நினைவலைகள்.

2011-12-22T09:41:00.001+05:30

என் மகளின் திருமண உறுதி நிகழ்ச்சி கடந்த 14.12.2011ல், சிறப்புற நடைபெற்றது. நேரில் வந்தும், மெயில் அனுப்பியும்,போஸ்ட்டில் கமெண்டியும், சாட்டில் வந்தும் வாழ்த்திய அன்பு நெஞ்சங்கள் அனைவருக்கும் என் உளம் கனிந்த நன்றிகள்.

நிகழ்ச்சியின் நினைவலைகளை நெஞ்சில் சுமந்து நிற்கும் புகைப்படங்கள் சில உங்கள் பார்வைக்கு பகிர்ந்துள்ளேன்.

அடுத்து அனைவருக்கும் ஒரு வேண்டுகோள். இந்தியாவில், குறிப்பாக தமிழ்நாட்டில் இருந்து கொண்டே, இந்த நிகழ்ச்சிக்கு வரமுடியாதுன்னு பல காரணம் சொன்ன நண்பர்கள்,மறக்காம25.04.2012 ல், பாளையங்கோட்டை, செல்வி மஹாலில் நடைபெறும் திருமண நிகழ்ச்சியில் அவசியம் வந்து கலந்து கொள்ள வேண்டுமென அன்புடன் கேடுக்கொள்கிறேன்.

இது கொஞ்சம் ஸ்பெஷல்:பஹ்ரைனில் இருந்தாலும், அன்று நாள் பூராவும் நெல்லை நினைவுகளுடன் இருந்த நம்ம நாஞ்சில் மனோவிற்கும், பள்ளிக்கூடத்திற்கு குழந்தைகளை அழைத்துச் செல்லும் பொறுப்பிலிருந்த ”நினைவில் நின்றவை” விஜயனுக்கும்,குடும்பச் சுற்றுலா பிசியில், ”திருமண வாழ்த்து”மெயில் அனுப்பி பல்பு வாங்கிய அயல்நாட்டிலிருக்கும் சகோதரிக்கும், நிகழ்ச்சியை மறுநாளே பதிவேற்றி வாழ்க பல்லாண்டு!! என வாழ்த்திய சகோதரிக்கும், இன்னும் இது பற்றி பதிவெழுதப்போவதாக சொல்லிக்கொண்டேயிருக்கும் உள்ளூர் சகோதரிக்கும்,வழக்கம்போல வயிறை நிரப்ப வருவதாகச் சொல்லி வராத சிபிக்கும், ”உணவு உலக” பதிவர் வீட்டில் ”உலக உணவு” கேட்டு, உண்ணவராத ”நண்பேண்டா” சிவகுமாருக்கும் ஸ்பெஷல் தாங்ஸ்.

இதுல மஞ்சள்கலர் சட்டை போட்டிட்டிருக்கிற சுமார் 35 வயது மதிக்கத் தக்க நபர் யாருன்னு, நம்ம விக்கி குமார் போல யாரும் கேள்வியெல்லாம் கேட்கக்கூடாதுங்க.

வந்திருந்து வாழ்த்திய அன்பு நெஞ்சங்கள்.

டிஸ்கி: சில பதிவர்களின் ஆலோசனை+வேண்டுகோளுக்கிணங்க, பதிவில் சில மாற்றங்கள் செய்துள்ளேன்.

பதிவர் வீட்டு விழா

2011-12-01T08:28:00.002+05:30

பதிவுலக சொந்தங்களே, என் இனிய மகளுக்கு 14.12.2011ல், திருமணம் நிச்சயம் செய்கின்றோம். 25.04.2012ல், நெல்லையில் வைத்து திருமணம். அதற்கான அழைப்பிதழ், தனியே வலைப்பூவில் மலரும்.

மணமக்கள்: ராஜா & பிருந்தா.

மண நாள் : 25.04.2012

இடம் : செல்வி மஹால், திருநெல்வேலி.

டிஸ்கி:தற்போது, திருமண உறுதி விழா ஏற்பாடுகளில் மூழ்குவதால்,விழா முடிந்ததும் புத்தாண்டில் மீண்டும் சந்திக்கிறேன்.

சட்டம் என்ன சொல்கிறது?-சற்றே சிந்திப்போமா!

2011-11-19T17:43:00.001+05:30

மேடையில் சட்டநாதன், கலியனாண்டி,சங்கரலிங்கம்,இப்ராகீம்.

உணவு பாதுகாப்பு சட்டம் இந்தியா முழுக்க கடந்த 05.08.2011 முதல் அமலுக்கு வந்துள்ளது. புதிய சட்டத்தின் கீழ், உள்ளாட்சி மற்றும் ஆரம்ப சுகாதார நிலையங்களில், உணவு ஆய்வாளராகப் பணிபுரிந்து வந்த உணவு ஆய்வாளர்களை, உணவு பாதுகாப்பை மட்டும் முக்கிய குறிக்கோளாகக் கொண்டு, புதிதாக உணவு பாதுகாப்புத்துறை என்று ஒன்றை உருவாக்கி, முழு நேர உணவு பாதுகாப்பு அலுவலர்களாக அரசு நியமித்துள்ளது.

உணவு பாதுகாப்பு அலுவலர் திரு.மாரியப்பன் விளக்கமளிக்கிறார்.

மாநில அளவில், உணவு பாதுகாப்பு ஆணையர், இணை ஆணையர், மாவட்ட அளவில், ஒரு நியமன அதிகாரியின் (DESIGNATED OFFICER) கீழ், உள்ளாட்சிப்பகுதி மற்றும் ஒன்றிய பகுதிகளுக்கு உணவு பாதுகாப்பு அலுவலர் நியமிக்கப்பட்டுள்ளனர். ஏற்கனவே இருந்த உணவு கலப்பட தடைச்சட்டம் இயற்றப்பட்ட ஆண்டு 1954 என்பதால், அதனை இன்றைய காலகட்டத்திற்கு ஏற்ப மாற்றம் செய்ய வேண்டியது அவசியமாயிற்று.

கலந்துரையாடலில் கலந்து கொண்ட நெல்லை வியாபாரிகள் சங்க பொறுப்பாளர்கள்.

புதிய சட்டத்தின் கீழ் ஏற்படுத்தப்பட்டுள்ள உணவு பாதுகாப்புத் துறையில், அமல்படுத்தப்பட உள்ள உணவு பாதுகாப்பு சட்டம் குறித்து வியாபாரிகள் மத்தியில் பல்வேறு சந்தேகங்கள். புதிய சட்டம், சில்லறை வணிகத்தை சீர்குலைத்துவிடுமோ என்று ஐயப்பாடுகள்.

கலந்துரையாடலில் கலந்து கொண்ட நெல்லை மாவட்ட
உணவு பாதுகாப்பு அலுவலர்கள்.

அரசும் சட்டத்தை தீவிரமாக அமல்படுத்தும்முன், ஆங்காங்கே வியாபாரிகளுடன், கலந்துரையாடல் நடத்தி, சட்டத்தின் நோக்கங்களை எடுத்துரைத்திட விரும்பிற்று. புதிய சட்டத்தின் நோக்கமே, உலக பொருளாதார சந்தையில், இந்திய உணவு பொருள்களின் தரத்தை உயர்ந்த நிலையில் வைப்பதுதான்.

உணவக உரிமையாளர்கள் சங்கம் சார்பாக திரு.ஜெயபிரகாஷ்

இந்தியாவில் தயாராகும் ஒரு உணவுப் பொருள் இண்டர்நேஷனல்ஸ்டாண்டர்டில் இருந்திட வேண்டுமென்பதற்காக, 2006ல் உருவாக்கப்பட்டு, இன்று வரை பல நுணுக்கங்களைச் சேர்த்து செதுக்கியுள்ளது.

சந்தேகங்கள்-விளக்கங்கள்.

அத்தகைய சட்டத்தின்மேல், வியாபாரிகளுக்குள்ள சந்தேகங்களைப் போக்கும் விதமாக, நெல்லையில் ஓர் விழிப்புணர்வுக் கூட்டம் நடைபெற்றது. நெல்லை மாநரிலுள்ள அனைத்து வியாபாரிகள் சங்க பிரதிநிதிகளும் கலந்து கொண்டனர்.

பாளை வியாபாரிகள் சங்க நிர்வாகியின் சந்தேகங்கள்,
விளக்கமளிக்க காத்திருக்கும் உணவு பாதுகாப்பு அலுவலர்.

ஏற்கனவே இருந்த சட்டத்தில், உணவில் கலப்படம் செய்தாலும், உணவுப்பொருள் பாக்கட் மீது ஒட்டப்பட்டுள்ள லேபிளில் தயாரிப்பு தேதி, பாட்ஜ் எண், மூலப்பொருட்கள் விபரம், எந்த தேதி வரை பயன்படுத்த உகந்தது போன்ற விபரங்கள் அச்சிடப்படாவிட்டாலும்,நீதிமன்றத்தில் வழக்கு தொடர்ந்து, ஆறு மாதம் சிறைத்தண்டனையும், ஆயிரம் ரூபாய் அபராதமும் விதிக்க வழிவகை செய்யப்பட்டிருந்தது.

புதிய சட்டத்தில், குற்றத்தின் தன்மைக்கேற்ப தண்டனை பலவாறு பிரிக்கப்பட்டுள்ளது. லேபிளில் குறைபாடு இருந்தால், அபராதம் மட்டுமே விதிக்கப்படும். உணவில் கலப்படம் செய்யப்பட்டு, அது உயிருக்கு ஊறு விளைவிக்குமானால், உயர்ந்த பட்சமாக, ஆயுள் தண்டனை வரை உண்டு.

கலந்துரையாடல் குறித்த தினமலர் நாளிதழ் செய்தி.

சட்டத்தின் சாராம்சங்களை எடுத்துரைத்ததுடன், தவறு செய்யாதவர்கள் இந்த சட்டத்தைக் கண்டு கலங்கிட வேண்டாமென்பதையும் விரிவாய் எடுத்துரைத்தோம். கடும் லாபம் ஒன்றையே குறிக்கோளாய் கொண்டு,கலப்படம் செய்தால், கண்டிப்பாய்க் காப்புதான் என்றும் சொன்னோம்.

கலந்துரையாடல் குறித்த தினகரன் நாளிதழ் செய்தி.

வியாபாரிகள் சங்கத்தின் பிரதிநிதிகள் பலர் கலந்துகொண்டு, கருத்துக்களைப் பகிர்ந்தனர். அவர்களின் சந்தேகங்களுக்கும் விடையளித்தோம். முடிவில், தெளிந்த மனதுடன், தெளிவாய் வியாபாரம் செய்வதாய் உறுதிபூண்டு சென்றனர்.

டிஸ்கி: சட்டத்தை அமல்படுத்துவது மட்டுமல்ல, அதனை அனைவரும் அறிந்துகொள்ள வைப்பதும் எங்கள் கடமைதான்.

மினி பதிவர் சந்திப்பு

2011-11-11T07:31:00.006+05:30

இந்த படத்திற்கும் பதிவர் சந்திப்பிற்கும் என்ன சம்பந்தம்? கடைசியில் பார்ப்போமா!

கடந்த வாரம், வலையுலக நண்பர் ”துபாய் ராஜா”, தன் சொந்த மண்ணில், சொர்க்கத்தின் திறப்பு விழா ஒன்று நடத்தினார். தற்போது அவர் சிங்கப்பூரில், மின் பொறியாளராகப் பணிபுரிந்து வருகிறார். சொந்த மண்ணில் (நெல்லைக்கு அருகில் விக்கிரமசிங்கபுரம்)வீடு கட்டி, நடத்திய கிரஹப்பிரவேசத்திற்கு, பதிவுலக சொந்தங்கள் அனைவரையும் அவர் ராஜசபையில் அழைத்திருந்தார்.

யானைக்குட்டி,கருவாலி,அஞ்சாநெஞ்சன்

அன்றுதான், நான் மாநகராட்சிப்பணியிலிருந்து பணிமாற்றம் செய்யப்பட்டு, உணவுப்பாதுகாப்பு துறையில், உணவு பாதுகாப்பு அலுவலராகச் பொறுப்பெடுத்துக்கொண்ட நாளென்பதால், நான், சகோதரிகள் கௌசல்யா மற்றும் ரூஃபினா ஆகியோருடன் சென்று நிகழ்வில் கலந்து கொள்ள போட்ட பிளான் டமால்.

வெடிவால்,அஞ்சாநெஞ்சன்,மனதோடுமட்டும்,உணவு உலகம்,
என்றும் அன்புடன்,நாய்குட்டி மனசு,ராஜசபை

நிகழ்ச்சிக்குத்தான் செல்ல முடியவில்லை, பதிவர் சந்திப்பு ஒன்றாவது ஏற்பாடு செய்யக்கூடாதா?-இது சகோதரி ரூஃபினாவின் கேள்வியல்ல, அன்புக் கட்டளை. அழைத்தேன்- ராஜாவை. அவரும் வருவதாக, அன்புடன் ஏற்றுக்கொண்டார். வியாழன் மாலை நெல்லையில் சந்திப்பதென்று முடிவானது. இடம்: ஜன்னத் ஹோட்டல்தான்.

நண்பர் காளிமுத்து,கருவாலி,வெடிவால்,அஞ்சாநெஞ்சன்,உணவு உலகம்

யானைக்குட்டி ஞானேந்திரனிடம் சொன்னதுதான் தாமதம், அனைவர் பதிவிலும் சென்று, பதிவர் சந்திப்பிற்கு பல விளம்பரம் போட்டுவிட்டார். குழந்தை மனசு அவருக்கு,கடைசியில் இருக்கு பாருங்க,அவர் படம்.

நண்பர் காளிமுத்து,கருவாலி,வெடிவால்,அஞ்சாநெஞ்சன்,மிரட்டும்- மனதோடு மட்டும்,உணவு உலகம்

மினி பதிவர் சந்திப்பு, மாலை 5 மணிக்கெல்லாம் தொடங்கியது. அனைவருக்கும் அலைபேசியில்தான் அழைப்பு சென்றது. முதுபெரும் பதிவர் வடிவேல் சார் வந்து கலந்து கொண்டது, அனைவரையும் ஆச்சரியத்தில் ஆழ்த்தியது. ராஜா தன் துணையோடு வந்து கலந்து கொண்டார். பரஸ்பர அறிமுகத்திற்குப் பின், பதிவுலகம் சார்ந்த விவாதங்கள் தொடர்ந்தன. கருவாலி ராமலிங்கம், தன் கடமையை முடித்துவிட்டு, கடைசியில் வந்து கலந்து கொண்டார். பதிவர்கள் தம் வலைப்பூவிற்கு பெயர் வைத்த காரணங்கள் பகிர்ந்து கொண்டனர். அதன் விபரங்கள் பார்க்க: நெல்லையில் ஒரு மினி பதிவர் சந்திப்பு.

ஆமா, யானைக்குட்டியேதான்,
ஆனா மேல உள்ள படத்தைப்போல மனசு.

சுவாமி திவானந்தாவைப் பற்றி தெரியாத நெல்லைப்பதிவர்கள் நம் வட்டத்தில் இருக்க முடியாது. முதல் பதிவர் சந்திப்பிற்கு, திரைக்குப் பின்னால் நின்று தோள் கொடுத்தவர். அடுத்தடுத்த மினி பதிவர் சந்திப்பிற்கெல்லாம் அடைக்கலம்- அவரது ஜன்னத் ஹோட்டல்தான். என் இனிய நண்பர். பல சமூக சேவைகளைச் சத்தம் இன்றி செய்து வருபவர். அவர் வந்து அமர்ந்தவுடன், அனைவர் முகத்திலும் ஆயிரம் வாட்ஸ் பிரகாசம் தெரியும். அந்தளவிற்கு, சிரிக்கச் சிரிக்கப் பேசுபவர். அவரும் அன்று, பிஸினஸில் பிஸியாக இருந்ததால்,லேட்டாக வந்து அமர்ந்தார்.

செவ்வாயன்று, மும்பை சென்ற அஞ்சாநெஞ்சன் ஜோதிராஜ்-கௌசல்யா தம்பதியினர், அவர்கள் சென்ற வேலையை முடித்துவிட்டு, இந்த மினி பதிவர் சந்திப்பிற்காக, ப்ளைட் பிடித்து அவசர அவசரமாக நெல்லை திரும்பினர். அஞ்சாநெஞ்சனுக்கு மட்டும் சற்றே ஆதங்கம். 'மனதோடு மட்டும்' கௌசல்யாவிற்கு வந்த அழைப்பு, தமக்கு வரவில்லையே என்று! நாங்கள் இருவரையும் ஒருவராகப் பார்ப்பதால், ஒரு அழைப்பு செய்தி வந்துள்ளது என்று அவரை சமாதானப்படுத்தி அழைத்து அமரவைத்தோம்.

ராஜாவின் துணைவியாரின் பொறுமை அனைவரையும் ஆச்சரியத்தில் ஆழ்த்தியது. ஏனெனில், பதிவுலகம் பற்றி சற்றும் அறியாத வீட்டுத்தலைவி அவர். எனினும் தன் துணைவருக்காக, புன்னகையுடன்,அத்தனை விவாதங்களையும் பொறுமையுடன் கேட்டுக் கொண்டிருந்தார்.

என் நண்பர் காளிமுத்து எப்போதும்போல், ஜன்னத் ஹோட்டலில் என்னைப்பார்க்க வந்து, நடக்கும் கூட்டம் பற்றி புரியாமல், சிறிது நேரம் அமர்ந்து சென்றார்.
இனிய சந்திப்பு, எண்ணங்களின் பரிமாற்றம், உள்ளங்களில் உவகை பூத்திட, மீண்டும் ஒரு இனிய வேளையில், இனியும் சந்திப்போமென்று முடிந்தது, அன்றைய சந்திப்பு.
அப்புறம் அந்த முதல் படம், அடுத்த நெல்லை பதிவர் சந்திப்பில் கலந்து கொள்ளும் சகோதரிகளுக்கெல்லாம்,அடுத்த வாரம் அயல்நாட்டிற்கு சுற்றுப்பயணம் செல்லும் கௌசல்யா -ஜோதிராஜ் தம்பதியினர்,அன்பளிப்பாகக் கொடுப்பதாக சொல்லியிருக்கும் ’மினி’ மணி பர்ஸ். WISH YOU HAPPY JOURNEY.

அப்பளம் தந்தது ஆறு மாதம் சிறை.

2011-11-08T05:48:00.001+05:30

அப்பளம் நம் நாட்டில் அன்றாடம் அனைவர் வீட்டிலும் பயன்படுத்தும் ஒரு உணவுப்பொருள். எப்படி விடுவார்கள் அதில் மட்டும் கலப்படம் செய்யாமல்? பார்ப்போமா!

மூன்று வருடங்களுகு முன் ஒரு நாள், தச்சநல்லூர் பகுதியில், ஆய்விற்குச் சென்றோம். அங்குள்ள பலசரக்குக் கடையில், அடுக்கடுக்காய் அப்பளக் கட்டுகள். எடுத்துப் பார்த்தால், அதில் அச்சிடப்படவேண்டிய விபரங்கள் பல இல்லை.

எந்த ஒரு உணவுப்பொருளை பாக்கட்டில் அடைத்து விற்பனை செய்வதென்றாலும், அந்த பாக்கட்கள் மீது, அந்த உணவுப்பொருளின் பெயர், தயாரிப்பு தேதி, என்னென்ன மூலப்பொருட்கள் பயன்படுத்தி தயாரிக்கப்பட்டது, எந்த தேதி வரை அந்த உணவுப்பொருள் பயன்படுத்த உகந்தது, அது சைவ வகை உணவா அல்லது அசைவ வகை உணவா என்பதற்கான குறியீடு, தயாரிப்பாளரின் முழு விலாசம், பாட்ஜ் எண் போன்ற விபரங்கள் கண்டிப்பாய் அச்சிடப்பட்டிருக்க வேண்டும்.

நாங்கள் அந்த கடையில் பார்த்த அப்பள பாக்கட்கள் மீது, அது அப்பளம்தான் என்றே குறிப்பிடப்படவில்லை. தயாரிப்பு தேதி இல்லை, எந்த தேதிவரை பயன்படுத்தலாம் என்ற விபரம் இல்லை, பாட்ஜ் எண் இல்லை, சைவ வகை குறியீடு இல்லை, இப்படி இல்லை, இல்லை ஏராளம். சரி, இந்த அப்பள பாக்கட்டை இன்று மாதிரி எடுத்து அனுப்பிட வேண்டியதுதான் என்று முடிவு செய்து பகுப்பாய்விற்கு அனுப்பி வைத்தால், உணவு கலப்பட தடைச்சட்டத்தின் ஒன்பது பிரிவுகளில், வழக்கு தொடரலாமென்று, பகுப்பாய்வு முடிவு வந்தது.

தயாரிப்பாளர் விலாசம் பாளையங்கோட்டை என்றிருந்ததால், அவரையும் வழக்கில் ரொம்ப ஈஸியா சேர்த்திடலாமென்று எண்ணியிருந்தேன். தேடிச்சென்றபோதுதான் தெரிந்தது, அவர் அந்த பாக்கட்டில் கண்ட விலாசத்தில் தொழிலே செய்யவில்லையென்று. அந்த பகுதி மக்களிடம் விசாரித்தால், அவர்கள் அப்பளத் தயாரிப்பாளரைக் காட்டிக்கொடுக்க மனமின்றி, எங்கு இடம் மாறி சென்றுவிட்டாரென்றே தெரியாது என்று கூறிவிட்டனர். மிக நீண்ட விசாரணைக்குப்பின், அவர் பாளையங்கோட்டையில் மற்றொரு பகுதியில், அப்பளம் தயாரித்து வருவதைக்கண்டுபிடித்தோம்.

கடையின் விற்பனையாளர், உரிமையாளர் மற்றும் தயாரிப்பாளரை, சட்டத்தின் முன் கொண்டு நிறுத்தினோம்.எதிர் தரப்பிலிருந்து, கற்றறிந்த வழக்கறிஞர் இருவர்,கேள்விக்கனைகளால் என்னைத் துளைத்தெடுத்தனர். அரசு வழக்கறிஞர் திருமதி.ஜெயஜீவா தன் வாதத் திறமையால், அடுக்கடுக்காய் விவரங்களை எடுத்துரைத்தார்.

திருநெல்வேலி நீதித்துறை நடுவர் மன்றம் எண்.4ல். எதிரிகள் மூவருக்கும், தலா ஆறு மாதம் மெய்க்காவல் தண்டனையும், ஆயிரம் ரூபாய் அபராதமும் விதித்து தீர்ப்பளிக்கப்பட்டது.

மழைக்கால நோய் தடுக்க மருத்துவ முகாம்.

2011-11-01T05:35:00.001+05:30

கோடை வெயில் கொளுத்திய நெல்லையில், குளிர் மழையும் வந்தது. கூடவே, குளிர்கால நோய்களையும் கூட்டி வந்தது. தும்மல், இருமல், ஜலதோசத்தில் தொடங்கி, சகல நோய்களும் பவனி வந்தாச்சு. முன்னெச்சரிக்கை நடவடிக்கைகள், முழு வீச்சில் செய்தாலும், இயற்கையை வெல்ல, நம்மால் முடியுமோ!

கல்லூரி மாணவர்கள் சிலர், கருத்தொருமித்து களமிறங்கினால் என்னாகும்? நான் கண்ட கட்சிகள் சில, உங்களின் பார்வைக்கு. ஜப்பானைச் சார்ந்த “ஹேப்பி சயன்ஸ்” அமைப்பு சமூக அக்கறையுடன் சில காரியங்களைச் செய்து வருகிறது. அது பற்றி எனது இந்தப் பதிவில் குறிப்பிட்டுள்ளேன். அந்த அமைப்பின் தமிழகப்பிரதிநிதிகளாய், கல்லூரி மாணவர் பட்டாளம் ஒன்று செயல்பட்டு வருகிறது.

முகாமில் சேவை புரிந்த மருத்துவர்களுக்கு மரியாதை.
வலமிருந்து: விஷ்ணு,மோரி,முகமது ராஜா(நிகழ்ச்சி நாயகர்கள்)

அவர்களின் ஒரு மாத கால உழைப்பில் உருவானதுதான், மேலே நோட்டிஸில் கண்ட மருத்துவ முகாம். நெல்லையில் உள்ள ஒரு பின் தங்கிய பகுதியினைக் கண்டறிந்தனர். கிருஷ்ணப்பேரி எனும் அந்தப் பகுதியில், விவசாயம் சார்ந்த பணியினை மேற்கொள்ளும் உழைக்கும் மக்கள் குடியிருக்கின்றனர். ஒரு மாத காலம், அந்தப் பகுதியில் கணக்கெடுப்பு நடத்தி, அந்த அடித்தட்டு மக்களின் அடிப்படைத் தேவை என்ன என்பதை அறிந்து கொண்டனர்.

மருத்துவ முகாம்

அடுத்து, ஹேப்பி சயன்ஸ் அமைப்பின், இந்திய மேலாளர் திரு. மோரியுடன் பேசி, அங்கு ஒரு மருத்துவ முகாம் நடத்திட ஏற்பாடுகள் செய்தனர். நெல்லையின் பிரபல மருத்துவர்கள் திருமதி.பாக்கியம்பார்வதி,ஸ்வர்ணகமலா(பெண்கள்மருத்துவம்), திருவாளர்கள்.பரமசிவன்(சித்த மருத்துவம்),சார்லஸ் பிரேம்குமார்(பல் மருத்துவம்),முகம்மது ஈஸாக்(பொது மருத்துவம்) ஆகியோர் முகாமில் இலவசமாக சிகிச்சை வழங்க முன் வந்தனர்.

சுழற்கழக ராமலிங்கத்திற்கு பாராட்டு சான்று.

காலை பத்து மணிக்குத்துவங்கிய மருத்துவ முகாமில், அப்பகுதி மக்கள் முழுமையாகக் கலந்து கொண்டு பயன்பெற்றனர். மருந்து, மாத்திரைகளும் இலவசமாக வழங்கப்பட்டது.அதற்கான செலவையும் அந்த இளைஞர்களே ஏற்றுக்கொண்டனர்.

இத்துடன் முடித்துக் கொண்டால் நன்றாக இருக்குமா? என்று நினைத்தார்கள் போலும். அன்று மாலையிலேயே, அந்த பகுதியில் ஒரு சமூக சேவை நிகழ்ச்சி ஒன்றையும் நடத்திட விரிவான ஏற்பாடுகள் செய்திருந்தனர்.

அப்பகுதியிலுள்ள இரு மாற்றுத்திறனாளிகளுக்கு, கையால் ஓட்டும் மூன்று சக்கர சைக்கிள் தேவைப்பட்டது. அதனை, சகோதரி மனதோடு மட்டும்... கௌசல்யாவின் "EAST TRUST", இலவசமாய்த்தர இசைவு தந்தது.

ஹேப்பி சயன்ஸ் அமைப்பு,அந்தப்பகுதியில் வசிக்கும் அனைத்து பள்ளிக்குழந்தைகளுக்கும், புத்தகப்பை+நோட்டுகள் வழங்க முன்வந்தது.ஏழை மகளிர் இருவருக்கு தையல் மெஷின்கள் வழங்கவும் மனமுவந்தது.சுழற்கழகமும் இந்நிகழ்ச்சியில் சுறு சுறுப்பான சேவை செய்தது. சுழற்கழகம் பற்றி சொல்லும்போது, திரு.ராமலிங்கம் சார் பற்றி சொல்லாமல் இருக்க முடியாது. அப்படி ஒவ்வொரு சுழற்கழக சேவையிலும் திரு.ராமலிங்கம் சாரின் பங்கு இருக்கும். இத்தனை சேவைகளுக்கும் வித்திடும் அவர், ஒரு அறுபது வயது இளைஞர். இந்த வயதிலும் அத்தனை சுறுசுறுப்பு.

தையல் மெஷின்கள் வழங்குதல்

முகாமில் இலவச சேவை செய்த மருத்துவர்களுக்கும், பங்கு பெற்றோருக்கும் பாராட்டுச்சான்றிதழ் வழங்கி கௌரவித்தனர். கல்லூரி மாணவர்களால், சமுதாய சேவையும் செய்ய முடியுமென்று உணரவைத்த நிகழ்வு அது. விஷ்ணு மற்றும் முகமது ராஜா என்ற இரு இளைஞர்களின் ஈடு இணையற்ற சேவையுள்ளம் இந்த சமூக சேவையில் எதிரொலித்தது.

ஈஸ்ட் டிரஸ்ட் ஜோதிராஜிற்கு பாராட்டு சான்று

மழைக்கால முன்னெச்சரிக்கைகள்:

சூடான உணவுப் பொருள்களையே உண்ண வேண்டும்.
பருகுவதற்கு கொதிக்கவைத்து ஆறிய நீரையே பயன்படுத்த வேண்டும்.
முதல் நாளோ, நான்கு மணி நேரத்திற்கு முன்போ தயாரித்து மீதமான உணவை மீண்டும் பயன்படுத்தாதீர்கள். தேவைக்கேற்ப மட்டும் உணவு தயாரியுங்கள்.

உணவுப் பொருள்கள் உள்ள பாத்திரங்களை எப்போதும் மூடியே வைத்திருங்கள்.
உணவுப் பொருள் வைத்த பாத்திரங்களை, சோப்பு மற்றும் சுடு நீரினால் சுத்தமாகக் கழுவி உலர வைக்க வேண்டும்.

உணவு உலகம் சங்கரலிங்கத்திற்கு நற்சான்று

வீட்டின் தரைகளை, தினம் ஒரு முறையேனும் கிருமி நாசினி கலந்த நீரினால் சுத்தமாகத் துடைத்திடுங்கள்.
வீட்டின் தரை எப்போதும் சுத்தமாக உலர்ந்து இருக்குமாறு பார்த்துக்கொள்ளுங்கள்.
மாலை ஆறு மணி முதல் ஏழு மணி வரை, வெளியிலிருக்கும் கொசுக்கள் வீட்டிற்குள் படையெடுக்கும் காலமாதலால், வீட்டின் கதவு மற்றும் ஜன்னல்களை மூடி வையுங்கள்.

வீட்டின் மேல்நிலை நீர்த்தேக்கத் தொட்டிகள், நீரில் வாழும் தாவரங்கள் வைத்திருக்கும் பாட்டில்கள், குளிர்பதனப்பெட்டியின் நீர் வெளியேறும் பைப் லைன் போன்றவற்றில், கொசுக்கள் உற்பத்தியாவதைத் தடுக்க, வாரம் ஒரு முறை அதிலுள்ள நீரை உலர வைத்து கழுவிடுங்கள்.
வீட்டின் சுற்றுப்புறங்களில், பயனற்ற உரல், டயர்கள், சிரட்டை, தகர டப்பாக்கள் இருந்தால், அவற்றில் தேங்கும் நீரில் கொசுக்கள் உற்பத்தியாகும். எனவே, அவற்றில் நீர் தேங்காதவாறு அப்புறப்படுத்தி விடுங்கள்.

சாரல்: சேவைகள் தொடரத்தொடர, நானும் தொடர்கிறேன் . . .

காந்தி ஜெயந்தியில் கன்னியாகுமரியில் கண்ட ஒளி.

2011-10-28T05:21:00.000+05:30

கடல்வழிப்பயணத்தினை முடித்துக்கொண்டு,முற்பகல் 11.30 மணியளவில், காந்தி மண்டபத்தை வந்தடைந்தோம். கன்னியாகுமரி மாவட்ட நிர்வாகம் சார்பில், காந்தி ஜெயந்தி விழா ஏற்பாடுகள் விமரிசையாக செய்யப்பட்டிருந்தன.

அக்டோபர் 2 ஒருநாள் மட்டும், நண்பகல் பன்னிரெண்டு மணிக்கு, அஸ்தி கலசம் மேல் சூரிய ஒளி விழும் வண்ணம் காந்தி மண்டபத்தின் மேற்கூறையை வளைவாக அமைத்து, அதில் ஒரு சிறு துவாரமும் அமைத்துள்ளனர். குமரி அனந்தன் உள்ளிட்ட சில பிரமுகர்கள் வந்திருந்தனர். மண்டபத்தின் ஒரு பக்கத்தில், ராட்டையில் இரு பெண்டிர் ராட்டையில் நூல் நூற்று அண்ணலை நினைவு கூர்ந்து கொண்டிருந்தனர்.

படத்தைக் கூர்ந்து கவனித்தால், மேலிருந்து சூரிய ஒளி
அஸ்தி கலசத்தின் மீது விழுவது தெரியும்.

சரியாக 11.50க்கெல்லாம், மவட்ட ஆட்சித்தலைவர் மண்டபத்திற்கு வந்து சேர்ந்தார். ‘ரகுபதி ராகவ ராஜாராம்’ பாடலை முதியவர் ஒருவர் பாட, அங்கிருந்த அனைவரும் பின் தொடர்ந்தனர். சூரிய ஒளி, சரியாக நண்பகல் பன்னிரெண்டு மணிக்கு, அஸ்திக்கலசம் மீது விழுகிறது. அதை அனைவரும் கண்டு களித்திட,அஸ்திக்கலசம் அருகிலிருந்து பத்தியைப் பொறுத்தி, புகை மூலம் சூரிய ஒளி தெரிந்திடவும், ஒரு சிகப்பு பட்டுத்துணியினை ஒளிக்கெதிரே, பிடித்தும் காட்டுகின்றனர். கீழே, என் மகள் எடுத்த செல் படத்தில், பட்டுத்துணி மீது விழும் சூரிய ஒளியையும், பிண்ணனியில், காந்தி குல்லாவுடன் வீற்றிருக்கும், சில தியாகிகளையும் பார்க்கலாம்.

அஸ்திக் கலசத்தின் மீது விழும் சூரிய ஒளி.

அந்த கண் கொள்ளாக் காட்சியின் இறுதியில், கவிதை, கட்டுரை போட்டிகளில் வென்ற மாணவ மாணவியருக்கு பரிசுகள் வழங்கும் நிகழ்சியும் நடைபெற்றது. சிறிது நேரம், கேந்திரத்தில் ஓய்வு. பின்னர், மாலை வேளை, கடற்கரை வந்தோம். ஆர்ப்பரிக்கும் அலையைக் கண்டு ரசித்தோம். மொத்தத்தில், அன்றைய ஞாயிறுப்பொழுது, உடலிலும், மனதிலும் உற்சாகம் பிறக்க வழி வகுத்தது.

முதுமையை மதிப்போம்- மருமகனே மகனான்.

2011-10-21T05:19:00.000+05:30

டிஸ்கி: இது கடந்த வருடம், எனது மும்பை பயணத்தின்போது ஏற்பட்ட அனுபவம். மீள் பதிவு. தேர்தல் பணி-செல்கிறேன்.

பத்து நாட்களுக்கு முன் பம்பாய் போனேன். என்னுடன் எனது மூத்த சகோதரரும் வந்திருந்தார். இளைய சகோதரரின் மகளுக்கு வளைகாப்பு. நாகர்கோவிலிலிருந்து வந்த ரயிலில் நெல்லையில் ஏறியதும், எடுத்துச் சென்ற உடமைகளை சீட்டிற்கு அடியில், அடுக்கி வைத்து நிமிர்ந்தால், எதிர்த்த சீட்டில் பல்லுப்போன பாட்டியொன்று பாங்காய் அமர்ந்திருந்தாள். அவருக்கருகில் நாற்பதுகளில் ஒரு நளின சகோதாரி. அத்தனை நளினமாய், பாட்டியின் கேள்விகளுக்கு பதில் கூறி வந்தார். இருவரும் பேசுகையில் தெரிந்து கொண்டோம், இவருக்கவர் உறவில்லையென்பதை.

                                  நெல்லையின் எல்லைகூட தாண்டவில்லை. எங்களுக்குப் பின்பக்க இருக்கையிலிருந்து சுடச்சுட காபி வந்தது. எடுத்து வந்து தந்தது பாட்டியின் மைந்தனாயிருக்க வேண்டும். அறுபதில் ஐந்தைத் தொலைத்திருந்தார் யோசனையுடன் வாங்கி அருந்திய பாட்டியிடம் சந்தோசமில்லை! இரண்டு மணிக்கொரு முறை, இன்முகத்துடன் ஏதேனும் ஒன்றை பாட்டியிடம் கொடுப்பதும், அதை பாட்டி பாதி மனதுடன் வாங்கி உண்பதுமாய்ப் போய்க்கொண்டிருந்த பயணத்தில், பாட்டி ஏதோ முனுமுனுப்பது மட்டும் காதில் விழுந்தது.
                           பிற்பகல் வந்தது. பாட்டிக்கு பாங்காய் உணவும் வந்தது. வந்து கொடுத்ததும் அவர்தான். இப்படியோர் மகனைப் பெற்றெடுக்க, எத்தனை ஆண்டுகள் தவமிருந்தீர்? மெல்லக் கொக்கியிட்டது என் கேள்வி!
                                பாட்டியின் முகத்தில் பல்லாயிரம் பாவங்கள். இவரு எம்மருமகன். எம்மகா, அடுத்த பக்கமிருக்கா. அங்கிருந்துதான் எல்லாம் வருது. ஆனா! அவ வந்து, முகம் குடுத்து என்ட பேசமாட்டா. பணத்திமிர் . . . . . என்று இன்னும் பல. வந்து விழுந்த வார்த்தைகளின் வேகத்திற்கு, வறண்டுவிட்டது என் நாக்கு. அத்தனையும் சோகம்.
                            அடுத்த நாளும் வந்தது. அத்தனை முறையும் உணவும் வந்தது. ஆனால், பாட்டியின் மகள் மட்டும் வந்து எட்டிப்பார்க்கக் கூட இல்லை. பாட்டியின் முனகலும் நிற்கவில்லை.
                              பாட்டி! பாசமில்லாமலா பாங்காய் உணவு வருது என்று சொன்ன எங்கள் வார்த்தைகள் எதுவும் எடுபடவில்லை. பாவம், பாசத்திற்கு ஏங்கும் பாட்டி.
                         என்னதான் மனஸ்தாபம் இருந்தாலும், மகள் வந்து ஒரு முறையேனும் அந்தத் தாயிடம் பேசியிருக்கலாம். பேசாததால், மருமகனே, அத்தாய்க்கு மகனானான்.
                          பாட்டி இறங்குமிடத்திற்கு முந்திய ரயில் நிலையத்தில், அருகிலிருந்த அந்த நளின சகோதரி இறங்கும்போது அவரை ஆசிர்வதித்து அனுப்பவும் அந்த பாட்டி மறக்கவில்லை.
                                எத்தனைதான் வீட்டில் மனக்குறைகள் இருந்தாலும், ரயிலில் ஏறும் முன், அதை மூட்டை கட்டியிருக்க வேண்டும். அத்தனைபேர் மத்தியிலும், அதை காட்டியிருக்கக் கூடாது.
                                   எத்தனை நாள் சுமந்து பெற்றாளோ! என்றென்றும் முதுமையைப் போற்றுவோம்.

மும்பையில், ரயிலிலிருந்து இறங்கும்வரை, என் சோகம் மட்டும் மாறவில்லை. இன்றைக்கும் என் மனதில் பாட்டியின் முகம் மட்டும் அழியவில்லை.

விவேகானந்தா கேந்திரத்தில் ஒரு நாள்.

2011-10-17T04:52:00.002+05:30

விவேகானந்தர் கேந்திரத்திலுள்ள விவேகானந்தர் சிலை.

முதல் பகுதி: வார இறுதியில் ஒரு டே-அவுட்.

முக்கடலும் சங்கமிக்கும் கன்னியாகுமரியில்,கடல் நடுவிலிருந்த பாறை மீது, சுவாமி விவேகானந்தர் 1892ல், டிசம்பர்-25,26&27 தேதிகளில், தியானத்தில் இருந்துள்ளார்.

ஒளிமயமான இந்தியாவை உருவாக்கிட வேண்டுமென்ற உத்வேகம், அவருள் பிறந்தது இந்த இடத்தில்தான். அந்த இடத்தில், 1970ல் சுவாமி விவேகானந்தருக்கு நினைவிடம் அமைக்கப்பட்டது. அதற்கு அயராது உழைத்தவர், மானனீய ஏக்னாத்ஜி ரானடே என்பவர்.

நினைவிடம் அமைத்தது மட்டுமே அவருக்கு மனநிறைவைத் தரவில்லை. விவேகானந்தரின் கொள்கைகளைப் பரப்பி, ஒளிமயமான இந்தியாவை உருவாக்கிட 1971ல் கன்னியாகுமரியில் அமைக்கப்பட்டதுதான் விவேகானந்தா கேந்திரம். கன்னியாகுமரியினை தலைமை இடமாகக்கொண்டு, இந்தியா முழுவதும் 250 கிளைகளுடன் இயங்கி வருகிறது,இந்த கேந்திரம். இதில் ஆயுள் கால உறுப்பினர்கள், முழுநேர பணியாளர்கள் எனப் பலரும் பங்கு கொண்டு, பல்வேறு முகாம்களை நடத்தி, யோகா, கிராமப்புற மேலாண்மை, கல்வி கற்பித்தல், இளைஞர் நலம் மற்றும் இளம் பெண்டிர் முன்னேற்றம் ஆகியவற்றில் உதவி வருகின்றனர்.

கேந்திர வளாகத்தில்-ஏக்நாத்ஜி சாமாதி.

விவேகானந்தர் நினைவிடமும், கேந்திரமும் அமைந்திட அயராது உழைத்திட்ட, ஏக்நாத்ஜியின் சமாதி, கேந்திரத்தின் உள்ளே நிறுவப்பட்டுள்ள விவேகானந்தரின் முழு உருவ சிலைக்கு எதிரிலேயே இருக்கின்றது.

வள்ளுவர் சிலை - போட்டிலிருந்து

விவேகானந்தர் பாறையிலுள்ள நினைவிடத்தில், விவேகானந்தரின் முழு உருவ சிலை காண்பவர் கண்களைக் கொள்ளை கொள்கின்றது. அங்குள்ள தியான மண்டபத்தில், சிறிது நேரம் கண்களை மூடிக்கொண்டு அமர்ந்திருந்தால், மனதில் அமைதி வந்து குடி கொள்கிறது. அருகிலேயே, அடுத்த பாறை மீது, வான்புகழ் வள்ளுவனுக்கு, வடிவாய் சிலையொன்று அமைக்கப்பட்டுள்ளது. கடல் சீற்றம் காரணமாக, கப்பல் போக்குவரத்து இல்லையென்று சொல்லிவிட்டனர்.

நாங்கள் கன்னியாகுமரி சென்ற நாளின் மற்றொரு சிறப்பு, அன்று காந்தி ஜெயந்தி என்பதே. கடற்கரையிலுள்ள காந்தி மண்டபத்தில், சரியாக நண்பகல் பன்னிரெண்டு மணிக்கு, காந்திஜியின் அஸ்தி கலசம் வைத்த இடத்தில், சூரிய ஒளி விழும்.

இரவில் ஒளிரும் விவேகானந்தர் பாறை&வள்ளுவர் சிலை

தொடரும் . . . . . . .

வார இறுதியில் ஒரு டே-அவுட்.

2011-10-11T05:24:00.004+05:30

வாரம் முழுவதும் வேலை. வார இறுதியில் ஒரு டே- அவுட். அதிக வேலைப்பளு, உடலையும் , மனதையும் ஒரு சேர களைக்க வைத்த சனிக்கிழமை(01.10.11) மாலை. சட்டென்று எடுத்த முடிவில், திட்டமிடாப் பயணமாய் குடும்பத்துடன் கன்னியாகுமரி நோக்கி புறப்பட்டேன்.(பதிவர் விஜயன் மன்னிப்பாராக-இது திடீர் பயணமென்பதால், சொல்லவும்,சந்திக்கவும் இயவில்லை)

நெல்லை நண்பர் திரு.சங்கர் அவர்கள், விவேகானந்தா கேந்திரத்தில் தங்குவதற்கு வசதி செய்து கொடுத்தார். திரு.சங்கர் ஒரு இயற்கை விவசாயப் பிரியர். இவர் பற்றி ஒரு தனிப்பதிவே எழுதலாம். சொந்த ஊரில், இயற்கை உரமிட்டு, பயிர்களை வளர்ப்பதுடன், இயற்கை உரமிட்டு வளர்த்த புல்லை அளித்து, பல பசுக்களையும் பேணிக்காத்து வருகிறார்.

விவேகானந்தா கேந்திரத்தில் எங்க வீட்டு வாண்டு-ஸ்ரீ சரண்

மறுநாள் காலை, மனதிற்கு இதமாய், மலர்ந்திட்டது பொழுது. அதிகாலையில் எழும்பி, சூரியோதயம் காண, சுறுசுறுப்பாய்க் கிளம்பினோம். கேந்திரத்தின் உள்ளேயே, சூரியோதயம் காணத் தனி இடம் உள்ளது. நல்ல நடைப்பயிற்சியாயும் அமைந்தது. நடந்து போகும்போது, அந்த இயற்கை சூழலை ரசித்துச் சென்றோம். செல்லும் வழியிலேயே, மயில்களின் சரணாலயம், மனங்களைக் கவர்ந்தது.

அதிகாலை வேளை -ஆர்ப்பரிக்கும் கடலலை

சூர்யோதயத்தை காமிராவின் கண்களில் கவர்ந்து வந்து பகிர்ந்துள்ளேன். பார்த்து ரசியுங்கள். கேந்திரம் பற்றி இங்கு சில தகவல்களைப் பகிர்ந்துகொள்ள விழைகின்றேன். இயற்கை எழில் மாறா சூழலில், ஏறக்குறைய 150 ஏக்கரில் அமைந்துள்ளது இந்த கேந்திரம். நகரின் நடுவில்,கடலின் கரையில், வனங்கள் சூழ்ந்த குடியிருப்புகள், மன இறுக்கங்களைத் தளர்த்திடும்.

சூர்யோதய காலம்

மேகங்களின் பிண்ணனியில் சூரியன்

மஞ்சள் நிற கதிர்களுடன் மயக்கும் சூரியன்

கேந்திரத்தின் உள்ளேயே, மனதிற்கு மட்டுமல்ல, வயிற்றிற்கும் வகையாய் அளித்திட, நியாய விலை உணவகம் உண்டு. சூர்யோதயம் பார்த்து வந்து, சூடாய் ஒரு கப் காஃபி. சோம்பலெல்லாம் பறந்து போக, இதமாய் ஒரு குளியல். சுவையான காலை உணவருந்திவிட்டு, விவேகானந்தர் பாறைக்கு காலை நேரத்தில் ஒரு கடல்வழிப் பயணம்.

சிங்கத்தின் அருகே ஒரு தங்கம்

தொடரும் . . .

உள்ளாட்சி தேர்தலில் ஓட்டுப் போடலாம் வாங்க

2011-10-07T14:29:00.001+05:30

என்ன ஓட்டு போடலாமா?

எங்க போறம்? ஓட்டு சாவடிக்கு.

என்னெல்லாம் இருக்கும்? யாரெல்லாம் இருப்பாங்க?

தலைவர் தேர்தல் மற்றும் உறுப்பினர் தேர்தலுக்கு தலா கட்டுப்பாட்டு கருவி ஒன்றும், வாக்களிக்கும் கருவி ஒன்றும் இருக்குங்க.

இதுதாங்க கட்டுபாட்டுக் கருவி.

நான் காட்டுவது, கட்டுபாட்டு கருவியின் பின்னாலிருக்கும், On/Off சுவிட்ச்.

இதுதாங்க ஓட்டளிக்கும் கருவி.

ஒரு ஓட்டு சாவடிக்கு வெளியே, அந்த ஓட்டு சாவடியில் எந்தெந்த பகுதியில் வசிப்பவர்கள் வாக்களிக்கலாம் என்ற விபரம் அறிவிக்க பட்டிருக்கும். வெளியில் ஒரு காவல் துறை அலுவலர் பணியில் இருப்பார். ஆண் பெண் வாக்காளர்களுக்கு இரு தனித்தனி வரிசை அமைக்கப்பட்டிருக்கும்.

மாநகராட்சி மற்றும் நகராட்சிகளைப் பொறுத்தவரை, முந்திய தேர்தலில், நாம் உறுப்பினர்களைத் தேர்ந்தெடுப்போம். அவர்கள், தலைவரைத் தேர்ந்தெடுப்பார்கள். ஆனால், இம்முறை, ஒரே தேர்தலில், இரு முறை வாக்களிக்கப் போகிறோம். ஆம், ஒவ்வொரு வாக்காளரும், அவர்தம் பகுதிக்குரிய உறுப்பினரைத் தேர்ந்தெடுப்பதைப்போன்றே, தலைவரையும் ஓட்டு போட்டு நேரடியாகத் தேர்ந்தெடுக்கப்போகிறோம்.உள்ளே நுழைந்தவுடன், வாக்கு சாவடி தலைமை அலுவலர் ஒருவர் இருப்பார். முதலிலுள்ள வாக்குப்பதிவு அலுவலர், உங்கள் வாக்காளர் அடையாள அட்டை மற்றும் பூத் ஸ்லிப்பை சரி பார்த்து, வாக்காளர் பட்டியலில் உள்ள உங்கள் பெயரை சத்தமாக வாசிப்பார். அதை அங்கிருக்கும் அரசியல் கட்சிகளின் முகவர்கள் கேட்டு அவர்கள் கையிலிருக்கும், வாக்காளர் பட்டியலில் சரி பார்ப்பர். வாக்காளரை சரி பார்த்தவுடன், உங்கள் கையொப்பம் அல்லது விரல் ரேகையை, பதிவேட்டில் பெற்று கொண்டு, தலைவர் தேர்தலில் வாக்கிட, ஓட்டுப் போட ஸ்லிப் ஒன்றைக் கொடுத்து,ஓட்டு போட உங்களை அனுப்புவார். அதற்கடுத்து இருக்கும் அலுவலர்-2, உங்கள் இடது கை ஆட்காட்டி விரலில் நகத்தின் மீதும், விரலின் மீதும் படுமாறு, அழியாத மை இடுவார். அதனை அடுத்து இருக்கும் அலுவலர்-3, ஓட்டு ஸ்லிப்பை பெற்று கொண்டு,மேயர் தேர்தலுக்கான கட்டுப்பாட்டு இயந்திரத்தில் உள்ள வாக்களிக்க அனுமதிக்கும் பட்டனை அழுத்துவார்.

நீங்கள், வாக்களிக்கும் இயந்திரம் வைத்துள்ள பகுதி(VOTING COMPARTMENT)க்கு சென்று, உங்களுக்கு விருப்பப்படும் வேட்பாளர் பெயருக்கு எதிரில் இருக்கும் பட்டனை அழுத்தினால், பீப் ஒலியுடன், உங்கள் வாக்கு பதிவு செய்யப்படுவதை அறிந்து கொள்ளலாம்.நீங்கள் ஓட்டளித்த வேட்பாளர் பெயருக்கு எதிரில் உள்ள விளக்கு ஒளிரும். மீண்டும், நீங்கள் 3வது வாக்குப்பதிவு அலுவலரிடம் வந்து, உறுப்பினர் தேர்தலுக்கான பதிவேட்டில் உங்கள் பெயர் எழுதப்பட்டிருக்கும் இடத்தில் கையொப்பமிட்டு, அதற்கான ஓட்டு ஸ்லிப்பை பெற்றுக்கொண்டு, 4வது அலுவலரிடம் சென்றால், அவர் அந்த ஸ்லிப்பைப் பெற்றுகொண்டு, உறுப்பினர் தேர்தலுக்கான கட்டுப்பாட்டுக் கருவியில் ஓட்டளிக்க அனுமதிக்கும் பட்டனை அழுத்துவார். உறுப்பினர் தேர்தலுக்கான வாக்களிக்கும் இயந்திரம் வைத்துள்ள பகுதி(VOTING COMPARTMENT)க்கு சென்று, உங்களுக்கு விருப்பப்படும் வேட்பாளர் பெயருக்கு எதிரில் இருக்கும் பட்டனை அழுத்தினால், பீப் ஒலியுடன், உங்கள் வாக்கு பதிவு செய்யப்படுவதை அறிந்து கொள்ளலாம்.நீங்கள் ஓட்டளித்த வேட்பாளர் பெயருக்கு எதிரில் உள்ள விளக்கு ஒளிரும்.
ஜனநாக கடமையை முடித்த திருப்தியில், நீங்கள் வெளியே வாங்க.

இந்த தேர்தலில், பார்வையற்ற வாக்காளர்கள் வாக்களிக்க ஏதுவாக, வாக்கு பதிவு இயந்திரத்தில், ஓட்டு போடும் பட்டன்களுக்கு அருகில், பிரைலி எழுத்துக்களையும் பொறிச்சிருக்காங்க.

இதையும் தெரிஞ்சுகோங்க:


என்னை போல ஒரு மண்டல அலுவலர்: திரு.சாகுல் ஹமீது.

அவரின் விளக்கங்கள் சில:

அது என்னாங்க 71?:

உங்கள் தொகுதியில் தேர்தலில் நிற்கும் எவருக்கும் உங்களுக்கு வாக்களிக்க விருப்பம் இல்லையா? ஓட்டு சாவடிக்குள் நுழைந்து, ஓட்டு போட ஸ்லிப் வாங்கிய பின்தான் இந்த எண்ணம் வருகிறதா? உங்களுக்குக்கான பிரிவுதான் 71. இந்த பிரிவின்படி, நான் யாருக்கும் வாக்களிக்க விரும்பவில்லை என தெரிவித்து,அதனை வாக்காளர் பதிவேட்டில் பதிவு செய்து, கையொப்பம் இட்டு வெளியேறலாம்.

ஆய்விற்கு உரிய ஓட்டுன்னா -அது என்னாங்க? :

ஏற்கனவே போடப்பட்ட ஓட்டு ஒன்று தவறாக போடப்பட்டது என வாக்காளர் ஒருவர் வாக்கு சாவடி தலைமை அலுவலர் முன் ஆஜராகி புகார் தெரிவித்தால், தலைமை அலுவலர் அவரை விசாரித்து அவரது அடையாளத்தில் திருப்தி பட்டால், அவருக்கு ஓட்டு சீட்டு ஒன்று கொடுத்து அதில் வாக்கிட அனுமதித்து, அந்த ஓட்டு சீட்டை தனிகவரில் போட்டு வாக்கு எண்ணும் மையத்திற்கு அனுப்பி வைப்பார்.

எதிர்க்கப்பட்ட ஓட்டுன்னா -அது என்னாங்க? :

வாக்காளர் ஒருவர் ஓட்டு போட வரும்போது, வாக்கு சாவடியில் இருக்கும் முகவர் எவரேனும் அவர் தவறான நபர் என்று வாதிட்டால், வாதிடும் முகவர் ரூபாய் பத்து செலுத்தி ஆட்சேபனை தெரிவிக்க வேண்டும். வாக்கு சாவடி தலைமை அலுவலர் அவரை விசாரித்து, அவர் தவறான நபர் என்று தெரியவந்தால், அவரை காவல் துறை வசம் ஒப்படைப்பார். அந்த நபர் சரியான நபர் என்று நிரூபிக்க பட்டால், அவரை வாக்களிக்க அனுமதிப்பார்.

டிஸ்கி-1: ஒரு வாக்காளராய், என்னவெல்லாம் செய்ய கூடாது?:

ஓட்டு போடும் கடமையை மறக்க கூடாது.
ஓட்டு போட, வேட்பாளர் ஏற்பாடு செய்யும் வாகனங்களில் ஓட்டு சாவடிக்கு வரக்கூடாது.
ஓட்டு போடும் போதோ, ஓட்டு போட்டு விட்டு வெளியே வரும்போதோ, எந்த சின்னத்தில் வாக்களித்தேன் என்று மற்றவர்கள் அறியும் வண்ணம் சொல்லக்கூடாது.

டிஸ்கி-2: இது இந்த தேர்தலுக்கு தக்க வகையில் திருத்தம் செய்யப்பட்ட ஒரு மீள் பதிவு.

பதிவர்களின் பரிணாம வளர்ச்சி-சண்டையிலா?சேவையிலா?

2011-10-04T05:52:00.000+05:30

பதிவுலகம் போகும் பாதை சரிதானா?

நாளொரு சண்டையும், பொழுதொரு பிரச்சனையும் அரசியல்வாதிகளுக்கு மட்டுமல்ல. நம் பதிவுலகிலும், உள்குத்துப்பதிவு, ஆபாசப் பதிவு,ஒருவருக்கு- அவர் விரும்பினாலும் விரும்பாவிட்டாலும் வளர்ச்சிக்கு வழிகாட்டுகிறேன் என்று சொல்லி ஓராயிரம் மெயில்கள், மாற்றுக்கருத்து பதிவு செய்தால், ஒடுக்கப்பார்ப்பது, ஒத்து வரவில்லையென்றால், வலைப்பூவை ஹாக் செய்வது

என்றிருந்த நிலைமை இன்று மாறி, பதிவர்கள் என்றாலே சமூக அக்கறை உள்ளவர்கள் என்று முத்திரை குத்திடும் காலம் மலர்ந்துள்ளது, மனதை மகிழ்வுறச் செய்கின்றது.

நான்தான், நானேதான் திரட்டிகளில் முதலிடம், நான் அவரை பின்னுக்குத் தள்ளி முன்னுக்கு வந்துவிட்டேன் என்று மார் தட்டுதல் மலையேறி, பல திரட்டிகளிலிருந்தும் பதிவை விலக்கியே வைத்திடும் திறமைசாலி(!)களும் பதிவுலகில் வலம் வரத்துவ்ங்கியுள்ளனர்.

நாட்டிற்கு நல்ல சேவை: மனதோடு மட்டும் சகோதரி கௌசல்யா அவரது கணவர் ஜோதிராஜ் ஆகியோர், EAST TRUST - என்ற பெயரில் சமூக சேவை அமைப்பு (ENVIRONMENTAL AND SOCIAL TRANSITION TRUST) ஒன்றைத் துவக்கி, அதன் மூலம், சமூக சேவைகள் செய்யத் தொடங்கியுள்ளனர்.இவர்கள் அந்த அமைப்பின் மூலம், முதன்முதலில் ஒரு ஏழைப்பெண்ணின் திருமணத்திற்கு, உடைகள் மற்றும் பாத்திரங்கள் வாங்கிப் பரிசளித்துள்ளனர்.
அத்துடன் நிற்கவில்லை அவர்களது சேவை. நெல்லையிலுள்ள அன்பு ஆசிரமத்தில் பயிலும் 145 மாணவ மாணவியருக்கு, அவர்தம் ஏழ்மை நிலைமையினை கருத்தில் கொண்டு, ரத்தப்பிரிவு மற்றும் ரத்தத்திலுள்ள ஹீமோகுளோபின் அளவு கண்டறியும் முகாமினை EAST ட்ரஸ்ட் மூலம் நடத்தினர்.ஏற்கனவே, இந்த ஆசிரமம் பற்றியும், அங்கு பதிவர்கள் செய்ய உத்தேசித்துள்ள சேவைகள் குறித்தும் இந்தப் பதிவில் குறிப்பிட்டுள்ளேன்.

பதிவர்கள் அறிமுகம்: உண்மையில், நான் பதிவுலகில் நுழைந்த புதிதில்,என்னை, என் வலைப்பூவைப் பதிவுலக நண்பர்களுக்கு இன்று ஒரு பதிவர் - விமர்சனம் - 1 மூலம் அறிமுகம் செய்து வைத்தவர் இந்த சகோதரிதான்.அவரை அவ்வாறு எழுத ஊக்குவித்தவர் ஜோதிராஜ். சுவாமி(!) திவானந்தா(நெல்லை வந்த நண்பர்களுக்கு இவரைத் தெரியும்), அவருக்குத் தெரிந்த மருத்துவத்துறை நண்பர் மூலம், முகாமிற்கான தொழில்நுட்ப வசதிகளை, குறைந்த செலவில் செய்து கொடுத்தார். யாரும் எதிர்பார்க்காத வண்ணம், முதல் நாள் நடந்த ’ஹேப்பி சயன்ஸ்’ கூட்டத்திற்கு, ஜப்பானிலிருந்து வந்திருந்த, அந்த அமைப்பின் இந்திய மேலாளர் மற்றும் பிரச்சாரகர் யோஷிஹிரோ மோரி, முகாமைத் துவக்கி வைக்க வருகை தந்தார். அவரை வரவைத்ததும் இளம் பதிவர் ஒருவரே. ஷாஜஹான் ஷெரிஃபை, நான் இந்தப் பதிவில் அறிமுகம் செய்துள்ளேன். ஓய்வு பெற்ற மாவட்டப் பதிவாளர் திரு. சிதம்பர பாண்டியன் முன்னிலை வகித்தார். சுழற்கழக நண்பர்களும் கலந்து கொண்டனர்.அந்த சேவை நிகழ்ச்சியில் நானும் கலந்துகொண்டேன் என்பதில் எனக்கு பெருமகிழ்ச்சியே.

சேவைகள் தொடரும்: சகோதரி கௌசல்யாவின் கணவர் திரு.ஜோதிராஜ் பற்றி இந்த இடத்தில் குறிப்பிட்டே தீர வேண்டும். அவரும் ஒரு பதிவரே. நேரமின்மை காரணமாக தற்போது பதிவுகள் எழுதுவதில்லை. பணம், பகட்டு, பத்து தலைமுறைக்கு சொத்து என்று அலைகின்ற மனிதர்கள் மத்தியிலே, எதை எந்த நேரத்தில் யாருக்கு செய்தால் நல்லதோ, அதை அவர்தம் இருப்பிடம் தேடிச் சென்று செய்வதில் மற்றவர்களுக்கு முன்னோடி.
இந்த தம்பதியரின் அடுத்த குறிக்கோள்: தண்ணீரின்றி மக்கள் தவிப்பதைத் தவிர்க்க, கருவேல முள் மரம் குறித்த விழிப்புணர்வு உருவாக்குதல், மழை நீர் சேகரிப்பை உற்சாகப்படுத்துதல், வேலையற்ற இளைஞர்களுக்கு சுய தொழில் புரிய வங்கிக் கடன் வசதி செய்து கொடுத்து, வாழ வழியும், தன்னம்பிக்கையும் ஏற்படுத்துதல், கால்கள் இழ்ந்த மாற்றுத்திறனாளிகளுக்கு இலகுரக செயற்கைக் கால்கள் பொறுத்துதல் என்று ஒரு நீண்ட பட்டியலே உள்ளது இவர்களிடத்தில். அவர்தம் சமூகப்பணி தொடரத் தொடர, நானும் தொடர்கிறேன், அவர்தம் வழித்தடத்தில். முடிந்தவரை பகிர்கின்றேன் உங்களுடன். நன்றி.

பத்திரிக்கை நறுக்குகள் உங்கள் பார்வைக்கு.

2011-09-27T05:22:00.002+05:30

ஒரு மாத காலம் உருப்படியா என்ன பண்ணினே? இதோ பத்திரிக்கைகள் பேசுகின்றன, பாருங்கள். ”உப்பிட்டவரை உள்ளளவும் நினை” என்ற பெரியோர் மொழிக்கேற்ப, உப்பில் கலப்படம் செய்தோர், தேடிக்கண்டு பிடிக்கப்பட்டு, நீதியின் முன் நிறுத்தப்பட்டுள்ளனர்.

கார்பைடு கல் கொண்டு பழுக்க வைக்கப்படுபவை மாம்பழங்கள் மட்டுமல்ல. அன்றாடம் நாம் பயன்படுத்தும் பல பழங்களும்தான்.

பிறந்த குழந்தை முதல் பெரியவர்கள் வரை அருந்தும் பாலிலும் கலப்படம். கொழுப்பு மற்றும் கொழுப்பு அல்லாத பிற சத்துக்கள்(வைட்டமின் மற்றும் மினரல்) என்று இரு வகைச் சத்துக்கள் பாலில் உள்ளது. பாலில் தண்ணீர் ஊற்றி, பாழ்படுத்துகின்றனர். நம்மால் முடிந்தது: சட்டத்தின் முன் நிறுத்தி உள்ளேன்.

கோடையைச் சமாளிக்க குளு குளு டிப்ஸ்:

டிஸ்கி:1-இது விக்கி உலகம் பார்த்து வந்த நோய் என்று கருதினால், கம்பெனி பொறுப்பல்ல.
டிஸ்கி-2:இவை ஆகஸ்ட் மாத கலெக்சன் மட்டுமே. இன்னும் அடுத்தடுத்து வந்து உங்களை எப்பவும் போல மிரட்டும். நன்றி.
டிஸ்கி-3:சாரி, உள்ளாட்சி தேர்தல் பணியில் பிசி. கொஞ்சம் பொறுத்துக்கோங்க.

நகர்ப்புறங்களில் பணியாற்ற உள்ள உணவு பாதுகாப்பு அலுவலர்கள் பட்டியல்

2011-09-21T21:01:00.003+05:30

அன்பு நண்பர்களே,

இன்று தமிழக அரசின் உணவு பாதுகாப்பு ஆணையர் வெளியிட்டுள்ள உத்தரவு ஒன்றின் மூலம், இதுவரை உள்ளாட்சிப்பகுதிகளில் பணியாற்றி வந்த உணவு ஆய்வாளர்கள், உணவு பாதுகாப்பு அலுவலர்கள் என்று அறிவிக்கப்பட்டு, அவர்கள் பணிபுரிய உள்ள நகரப்பகுதியின் விபரமும் வெளியிட்டுள்ளார்கள்.
அதன் விபரம்:

                              புதிய உத்வேகத்துடன் அனைவரும் பாதுகாப்பான உணவு நம் சமுதாயத்திற்குக் கிடைத்திட பாடுபடுவோம்.
      நகர்ப்புறம் மற்றும் கிராமப்புறங்களில் பணியாற்ற அனுமதிக்கப்பட்டுள்ள மொத்த உணவு பதுகாப்பு அலுவலர்கள் பட்டியல் இங்கே காணலாம்.
   இந்த உயர் நிலையை நாங்கள் அடைந்திட, உழைத்திட்ட அனைத்து அரசு சார் அலுவர்களுக்கும்,சங்கடங்கள் பல தாண்டி சாதனை படைத்திட்ட, சங்க பொறுப்பாளர்களுக்கும் மனமார்ந்த நன்றிகளைக் காணிக்கையாக்குகின்றேன்.

தங்கமே தங்கம்! ஹால்மார்க் முத்திரையின் முகத்திரை.

2011-09-19T07:28:00.000+05:30

தங்கத்தின் விலை தறிகெட்டுப் பறக்குது. தங்கம் என்ற பெயரை, தாளில் எழுதி வைத்துத்தான் பார்த்துக்கொள்ள வேண்டும். இல்லை, தாலிக்குத்தங்கமென்று வாங்க நினைக்கும் காலம் மாறி, தங்கமென்று பெண் பிள்ளைகளுக்கு பெயர்சூட்டி மட்டுமே மகிழவேண்டும் போல! சராசரி இந்திய்க் குடும்பங்கள் நிலையென்ன?பரிதாபம்தான்.

தங்கத்தில் செய்யப்படும் கலப்படம்தான் இப்போதைய ஹாட் சப்ஜக்ட். அதான், சுத்தத் தங்கத்தை திடப்படுத்த, செம்பு போன்ற உலோகங்கள் கலப்பாங்களே, அது எங்களுக்குத் தெரியாதான்னு கேட்டீங்கன்னா, இப்ப சொல்லப்போற விஷயத்தை படிச்சிட்டு சொல்லுங்க பார்ப்போம்!

2005ம் ஆண்டின் இறுதியில், ஒரு சவரனுக்கு ரூபாய் ஐந்தாயிரமாய் இருந்த நிலை மாறி, 2008ல்,எட்டாயிரம் ஆனது. 2010ல், பனிரெண்டாயிரத்தில் தொடங்கி, பதினான்காயிரம் வரை சென்றது. இன்றோ, தங்கத்தின் விலை, பல மடங்காகி, ஒரு கிராம் தங்கமே ரூபாய் மூன்றாயிரத்தை தொட முனைப்புடன் நிற்கிறது.

கேரளாவே இந்த விஷயத்திலும் விழித்துக்கொண்டது முதலில். கொச்சியை சேர்ந்த சங்கரமேனன் என்பவர், கேரள உயர்நீதிமன்றத்திற்கு அனுப்பிய இ-மெயில் ஒன்றை தாமாகவே முன் வந்து வழ்க்காக எடுத்துக்கொண்ட நீதிமன்றம், “தங்க நகைகளில், ருதேனியம், இரிடியம் போன்ற அளவுக்கதிகமாக சேர்க்கப்படுவதாகவும், அதில் அடங்கியுள்ள பொருட்கள், புற்று நோய்கள் உள்ளிட்ட நோய்கள் உருவாக காரணமாகிறதெனவும், சில சான்றுகள் சமர்பிக்கப்பட்டிருப்பதால், தங்க நகைகளின் தரம் நிர்ணயம் செய்யும், ‘பியூரோ ஆஃப் இண்டியன் ஸ்டாண்டர்ட்ஸ்’ (BIS) நிறுவனத்தலைவர் நேரில் ஆஜராகி விளக்கமளிக்க, நீதியரசர்கள் பர்க்கத் அலி, பஷீர் ஆகியோர் அடங்கிய டிவிஷன் பெஞ்ச் உத்தரவிட்டுள்ளது.

அதனைத்தொடர்ந்து, விஞ்ஞானி உண்ணி கிருஷ்ணன், உயர்நீதிமன்றத்தில் நேரில் ஆஜாராகி, தங்க நகை தயாரிப்பில் ப்யன்படுத்தப்படும் உலோகக்கலவை, அதில் கலக்கப்படும் மூலப்பொருட்கள் மற்றும் அதில் தவிர்க்க வேண்டிய பொருட்கள் குறித்து அரசு சில சட்ட திட்டங்கள் வகுத்து அதன் மூலம் தங்க நகை தயாரிப்பில் சில கட்டுபாடுகள் கொண்டு வரப்போவதாகவும் தெரிவித்துள்ளார். அடுத்து அவர் சொன்ன செய்திதான், தங்க நகை பிரியர்களை தலை கிறு கிறுக்க வைத்துள்ளது.

“நகைக்கடை உரிமையாளர்கள் தங்கள் விருப்பத்தின் பேரில்தான், ஹால்மார்க் முத்திரையைப் பதிக்கிறார்களே தவிர அது எங்களது துறைக்கு கட்டுப்பட்டது அல்ல” என்று சொல்லி அதிர வைத்திருக்கிறார். ஆனால், நகைக்கடை உரிமையாளர் ஒருவரோ, ஹால்மார்க் தங்க நகைகளில்,அப்படிக் கலப்படம் சாத்தியமில்லை எனவும்,ஹால்மார்க் தங்கநகைகள், அரசுத் தரக்கட்டுப்பாட்டு நிறுவனம் ஒன்றின் மூலம், ஆய்வு செய்யப்படுவதாகவும், அவற்றில் ருதேனியமோ, இரிடியமோ கலப்படம் செய்யப்பட்டிருந்தால், அந்த நகைக்கடை மற்றும் ஹால்மார்க் மையத்தின் உரிமம் ரத்து செய்துவிடுவார்கள் என்றும் கூறியுள்ளார்.

இப்பத்தான் கம்யூட்டரெல்லாம் வைச்சு, தங்கத்தின் தரத்தை நாமே கண்டுபிடிச்சுக்கலாம்னு, கடை கடையா விளம்பரம் செய்றாங்களேன்னு கேட்கலாம். இந்தக் கலப்படம், கண்டுபிடிப்பது கடினம். இரிடியம் மற்றும் ருதேனியம் போன்றவற்றை சுத்தத் தங்கத்தில் கலப்படம் செய்யும்போது, அவை தங்கதின் ஓர் அங்கமாக மாறிவிடுகிறது. செம்பைப்போல் இவற்றைப் பிரித்தறிய இயலாது. செம்பு சேர்த்தவுடன் தங்கத்தின் திடத்தன்மை அதிகரிக்கும். அது வேண்டாமென்றால், தங்கத்தை உருக்கி புடம் போட்டால், செம்பு பிரிந்துவிடும். ஆனால், நாம பேசுற இரிடியமும், ருதேனியமும் தங்கத்தில் ஒரு அங்கமாகி, தனியே பிரித்தறிய முடியாமல் செய்து, தங்கத்தின் தரத்தைக் குறைக்கின்றது.
இதற்கெல்லாம் ஒருபடி மேலே போய், மருத்துவர்கள் சிலரோ, இரிடியம், ருதேனியம் கலந்துள்ள தங்க நகைகள் அணிவதால், உடல் நலம் பாதிக்கும் என்கிறனர். மத்திய நுகர்வோர் விவகாரத்துறை அமைச்சர் திரு,கே.வி.தாமஸ், தாம் கலந்து கொண்ட விழா ஒன்றில், இரிடியம் போன்ற உடலிற்குத் தீங்கு விளைவிக்கக் கூடிய மூலப்பொருட்கள் தங்கத்தில் கலப்படம் செய்யப்பட்டுள்ளதா என்று பரிசோதனை செய்து நடவடிக்கை எடுக்க, மத்திய சுகாதாரத்துறை அமைச்சகத்திற்கு பரிந்துரைக்கப்பட்டுள்ளதெனக் கூறியுள்ளார்.

”எப்படியோ போங்கப்பா, தங்கம் விலை எப்ப இறங்குமப்பா?” என்கிறீர்களா?

டிஸ்கி: அண்மையில், குமுதம் ரிப்போர்டரில் நான் படித்த, ‘தங்கம் அணிந்தால் கேன்சர்’ என்ற கட்டுரை எனக்குள் ஏற்படுத்திய பாதிப்பினால் விளைந்த பகிர்வு. நன்றி:குமுதம் ரிப்போர்டர்.
அன்புடன்,
காந்திமதிசங்கரலிங்கம்.

தொப்புள்கொடி உறவு தொடர்பறுந்து தொலைதூரம் போனதம்மா!

2011-09-16T08:37:00.001+05:30

உலகின் உறவுகளில் உன்னதமான உறவு

பெற்றெடுத்த தாய் என்றால் பெரிதும் சர்ச்சையில்லை.

உதிரம் கொடுத்தாய், உயிரும் கொடுத்தாய்

பேணி வளர்த்தாய், பெரியவனானேன்.

உணவு ஊட்டும் உன்னத வேளைதனில்,விலகி ஓடினாலும்

தந்தை இவர், தனயன் இவர் என்றெனக்கு உலகின்

உறவுகள் தெரிந்திட உணர்வையும் ஊட்டியே வளர்த்தாய்

உன்னத மனிதனாய் உலகில் வலம் வர ஊக்குவித்தாய்

உறவை மட்டும் சொல்லித்தந்த நீ, பிரிவைச் சொல்லித்தரவோ

உயிரைத்துறந்து உறவுகளை மறந்து தனியே சென்றாய்!

பாலூட்டிச் சீராட்டி பார்த்துப் பார்த்து வளர்த்த என் தாயே

படுக்கையில் நீ வீழ்ந்தபோது பரிதவித்துத்தான் போனேன்.

பம்பரமாய்ச் சுழன்று நீ வேலை பார்த்த வீட்டினிலே

நிற்பதற்கும் நடப்பதற்கும் பிடிக்க ஒரு கம்பி தேவைப்பட்டதே!
பத்து பேருக்கு நாளும் அன்னமிட்ட உன் கைகளால்

பசித்திட்ட வேளைதனில் எடுத்துண்ண இயலாமல் போனதேன்?

பாடாய்ப் படுத்திய நோய் உன்னை பச்சிளங்குழந்தையாக்கியதால்,

பசி,தூக்கம், அன்னம் மறந்தாய், பாலைக் கொடுத்தோம்!

தூக்கம் தொலைத்தாய், துயரம் வளர்த்தோம், கொடுத்த மருந்தினில்

துவண்ட உன் உடல் கண்டு வெறுத்தே விட்டது எங்கள் வாழ்வு.
காசிக்குப் போனபோது என் தந்தை உனக்கு அணிவித்த
கண்ணாடி வளையல் கடைசிவரை உன்னுடன் வந்ததே!
காலமெலாம் காப்பாற்றுவாய் என்றெண்ணிய எங்களை மட்டும்
கைவிட்டு செல்ல மனம் உனக்கு வந்ததேன்?

தாலாட்டி உறங்க வைத்த தாயின் மடியே சொர்க்கமென்பேன் எனைச்

சீராட்டி வளர்த்த உன் கைகள் சிறிதும் செயல்பட மறந்த போதும்

அமுதமொழி அருளிய உன் வாய்தனில் அரிசியிட்ட பொழுதினிலும்,

அடுக்கி வைத்த சிதையினிலே அனலில் நீ வெந்தபோதும்

தொப்புள்கொடி உறவு தொடர்பறுந்து தொலைதூரம் இன்று போனபோதும்

சொர்க்கமெல்லாம் சோகமாகி என் வாழ்வின் அர்த்தம் தொலைந்ததம்மா!

டிஸ்கி: 1)04.09.2011 நண்பகல் 12.30 மணியளவில்,எங்களையெல்லாம் மீளாத்துயரில் ஆழ்த்திவிட்டு, இறைவனடி சேர்ந்த என் அன்னைக்கு அர்ப்பணம்.
2) தகவலறிந்து, நேரிலும், செல்லிலும்,கமெண்டிலும், Google Buz மற்றும் FB யிலும் இரங்கல் தெரிவித்த பதிவுலக சொந்தங்களுக்கு நன்றி.
3) இயல்பு நிலை திரும்பியவுடன், பதிவுலகம் பக்கம் வருகிறேன்.

மல்லிகை மகள் இதழில் மலர்ந்த பதிவர்கள்.

2011-09-01T05:43:00.002+05:30

அனைவருக்கும் விநாயகர் சதுர்த்தி வாழ்த்துக்கள்.

வெவ்வினை எல்லாம் வேரருக்கும் விநாயகனை வழிபட்டு வணங்குகிறேன்.
இரண்டு நாட்களுக்கு முன், சிபியிடமிருந்து ஒரு குறுஞ்செய்தி என் அலைபேசியில் வந்தது.(சிபி என்றைக்கு ஃபோன் பண்ணினார்!)

குறுஞ்செய்தி: வாழ்த்துக்கள், தங்கள் பேட்டியும், படமும் செப்டம்பர் மாத “மல்லிகை மகள்” இதழில் கலர்ஃபுல்லா வந்திருக்கு.

சரி, சில நாட்களுக்கு முன், மல்லிகை மகள் ஆசிரியர் ஒருவர் அலைபேசியில் அழைத்துப் பேசினாரே, அது எப்படி வந்திருக்கிறதென்று பார்ப்போமே என்று நினைத்துக் கொண்டு, அருகிலிருந்த கடையில் புத்தகம் வாங்கிப்பார்த்தேன். அருமையாத்தான் வந்திருந்தது அந்த மாத இதழில். அதனை, பதிவுலக சொந்தங்களுடன் பகிர்ந்து கொள்வதில் ஓர் இன்பம்.

சக பதிவரின் பேட்டி ஒன்றை மாத இதழ் ஒன்றில் கண்டவுடன், அலைபேசியில் வாழ்த்தும் இந்த குணம், நிச்சயமாய் சிபி ஸ்பெஷல்தான் என்று எண்ணிக்கொண்டு, புத்தகம் முழுவதும் புரட்டிப்பார்த்தேன். அட, நம்ம செந்திலுக்கும் அங்கே தனிச் சிறப்பு காத்திருந்தது. ஆம், சிபியின் டுவிட்ஸ் நாமெல்லோரும் ரசித்த ஒன்றே. அதில் ஒரு டுவிட், சிபியின் பெயரோடு, ’வலைப்பேச்சு’ என்ற பக்கத்தில் வந்திருந்தது. இதோ, அந்தப் பக்கம் உங்கள் பார்வைக்கு:

” மல்லிகை மகள்” இதழில் சிபி டுவிட்ஸ் பக்கம்

சிபி டுவிட்ஸ் மட்டும் பெரிதாக

வாழ்த்துக்கள் சிபி.

ஈகைத்திருநாள் வாழ்த்து.

2011-08-31T06:25:00.002+05:30

சகோதர, சகோதரிகள் அனைவருக்கும்

இனிய ஈகைத்திருநாள் வாழ்த்துக்கள்.

                                                   மிக்க அன்புடன்,
                                                   சங்கரலிங்கம்
                                                   காந்திமதி சங்கரலிங்கம்.

யார் அந்த புண்ணியவான்? எச்சரிக்கைப் பதிவு.

2011-08-29T18:12:00.004+05:30

எனது குடும்ப சூழல் காரணமாக, கடந்த ஒரு மாத காலமாகவே, நான் பதிவுலகம் பக்கம் சரியாக வரமுடியாமல் இருக்கிறேன். மிக அரிதாகவே, ஆன்லைனில் வர முடிகிறது. இந்த நிலையில், அதையும் கெடுக்க,யாரோ ஒரு புண்ணியவான், எனது yahoo மெயில் ஐ.டி.யை ஹாக் பண்ணி, அருவருப்பான ஸ்பேம் மெயில்களை என் பெயரில் அனுப்பி வருகின்றார்.

எனது மெயில் பாக்ஸை திறக்கவே முடியவில்லை. தினசரி பல மெயில்கள் என்னைத் திட்டி வருகின்றன. ஒவொன்றிற்கும் நான் அனுப்பவில்லை என்று பதில் மெயில் போட்டு என் வருத்ததை தெரிவித்து வருகிறேன். இதைக் கேட்டாவது சந்தோசப்பட்டு, இத்தோடு நிறுத்திக்கொள்ளுங்கள்.

சகோதரர்கள் பாடாவது பரவாயில்லை. சகோதரிகளுக்கும் என் பெய்ரில் இந்த ஸ்பாம் மெயில் போயிருந்தால், என்னை எவ்வளவு மட்டமாக நினைத்திருப்பார்கள்!

யாஹூ நிறுவனத்திற்கும் புகார் அனுப்பியுள்ளேன். பதில் இல்லை. பதிவர்களே, சொல்லுங்கள் இதற்கு என்னதான் தீர்வு? அன்பினால் என்னைக் கவர்ந்த ‘பலே பிரபு’ விடம்தான் முதலில் மெயிலில் புலம்பினேன். அவர், அந்த ஐ.டி.யை டிஸ்கார்ட் பண்ணிவிடுங்கள் என்றார். அது அவ்வளவு சுலபமில்லை. ஏனெனில், அந்த மெயில் ஐ.டியை பல நிலைகளில், பல தளங்கள் செல்லப் பயன்படுத்தியுள்ளதால், அதனை டிஸ்கார்ட் பண்ணவும் முடியாத நிலை.

எப்படி இந்த கொடுமையிலிருந்து விடுபட?
தெரிந்தவர்கள் மாற்று வழி சொல்லுங்களேன்.

டிஸ்கி-1: இது உதவி கேட்கும் பதிவென்றாலும், பதிவுலகில் சகோதர, சகோதரிகள் யாருக்கேனும் இத்தகைய மெயில், என் ஐ.டி.யிலிருந்து வந்து வருத்தப்பட்டிருந்தால், அவர்களிடம் பகிரங்கமாக மன்னிப்பு கேட்கவும்தான். மற்ற நண்பர்களுக்கும், இது ஒரு எச்சரிக்கை உணர்வைக் கொடுக்கட்டும்.
டிஸ்கி-2: நண்பர்கள் யாருக்கேனும் இத்தகைய ஸ்பாம் மெயில், வித்யாசமான தலைப்பில் எனது Yahoo ஐ.டி.யிலிருந்து வந்தால், தயவு செய்து அதனை அழித்து விடவும். அப்போதுதான், அந்த வைரஸ் உங்கள் பெயரில் ஸ்பாம் அனுப்பாமல் தடுக்க முடியும்.

புகையிலை போடு, பூமிக்குப் புண்ணியம் தேடு!

2011-08-25T06:29:00.000+05:30

புகையிலைப் பழக்கம் சிலரை மட்டுமே அடிமையாக்கி வைத்திருந்த காலம் மாறி, புகையிலைப் பழகா இளம் சந்ததியினரே இல்லையென்ற காலகட்டத்தில் வாழ்ந்து கொண்டிருக்கிறோம். புகை - பிடிப்பவர்களுக்கு மட்டுமல்ல, அருகில் நிற்பவர்களுக்கும் பகைதான்.

புகை பிடிக்கும் பழக்கத்தால், நாள்தோறும் இரண்டாயிரத்து ஐநூறு பேர் இறப்பதாகச் சொல்கிறது உலக சுகாதார நிறுவனம். ஆறு விநாடிக்கு ஒருவர் புகையிலையின் புண்ணியத்தால், பூமியைவிட்டே செல்கின்றனர். மக்கள்தொகை பெருக்கம் மனம் கலங்க செய்கிறதென்றால், புகையிலைப் பழக்கம், பல உயிகளைப் பலி வாங்கி, பூமிக்குப் புண்ணியம் தேடிக்கொடுக்கின்றது.

புகையிலை என்றதும் நம் நினைவிற்கு வருவது, சிகரெட் என்ற ஒன்றுதான். ஆனால், ’புகையில்லாப் புகையிலை’யின் பயன்பாடு சத்தமின்றி நம் சந்ததியை எதிர்த்து, யுத்தம் ஒன்றைத் துவக்கிவிட்டது. இளைய சமுதாயத்தினர் மத்தியில், ஸ்டைலிற்காக ஆரம்பமாகும் இப்பழக்கம், நாளடைவில் நம்மை அடிமையாக்கி, இது இல்லையென்றால், இனி உயிர் வாழப்போவதில்லையென்ற விரக்தி மனப்பான்மைக்கு வித்திடுகின்றது.

ஆண் பெண் அடிமைகள்:

சிகரெட் பிடிக்கும் பழக்கம் ஆண்களுக்கே உரியது என்று மட்டும் எண்ணிட வேண்டாம். 51 சதவிகித ஆண்கள் புகை பிடித்தலுக்கு அடிமை என்றால், 11 சத்விகித பெண்களும் இப்பழக்கத்திற்கு அடிமையானவர்களே. பத்து வயதிற்குள், புகைப்பழக்கத்திற்கு அடிமையானவர்கள் 37 சதவிகிதம் பேர். கடந்த சில ஆண்டுகளுக்கு முன்னர் எடுக்கப்பட்ட கணக்கெடுப்பின்படி, 55 சதவிகித இளைஞர்களும், 32 சதவிகித இளைஞிகளும் புகைப் பிடிக்கும் பழக்கத்திற்கு அடிமையானவர்கள்.

ஒரு சிகரெட்டில், நான்காயிரம் வேதிப்பொருட்கள் உள்ளன. அதில் நாற்பத்திமூன்று, புற்று நோயை உருவாக்கும் ஆற்றல் படைத்தவை. ஆண்டொன்றில், அறுபது லட்சம் பேர், மெல்லும் புகையிலையினாலும், புகைக்கும் சிகரெட்டினாலும் உயிர் துறக்கின்றனர். அடுத்த இருபது ஆண்டுகளில், இது ஒரு கோடியாகுமென்று உலக சுகாதார நிறுவனத்தால்,உத்திரவாதமளிக்கப்படுகின்றது.

புகை பிடிக்கும் சிலர் கொஞ்சம், கொஞ்சமாக அந்த பழக்கத்தை நிறுத்தி வருவதாகச் சொல்வர். இது தவறு. நிறுத்த விழைந்து விட்டால், உடனடியாக நிறுத்திவிட வேண்டும். பக்க விளைவுகள் ஏற்படாது.

நிறுத்துவதால் விளையும் நன்மைகள்:

ரத்த அழுத்தம் சீரடையும்.
இருதய துடிப்பு சீரடையும்.
இரத்தத்தில் கலந்திருக்கும் ஆக்ஸிஜன் அளவு சீராகும்.
இரத்தத்தில் கலந்திருக்கும் கார்பன் மோனாக்ஸைடு வெளியேறும்.
நுரையீரல் சுத்தமடைகிறது.
உடலிலுள்ள நிக்கோடின் வெளியேறும்.
சுவைக்கும், நுகரும் திறன் கூடும்.
நுரையீரலின் செயல்பாடு அதிகரிக்கும்.

சட்டம் தன் கடமையை செய்யும்:
புகைக்கும் புகையிலை மட்டுமல்ல மெல்லும் புகையிலை பயன்பாட்டைக் குறைத்திடவும், எச்சரிக்கை வாசகங்கள் சிகரெட் பாக்கெட்கள் மீதும், புகையிலை பாக்கெட்கள் மீது தேள் படங்களைப் போடவும் அரசு உத்தரவிட்டுள்ளது. பொது இடங்களில் சிகரெட் பிடிப்பதும் தடை செய்யப்பட்டுள்ளது. ஒவ்வொரு ஆண்டும் மே மாதம் 31ந்தேதி, உலக புகையிலை எதிர்ப்பு தினமாக கடைபிடிக்கப்பட்டு, புகையிலையின் பாதிப்புகள் எடுத்துரைக்கப்படுகின்றது. இருந்தும் என்ன, திருந்தும் மனம்தான் வேண்டும்.

என்றும் அன்புடன்,

காந்திமதி சங்கரலிங்கம்.

குழந்தைகள் நல மருத்துவர்கள் மாநாட்டில் ஒரு குதூகல உரை.

2011-08-17T09:11:00.002+05:30

PEDICON-2011ல் குழந்தைகள் உணவில் கலப்படம் குறித்த உரை.

தமிழகத்திலுள்ள குழந்தைகள் நல மருத்துவர்களின் 36 வது வருட மாநில மாநாடு TAMIRABARANI PEDICON-2011, நெல்லையில், 12.08.2011 முதல் 14.08.2011 முடிய மூன்று தினங்கள் நடைபெற்றது. அந்தக் கருத்தரங்கில், குழந்தைகள் உணவில் கலப்படம் குறித்து பதினைந்து நிமிடங்கள் பேச எனக்கு வாய்ப்பு வழங்கப்பட்டது.
அந்த கருத்தரங்கில், மூன்று நாட்களும் மருத்துவ வல்லுநர்கள் மட்டுமே தத்தமது அனுபவங்களையும், ஆராய்ச்சிக் கட்டுரைகளையும் பகிர்ந்திட வந்திருந்தனர். அத்தகைய மாநில அளவிலான ஒரு கருத்தரங்கில், சுகாதாரத்துறை சார்ந்த என்னை பேச வைக்கத் துணிந்தவர் அந்த அமைப்பின், தலைவர் மரு.திரு.A.சுப்பிரமணியன்.

அழைப்பிதழிலும், எனது உரையின் தலைப்பை:

Child food duped/poisoned/adulterated-How? What to do?

என்று கொடுத்து, அதற்கு கீழே:

Non pediatricians also can guide us to the diagnosis.

என்று ஒரு பில்டப் கொடுத்து, என் படபடப்பை ஏற்றிவிட்டிருந்தார்.
அடப்பாவி அங்கேயுமா?: மனோன்மணியம் சுந்தரனார் பல்கலைக்கழக கூட்ட அரங்கில் காலை 8.45க்கு உரை ஆற்ற வேண்டுமென்று அன்பு கட்டளை. காலை எட்டு மணியளவில் அரங்கிற்கு சென்றேன். அரங்கின் வாயிலில், முகமெல்லாம் புன்னகை தவழ இளம் மருத்துவர் ஒருவர் வந்து, முன்னூறு வருடங்கள் பழகிய அன்போடு, நீங்கள்தானே சங்கரலிங்கம்? என்று கேட்டுக்கொண்டே வந்து வரவேற்றார். அவர், தஞ்சைக்கருகில் பாபநாசம் என்னும் ஊரிலிருந்து, மருத்துவ மாநாட்டில் கலந்து கொள்ள வந்திருந்த மருத்துவர் திரு.T.ராஜ்மோகன்.
முதல் நாள்தான், எனது டுவிட்டர் பக்கத்தில் ’ஃபாலோ ’ பண்ண விருப்பம் தெரிவித்திருந்தார். அவரது ப்ரோஃபைலில், குழந்தைகள் நல மருத்துவர் என்று போட்டிருந்ததால், நானும் ’ஃபாலோ பேக்’ கொடுத்து விட்டு, நீங்கள் நெல்லையில் நடைபெறும் மாநாட்டிற்கு வருவீர்களா என்று ஒரு கேள்வியும் கேட்டு வைத்தேன்.அவ்வளவுதான், அடுத்த பதிவர் சந்திப்பு, அங்கே நிகழுமென்று நான் எதிர்பார்க்கவில்லை.

உணவு உலகம்(சங்கரலிங்கம்) குழந்தைகள் நலம்(மரு.ராஜ்மோகன்)

                               ஆம், அவர் ஒரு பதிவர். தங்கை சித்ராவின் ‘கொஞ்சம் வெட்டி பேச்சு’ கேட்டு, தீவிர ரசிகரானவர். சித்ரா எழுதிய,நெல்லை பதிவர்களின் தானை தலைவர் வாழ்க! பதிவின் தாக்கம், ’உணவு உலகம்’ பக்கம் அவர் பார்வை பதிந்துள்ளது. நன்றி சித்ரா. மரு.திரு.ராஜ்மோகன், !.குழந்தை நலம்.! என்ற வலைப்பூவில், சிறு குழந்தை வளர்ப்பிற்கு தேவையான மருத்துவக் குறிப்புகள் அள்ளித் தருகிறார். ஆஹா, மற்றுமொரு பதிவர் சந்திப்பு. இருவரும் நேரடி அறிமுகத்திற்குப் பின்னர், சிறிது நேரம் பதிவுலகம் பற்றிப் பேசிக்கொண்டிருந்தோம். என்னை மாநாட்டிற்கு பேச அழைத்த டாக்டரிடம், பாருங்கள் இங்கும் எனக்கோர் நண்பர், பதிவுலகம் மூலம் அறிமுகம் என்று சொல்லி பதிவுலகப் பெருமைகளை பறைசாற்றிக்கொண்டிருந்தேன்.
                                  அடுத்து உரையாற்ற அழைப்பு வந்தது. மேடையில் ஏறிய உடன், அரங்கில் அமர்ந்திருந்த மருத்துவர்களைப் பார்த்தேன். படபடப்பு பட்டாம்பூச்சியாய் என்னுள் பறக்கத் தொடங்கியது. குழந்தைகள் உணவில் கலப்படம், திண்பண்டங்களில் ஊக்க/தூக்க மருந்துகள் கலப்படம், இனிப்புகளில் சேர்க்கப்படும் மெல்லக் கொல்லும் விஷமான செயற்கை நிறம், பசும்பாலில் மெலமைன் மற்றும் ஆக்சிடோசின் படிவங்கள், துரித உணவு, நஞ்சுணவு குறித்து நானறிந்தவற்றைப் பதினைந்து நிமிடங்களில் பகிர்ந்து விட்டு இறங்கி வந்தேன்.
                               முன் வரிசையில் அமர்ந்திருந்த டாக்டர்.விருத்தகிரி என்னிடம் பேச வேண்டுமென அழைத்தார். முதுபெரும் மருத்துவர் அவர். சரி, வகையாக மாட்டிக்கொண்டோம், ஏதோ தவறாக சொல்லிவிட்டோமோ என்று எண்ணிகொண்டே அருகில் சென்றேன். என் கைகளைப் பிடித்துக் கொண்டு, என் உரையைப் பாராட்டியபோது என் கண்கள் பனித்தன. வெளியில் வந்தவுடன், கூடவே வந்து, மருத்துவர் மற்றும் பதிவர் திரு.ராஜ்மோகன், படமெடுத்துக்கொண்டார்.

அரங்க வாயிலில் பதிவர்கள்.

நல்ல அனுபவம். மாநில அளவிலான கருத்தரங்கில், முதல் முறை உரையாற்றிட சந்தர்ப்பம் அமைத்துக் கொடுத்த மரு.A.சுப்பிரமணியன் அவர்களுக்கும், பதிவர்களை நினைவு கூர்ந்து வந்து பழகிய மரு.T. ராஜ்மோகன் அவர்களுக்கும் என் நன்றிகளைக் காணிக்கையாக்கி,பதிவுலகில் இத்தனை சொந்தங்களா!, என்று வியந்து, விடைபெற்று வந்தேன்.

பதிவுலகில் புதிர் போட்டி-புத்திசாலிகளுக்கு மட்டும்.

2011-08-13T05:29:00.001+05:30

பதிவுலகம் என்றாலே பக்கம் பக்கமாய் எழுதுவது, நேரம் பத்தலேன்னு சொல்லிக்கிட்டு, உள்குத்து பதிலொ(வொ)ன்றைப் போட்டு, பல தர்க்கங்கள் உருவாக்கிவிடுவது என்பதொன்றே எழுதாத சட்டம் என்று இயற்றி வாழ்பவர்கள் மத்தியில், எழுத்துலக பிரபலங்கள் பதினாறு பேர் இணைந்து நடத்தும், டெரர்கும்மி என்ற வலைத்தளத்தில் ஒரு வித்யாசமான அறிவிப்பைப் பார்த்தேன்.
எதிர்வரும் 17.08.2011ல் புதிர் போட்டி ஒன்றை அவர்கள் துவக்க உள்ளனர். இந்தூர், ஐஐம் மாணவர்களால் வருடாவருடம் நடத்தப்படும் "KLUELESS" விளையாட்டின் தாக்கத்தால் அந்த புதிர் போட்டியை உருவாக்கியுள்ளனர்.

என்ன புதிர் போட்டி இது?

1.நேரடி கேள்விகள் இருக்காது.... படமாகவோ, எழுத்தாகவோ, மவுஸ் கிளிக்காகவோ இப்படி வித்தியாசமாக இருக்கும்

2.ஒவ்வொரு கேள்விக்குமான விடைக்கும் க்ளூ கொடுக்கப்பட்ட்டு இருக்கும். பேஜ் சோர்ஸ், பேஜ் டைட்டில், url name, image name அல்லது வெப்பேஜில் ஏதாவது ஒரு இடத்தில் க்ளூ இருக்கும்... அதை கண்டுபிடித்து விடை சொல்ல வேண்டும்

3.விடைகளை அதற்கான ஆன்சர் பாக்சிலோ, url name மாற்றுவது போன்றோ, கிளிக் செய்வது போன்றோ இருக்கும்....

4.விடையை கொடுத்தவுடன் அடுத்த பக்கத்திற்கு (லெவலுக்கு) செல்லும்

5.இப்படி மொத்தம் 25 லெவல்களை யார் முதலில் முடிக்கிறார்களோ அவர்களே வெற்றியாளர்....

6. அனைத்து லெவல்களையும் முடிப்பவர்களின் பெயர்கள் “HALL OF FAME”லும் “டெரர் கும்மி.காம்”மிலும் வெளியிடப்படும்.

7.போட்டியில் கலந்து கொள்ள எந்த வித நிபந்தனையும் இல்லை. டெரர் கும்மியை சேர்ந்தவர்களை தவிர யார் வேண்டுமானாலும் கலந்து கொள்ளலாம்

8.புதிர் முடிக்க டைம் லிமிட் கிடையாது. முதலில் முடிப்பவர்களுக்கு பரிசு.
         கலந்து கொள்ள நினைப்பவர்கள், விளையாடிப் பார்க்க, மாதிரி போட்டிகளும் தளத்தில் உள்ளன.

மன்னா, பரிசுத்தொகை எவ்வளவு?

முதல் பரிசு: 5000 ரூபாய்
இரண்டாம் பரிசு: 3000 ரூபாய்
மூன்றாம் பரிசு: 1000 ரூபாய்
இரண்டு ஆறுதல் பரிசு தலா 500 ரூபாய்.
மேலதிக விவரங்களுக்கு:
Hunt for Hint புதிர் போட்டி அறிவிப்பு - பரிசு 10,000 ரூபாய்

      போட்டிகள் நிறைந்த பதிவுலகிலே, புதிர் போட்டியொன்றை அறிவித்திருக்கும் டெரர்கும்மி நண்பர்களுக்கு மனமார்ந்த வாழ்த்துக்கள். சிறந்த இந்த முயற்சி, சிகரங்களை நோக்கி உங்களை அழைத்துச்செல்லும்.

இது என்ன அழைப்பிதழ்?
                                           எடுத்துரைக்கிறேன், எனது அடுத்த பதிவில்.

இன்றைய பதிவிட்டது: ப்ளாக் ஓனர் அனுமதியுடன்- அ.ரா.சங்கரலிங்கம்.

பெண் சிசுக்களைக் கொல்லும் பேய்கள்.

2011-08-12T05:32:00.001+05:30

அன்பு நெஞ்சங்களே, பதிவுலகில் இது என் முதல் படி. ஏற்றி விடுவதும், இறக்கி விடுவதும் ”உணவு உலகம்” ரசிகர்கள் கைகளில்!

பெண்ணென்றால் பேயும் இறங்குமென்பர். ஆனால், பெண்சிசுக்களைக் கொல்லும் சில பேய்களும் இருக்கத்தான் செய்கிறதென்றால், நம்ப முடிகிறதா? ஆம், பெண் சிசுக்களை கொல்லும், மனிதப் பேய்கள் அவை. சொல்வது உலக சுகாதார நிறுவனம் என்றால் ஜீரணிக்க சற்றே சிரமமாகத்தான் இருக்கிறது.

நாளொரு மேனியும், பொழுதொரு வண்ணமுமாக நாட்டில் அறிவியல் வளர, வளர,அறிவியலின் பயன்களை, ஆக்கபூர்வமாய் பயன்படுத்துவதை விட்டு, அழிவின் பாதைகளுக்கு அவற்றை பயன்படுத்துதலே மிகுந்துவிட்டது.

இருமனம் ஒருமனமாகும் திருமண வாழ்வென்றாலும் சரி, உடல்பசி தீர்க்கும் தகாத உறவென்றாலும் சரி, பிறக்கப் போகும் குழந்தை பெண்ணென்றால், கருவில் உருவழிப்பது, மிகச் சாதாரணமாகி விட்டது. அதிலும், விஞ்ஞான வளர்ச்சியின் பயனாய் வந்து சேர்ந்த அல்ட்ரா சவுண்டு ஸ்கேன் பயன்பாட்டிற்கு வந்த பின், பெண் குழந்தைகளை பிறக்குமுன்னரே,கருவறுத்தல் கவலை தரும் விஷயமாகி விட்டது.

கடந்த முப்பது ஆண்டுகளில், இந்தியாவில் மட்டும், மலராமல் கருகிய பெண் சிசுக்கருக்கள் ஒரு கோடியே இருபது லட்சம். பெண்களுக்கான சமூக அங்கீகாரம் இல்லாததையே இந்த புள்ளி விபரம் பறைசாற்றுகிறது. பெண்குழந்தை பெற்றவள் என்றால், பெற்ற தாயைப் பழித்துப் பேசும் பேதமை நம்மில் இருக்கும்வரை, பெண்சிசுக்கொலை இம்மண்ணிலிருந்து மறையாது.

இதில் வேடிக்கை என்னவெனில், பெண் குழந்தைகளைக் கொல்வது,அன்றாடம் அன்னத்திற்கே அலைபாயும் கூட்டமல்ல. படித்த, பணக்கார வீட்டுப் பெண்கள்தான், பெண் சிசுக்கொலைக்கு பெரிதும் வித்திடுபவர்கள். அல்ட்ரா சவுண்ட் ஸ்கேன் வந்தாலும் வந்தது, கருவின் வளர்ச்சியறிய ஸ்கேன் பயன்படுவதை விட, பெண் குழந்தைகளை இனம் கண்டுகொள்ளத்தான் அதிகம் பயன்படுத்தப்படுத்தப்படுகிறது. இத்தனை தடைகளை மீறி, பெண் குழந்தை ஒன்று பிறந்து விட்டால், கள்ளிப்பாலும், நெல்மணிகளும் அவர்கள் கதை முடிக்க ஊட்டப்படும் உணவாகி விடுகின்றன. விளைவு?

என்னைக் காக்க எவருமில்லையா?

1990ல், பெண் குழந்தைகள் பிறப்பு விகிதம் இருந்ததைவிட, அண்மைக்காலமாக பெரும் இழப்பை சந்தித்துள்ளது. ஆம், 1990ல், 1000 ஆண் குழந்தைகளுக்கு, 906 பெண் குழந்தைகள் என்றிருந்த விகிதாச்சாரம், 2005ம் ஆண்டு வாக்கில்,836 பெண் குழ்ந்தைகள் என்று குறைந்து விட்டது. கடந்த முப்பது ஆண்டுகளில் கருவிலே உருவழிக்கப்பட்ட பெண் குழந்தைகள் எண்ணிக்கை ஒரு கோடியே 20 லட்சம் என்கிறது,பெண்ணைப் பேயாக்கும் மற்றொரு புள்ளிவிபரம். என்ன செய்யலாம் இவர்களை? சிசுக்களைக் கொல்லும் இவர்கள் மீது, கொலைக்குற்றம் சுமத்தலாமா?

இன்னும் சில ஆண்டுகளில், இந்த நிலைமை மேலும் மோசமடையலாமென மனித வளத்துறை எச்சரிக்கை மணியடிக்கிறது. விஞ்ஞானம் நாம் வீழ்வதற்கல்ல.

அன்புடன் அறிமுகமாகும்,

காந்திமதிசங்கரலிங்கம்.