உணவகத்தொழிலில் உயர் லட்சியங்கள்-பாகம்-1.

                 

                         பாதுகாப்பான, தரமான உணவு, நம் அனைவருக்கும் கிடைக்க வேண்டுமென்பதே,புதிதாக அமலுக்கு வந்துள்ள உணவு பாதுகாப்பு மற்றும் தர நிர்ணயச் சட்டம்,2006ன் நோக்கம். உணவகத்தொழில் புரிவோர் இச்சட்டத்தில் அறிந்து கொள்ள வேண்டிய முக்கிய அம்சங்கள் இங்கே தொகுத்து வழங்கப்படுகிறது. 

                          சட்டத்தின் சாராம்சம், சாமானியனும் அறிந்து கொள்ள வேண்டுமென்பதே இதன் நோக்கம். உணவுத்தொழில் புரிபவர்கள் மட்டுமல்ல, உணவை உண்ணச் செல்லும் நாமும் இதனை அறிந்து கொண்டால், நல்ல பாதுகாப்பான உணவு கிடைக்குமிடங்களை, நன்றாய் அறிந்து கொள்ளலாம்தானே!

• From Farm to Fork- உணவுப்பொருள் உற்பத்தியாகும் இடத்திலிருந்து, உண்பது வரை, உன்னத நிலையிலிருக்க வேண்டும்.
                                     
• இச்சட்டம் அமலுக்கு வந்தபின்னர், (உணவுத்தரம் குறித்த) அனைத்து சட்டங்களும், பிரிவுகளும் காலாவதியாகிவிட்டன.
• உணவு கையாள்பவர்களுக்கு புதிய உரிமம் வழங்கப்படும். உரிமம் அற்றவர்கள் சட்டத்திற்கு புறம்பாக பணியிலிருப்பதாக கருதப்படுவார்கள்.
                                  
• உணவுக்கலப்பட தடைச்சட்டம், உணவுப்பொருளின் குறைந்த பட்ச தரம் பற்றி மட்டுமே சொன்னது. புதிய சட்டத்தில், ’தரக்குறைவான  உணவு ’ மற்றும் ’பாதுகாப்பற்ற உணவு’ என இரு தலைப்புகளின் கீழ் விரிவாக விளக்கப்பட்டுள்ளது.
  
• இதுவரை உள்ளாட்சிப்பகுதிகளிலும், ஆரம்ப சுகாதார நிலைய பகுதிகளிலும், பகுதி நேர உணவு ஆய்வாளர்களாகப் பணியாற்றியவர்கள், தற்போது முழுநேர உணவு பாதுகாப்பு அலுவலர்களாக, உணவு பாதுகாப்பு மற்றும் மருந்து நிர்வாகத்துறை யின் (FOOD SAFETY AND DRUG ADMINISTRATION DEPARTMENT) கீழ் பணிபுரிகின்றனர்.
  
• புதிய சட்டம், உணவு போக்குவரத்து, உணவைக் கையாளும் பணியாளர்களின் உடல்நலம் ஆகியவற்றிலும் கவனம் கொள்கிறது.
                             
• உணவக உரிமையாளர்களின் பொறுப்பு, உணவகத்தையும் தாண்டி, உணவுப்பொருள் தயாரிப்பிற்கான மூலப்பொருள்கள் வாங்குவதிலிருந்தே தொடங்குகிறது. எடுத்துக்காட்டாக: ஒரு உணவகத்தில் உண்ட உணவு, நஞ்சுணவு என அறியப்பட்டால், அந்த உணவைத் தயாரிக்கப் பயன்படுத்திய மூலப்பொருள்கள் வாங்கிய இடம், அதனை முறையாகப் பராமரித்த விதம் போன்றவற்றிற்கு அந்த உணவகத்தில் உரிய ஆவணங்கள் இருக்க வேண்டும்.
• உணவில் பயன்படுத்தும் இணைபொருட்கள்(FOOD ADDITIVES), செயற்கை வண்ணங்கள்(ARTIFICIAL FOOD COLOURS) போன்றவை , இந்திய தர நிர்ணயச் சட்டத்திற்கு(ISI) உட்பட்டு தயாரிக்கப்பட்டவையா எனப் பார்த்து வாங்கவேண்டும்.
• ஒரு உணவகத்தில் உணவு தயாரிக்கும் முறைகளையும், குளிர்சாதன வசதிகளையும், சமைத்த உணவை வைத்திருக்க வேண்டிய வெப்ப நிலை, குளிர்வித்த உணவை சூடாக்கும் முறை ஆகியவற்றையும் இச்சட்டம் விளக்குகிறது.
• ஒரு மத்திய உற்பத்தி நிலையத்தில் உணவு தயாரிக்கப்பட்டு, பல உணவகங்களுக்கு விநியோகம் செய்யப்படும் முறையினைப் பின்பற்றினால், உணவில் குறைபாடு அறியப்பட்டால், அதனை திரும்பப்பெறும் வசதி(FOOD RECALL PROCEEDURE) கட்டாயமாக்கப்பட்டுள்ளது.
• இருவேறு எண்ணெய்களைக் கலந்து உணவுப்பண்டங்கள் தயாரிப்பதை அனுமதிக்கவில்லை.
                                           
• இச்சட்டத்தில் உடனடி அபராதத்தொகை செலுத்தும் முறை மற்றும் குற்றவியல் நடவடிக்கைகள் தொடரும் நடைமுறையும் உள்ளது. 
• தயாரிப்பு தேதி, எந்த தேதி வரை பயன்படுத்த உகந்தது மற்றும் மூலப்பொருள்கள் விபரம் இல்லாத பொருள்கள் உணவகக் கிட்டங்கிகளில் இருப்பில் இருக்கக்கூடாது.
• உணவகங்களில் பூச்சி மற்றும் எலி ஒழிப்பு நடவடிக்கைகள் முறையாக மேற்கொள்ளப்பட வேண்டும். அதற்கான கால அட்டவணை தயார் செய்து, அதன் விபரம் பதிவேட்டில் பதியப்பட்டு ஆய்விற்கு வைக்கப்படவேண்டும்.
• உணவகத்தின் பல்வேறு பகுதிகளில் பணிபுரியும் தொழிலாளர்களுக்கு,முறையான பயிற்சி அளிக்கப்படுவதுடன், அவரவரின் கடமை குறித்த விளக்கங்கள், அந்தந்தப் பகுதியில், அவர் அறியும் வண்ணம் அறிவிப்புப் பலகைகள் வைக்க வேண்டும்.
              முந்தைய சட்டத்தைப்போல், அனைத்து குறைபாடுகளுக்கும், அதாவது உணவில் கலப்படம் செய்தாலும், உரிய விபரங்களை லேபில்களில் குறிப்பிடாவிட்டாலும், குறைந்த பட்சம்,ஆறு மாதம் சிறைத்தண்டனையுடன் ஆயிரம் ரூபாய் அபராதம் என்றிருந்த நிலை மாறி, உணவுத்தொழில் புரிவோருக்கு விழிப்புணர்வு ஏற்படுத்துதல், குறைகளை சுட்டிக்காட்டி கால அவகாசம் அளித்து திருத்தச் செய்தல், உணவில் தரமில்லையெனில் திரும்பப்பெறுதல் என்ற நிலைகளையும் தாண்டி, திருந்த அடம் பிடிப்பவர்களை மட்டும் குற்றச்சாட்டு சுமத்தி,சட்டத்தின் முன் நிறுத்துதல் என படிப்படியாக பல நிலை அணுகுமுறையினை புதிய சட்டம் கொண்டுள்ளது.                                       உணவு தயாராகி,இன்னும் வரும் . . .