பசித்திருப்போரைப் புசிக்க வைத்திடு!

                       

                         கன்னியாகுமரி ஒரு சர்வதேச சுற்றுலா மையம். இங்கு வரும் சுற்றுலா பயணிகள் எண்ணிக்கை அதிகரிக்கிறதோ இல்லையோ, அழைத்து வந்து விட்டுச் செல்லப்படும் முதியவர்கள், மன நோயாளிகள் எண்ணிக்கை தினம் தினம் அதிகரிப்பது மட்டும் அன்றாடம் நடக்கும் கொடுமை. அப்படி விடப்படுபவர்கள் வெயிலிலும், மழையிலும், கடும் பனியிலும் படுவது காணாதென்று, பசியின் கொடுமையால், பிச்சை எடுத்துத் திரிவது கொடுமையிலும் கொடுமை.

                                     

பசிக்கும் வேளையில், புசிக்க உணவின்றி, உணவகங்களில் விழும் எச்சில் இலைகளைப் பொறுக்கி எடுத்து, பசியாறும் பல முதியவர்களைக் காணலாம். பசித்திருப்பவனைப் புசிக்கச் செய்து பார்க்கும் எண்ணம் படைத்தவன் இறைவனாகிறான் என்பதற்கேற்ப, கன்னியாகுமரியில் உள்ள திருவாவடுதுறை ஆதீன மடம், ஒரு முன்னோடித் திட்டத்தை மனமுவந்து செய்து வருகிறது. 

                                        காலையில், பொங்கல் அல்லது இட்லி பார்சல் செய்யப்பட்டு, பசியால் துடித்திருப்பவர் இடம் தேடிச்சென்று, வழங்கி வருகின்றனர். எங்கெங்கு புண்ணிய தலங்கள் இருக்கிறதோ, அங்கெல்லாம் இந்த ஆதினத்திற்கு சொந்தமான் மடங்கள் இருக்கும். அப்படி 250 மடங்கள் வரை இருந்தாலும், அவற்றில்,இலவச உணவு, மருத்துவ வசதி போன்ற  அடிப்படை வசதிகள் செய்யப்படுகின்றன. ஆனால், பசித்திருக்கும் ஏழைக்கு, அவன் இருக்குமிடம் தேடிச் சென்று உணவு வழங்குதல் இதுவே முதல் முறை.

டிஸ்கி-1:  மதுரையில் நாராயணன் கிருஷ்ணன் என்பவர் ஆதரவற்ற முதியோருக்கு செய்து வரும் தொண்டு குறித்து, அற்றார் அழிபசி தீர்த்தல் -தமிழன் ஒரு தலைசிறந்த ஹீரோ எனும் தலைப்பில் ஏற்கனவே பதிவிட்டுள்ளேன், நண்பர்களே.

டிஸ்கி-2: அடுத்த பதிவு எனது முன்னூறாவது பதிவு. அதற்குப் பின், உங்கள் உணவு உலகத்தில் சில மாற்றங்கள் செய்ய உத்தேசித்துள்ளேன்.