பல்கலைக்கழக உரையும் பார்த்து வந்த நண்பர்களும்-பார்ட்-2

சிபியைப்போல சிலிர்த்து நிற்குதா?

                                      பல்கலைக்கழக உரையும் பார்த்து வந்த நண்பர்களும் முதல் பகுதி இங்கே.
                            நாமக்கல்லிலிருந்து நண்பர்கள் நலமாய் வழியனுப்பி வைத்தனர். ஈரோட்டில் இரவு பத்து மணிக்குத்தான் எனக்கு ரயில் வரும். அதுவரை நேரம் போகவேண்டுமே, அழைத்தேன் சிபியை! நானிருந்த நண்பரின் கடைக்கு நாலு மணிக்கு வருகிறேன் என்று சரியாக ஐந்தரைக்கெல்லாம் வந்துவிட்டார். காரணம் கேட்டால், கல்லூரி விடும் நேரம், வரும் வழியெங்கும் கன்னியர் கூட்டமென்றார்.

கன்னியரைப்பார்த்த களி(ளை)ப்பில் காலதாமதமாய் வரும் சிபி

நண்பர் நண்டு@நொரண்டு ராஜசேகருக்கும், வீடு சுரேஷிற்கும் தகவல் தெரிவித்து, அவர்களையும் ஈரோடு SKM  பூங்காவிற்கு வரச்சொன்னார். எதுக்கு திடீர்னு பார்க்குக்கு அழைத்துச்செல்கிறாரென்று யோசித்தேன். அங்கு சென்றவுடன்தான், சிபியின் ரசனை புரிந்தது. இளஞ்சோடிகள் பலர் அங்கு மாலையில் வருவது வழக்கமாம். அந்த சூழ்நிலைதான் சிபியை பல டுவிட்ஸ் எழுதத்தூண்டுமாம்.

 நண்பர் ராஜசேகர் வரும்வரை, பூங்காவில் அமைத்துள்ள நடைதளத்தில் நடந்துகொண்டே பேசலாமே என்றார் சிபி. அங்கிருந்த இயற்கை(!) காட்சிகளை சுற்றிச் சுற்றி ரசித்தார் சிபி. பயணக்களைப்புடன் பரிதாபமாய் நானும் சுற்றிவந்தேன். வெளியில் வரும்போது, அங்கிருந்த வாட்ச்மேனிடம் சிபி அங்கு அடிக்கடி வருவாரா என்று கேட்டோம்.ஆமாம், அடிக்கடி வருவார்,ஆனால் தனியாத்தான் வருவார் என்றார்.  

                

                                 அடுத்த அரை மணி நேரத்தில் அங்கு வந்தார் நண்பர் ராஜசேகர். புரோஃபைலில் உள்ள படத்தில் பார்ப்பதற்குக் கொஞ்சம் பயப்படும்படிதான் இருந்தார். ஆனால், நேரில் மனிதர் ரொம்ப சாந்தம்.  புல்தரையில் அமர்ந்து அளவளாவினோம். மறந்தே போய்விட்டேன் என்று சொல்லிக்கொண்டே சென்று,அனைவருக்கும் கடலை வாங்கிவந்தார் சிபி.

நண்பர் ராஜசேகர்,நான்,சிபி

திருப்பூரிலிருந்து நண்பர் வீடு சுரேஷ்,  ஈரோடு வந்துவிட்டேன் என்று சிபிக்கு செல்லில் பேசினார். துள்ளிக்குதித்து எழுந்த சிபி, வாங்க ஐயர் மெஸ்ஸிற்குச் சென்று உணவருந்தலாம் என்றார். என்ன விஷேசம் என்றேன். வாங்க, வந்து (சாப்பிட்டு!) பாருங்க என்றழைத்துச் சென்றார். நாங்கள் ஐயர் மெஸ்ஸை அடைந்தவுடன் அங்கு  சிறு தூறலா(ஜொள்) மழை பொழிந்தது. சிபி, சாப்பாட்டுக்கடையில் அந்த ஐயர் மெஸ்ஸை அறிமுகம் செய்திருக்காராம். 

கடையில் இலை பரப்பிய சிபியுடன் சுரேஷ்.

நண்பர்கள் ராஜசேகர்& சுரேஷ்

எங்களுக்கெல்லாம் ஆவி பறக்கும் ஆனியன் தோசைவந்தது, சுவை மிகுந்த புரோட்டாவும் சூடாக வந்தது. பதிவுலகம், அரசியல், தொடரும் பதிவர் சந்திப்புகள் என பலவாறும் பேசியபடியே பகிர்ந்து கொண்டோம், அன்பை. அவசரமாய் சாப்பிட்ட சிபி, நேரே சென்று கல்லாவில் இருந்த கடை உரிமையாளரிடம் கதை பேச ஆரம்பித்தார். அங்கே வந்த அவரின் உரிமையாளர், அன்பாய் அவர் துணையை வெளியில் அனுப்பி வைத்தார்.  வெளியில் வந்தவுடன், சிபிக்கு நேரம் உரைத்தது. அடுத்த அரை மணி நேரத்தில் அவர் வீட்டிலிருக்க வேண்டும், இல்லையென்றால் திண்ணை வாசம்தானாம்.  சுரேஷை  ராஜசேகருடன் அனுப்பிவிட்டு, என்னையும் ரயில் நிலையத்தில் இறக்கிவிட்டு, சிட்டாய்ப் பறந்தார் சிபி.