தேர்தல்-2011 - மாற்றங்கள் ஏற்றம் தருமா? - ஒரு அலசல்.

                                    "பிள்ளை அவன் அப்பன உரிச்சு வைச்சிருக்கான் பார் "

                                       "அந்த பொண்ணோட கண்ண பாரு, 

                                             அவங்க அம்மா கண்ணப்போல இருக்கு"

இப்படி தினம் தினம் ஆயிரம் டயலாகுகள் அங்கங்கே கேட்டிருக்கிறோம். சில நொடிகள் சிந்தித்தால், இதன் பின்னுள்ள தாத்பரியம் புரியும். 

                                      மரபணு- இது மரபு மாறாமல் இருக்க முன்னோர்களின் பதிவுகளை பிள்ளைகளுக்கு பெற்று கொடுக்கும் பேராற்றல் பெற்றது. மனித உடலில் உள்ள செல்களின் எண்ணிக்கை 50 ட்ரில்லியன்  ஆகும். 
                                      சின்ன கணக்கு ஒன்று உங்களுக்காக: 

                                          ஒரு கோடி லட்சம் என்பது ஒரு ட்ரில்லியன்.

                                             அதை 1,00,00,000 என்று எண்ணால் எழுதலாம். 

                                                ஐம்பது   ட்ரில்லியன் என்பது 50,00,00,000. 

                                       நம் உடலின் ஒவ்வொரு செல்லிலும், கிட்டத்தட்ட 30,000 மரபணுக்கள் உள்ளன. பாரம்பரிய பண்புகளை பரம்பரைகள் பல கடந்தும் பிள்ளைகளில் பதிவிடுவது  டி.என்.ஏ. மரபணு(ஜீன்).

                                      டி.என்.ஏ. தொழில் நுட்பம் கற்றல், தொல்லை தரும் பல்வேறு நோய்களைக்  களைய ஆற்றல் தரும். நம் வயது, நாற்பதைக்  கடந்தால், நீரிழிவும், இதய நோய்களும் அழையா விருந்தாளிகளாய்  வந்து நம்மை சேரும். காரணம், நாற்பதை நாம் கடக்கும்போது, மரபணுக்களில் வரும் மாற்றங்களே நோய் கொண்டு தருவன. அதனை "ஜீன் மியூடேஷன்" என்று கூறுவர்.  நாற்பதை நாம் கடக்கும்போது, இன்சுலினை நம் உடலில் உற்பத்தி செய்யும் ஜீனில் ஏற்படும் மாற்றங்களே, இன்சுலின் உற்பத்தியை குறைய செய்கிறது. விளைவு - சர்க்கரை நோய்.
                                     சமீபத்தில் மரபணு மாற்றம் குறித்த சர்வதேச கருத்தரங்கம் சென்னைக்கு அருகிலுள்ள செட்டிநாடு பல்கலை கழகத்தில் நடந்தது. அதில் கலந்து கொண்ட செட்டிநாடு பல்கலை கழக ஆராய்ச்சி பிரிவு தலைவர் டாக்டர் பிச்சப்பன் மற்றும் மதுரை பல்கலை கழகத்தை சார்ந்த டாக்டர் பாலகிருஷ்ணன்  ஆகியோர்  அவர்கள் உரையில், மரபணு மாற்றம் செய்யும் மாயங்கள் குறித்து கூறியவை உங்கள் பார்வைக்கு:
                                   "சிலருக்கு நாற்பது வயது வரை சுரக்கும் இன்சுலின் திடீரென நின்று போவதற்கு மரபணு மாற்றமே காரணம் என்றும், சர்க்கரை நோய் கண்டுபிடிக்க, மனிதனின் ரத்தத்தில் உள்ள சர்க்கரையின் அளவை நிர்ணயித்து, அதன் அடிப்படையில் முடிவு செய்கின்றனர். அதற்கு பதிலாக, அந்த குறைபாட்டின் மூல காரணத்தை ஆராய்வது, நோய் தீர்க்கும் வழிகளை காட்டும். மனித உடலில் உள்ள ஆஞ்சியோ டென்ஷைன் கன்வெர்டிங் என்சைம் என்று ஒரு ஜீன் உள்ளது. அதனை ஏஸ் ஜீன் என்போம். இந்த ஏஸ் ஜீன் நம் உடலில் ரத்தம் சீராக ஓட உதவிடும். இந்த ஜீனில், ஐடி, ஐஐ, டிடி என மூன்று வகை உண்டு.   ஐடி அல்லது  டிடி ஜீன் ஒருவரது உடலில் அதிகமிருந்தால், அவருக்கு இதய நோய்கள் வர வாய்ப்புகள் அதிகம். அதுவே, ஐஐ ஜீன்  அதிகமிருந்தால், அவருக்கு இதய நோய் பிரச்சனைகள் குறைவாகவே இருக்கும். 
                                 எனவேதான், ஒருவரின் இரத்தத்தில் இருக்கும் டி. என். ஏ. வை தனியே பிரித்தெடுத்து, பி.சி.ஆர். தெர்மல் சைக்ளர் மூலம், அதிலுள்ள ஜீனோ டைப்பை கண்டு பிடித்து, அதன் மூலம், அவருக்கு என்ன மாதிரியான நோய் தாக்குதல் ஏற்படலாம் என்றும், அதற்கேற்ற உணவு முறைகள் குறித்தும் அறிவுரை வழங்க இயலும்."
                                  அவ்வாறு நோய் நாடி, நோய் முதல் நாடி, மருத்துவ சிகிச்சையின் கால விரயம், பண விரயம்  மற்றும்  அதன் மூலம் கிடைக்கும் அவஸ்தைகளை  தவிர்த்திடலாம்.                 

டிஸ்கி-1: "நோய் நாடி, நோய் முதல் நாடி"- என்று தலைப்பு வைச்சதா ஞாபகம்.

டிஸ்கி-2: அதுக்கும்; "தேர்தல்-2011 - மாற்றங்கள் ஏற்றம் தருமா? "- ஒரு அலசல் என்பதற்கும்  என்னய்யா சம்பந்தம்?

டிஸ்கி-3: எல்லாம் தேர்தல் படுத்தும் பாடு. ஆபிஸ்ல தேர்தல்-2011ன்னு, கடிதங்களில் படித்துப் படித்து,  இப்படியா?