பாக்கெட் குளிர்பானங்கள் பருகலாம் வாங்க!

                               கோடைக்காலம் துவங்கிவிட்டது. குஷியாக, குளிர்பான பாக்கட்கள் விற்பனையும் கொடி கட்டிப் பறக்குது. குளிர்பானங்கள் முறையாகத்தான் தயாரிக்கப்படுகின்றதா? விதிகளெல்லாம் காற்றில் பறக்குதா? விசாரணையில் இறங்கினோம். விபரீதங்கள் உணர்ந்தோம். விளைவு: திடீர் ஆய்வு.

 

 

காலை ஆறு மணிக்கே தொடங்கினோம், களப்பணியை. பாக்கட் குளிர்பான தயாரிப்பாளர் ஒருவர் மாநகரின் பல பகுதிகளில் பாக்கட்களை விநியோகிப்பது விசாரணையில்   தெரிய வந்தது. பாக்கட்டில் இருந்த விலாசத்தில் தொடங்கினோம் விசாரணையை. வீண்தான் அந்த முயற்சியென எண்ணும் விதத்தில் இருந்தது. பாக்கட்டில் கண்ட விலாசத்தில் தயாரிப்பும் இல்லை. விற்பனையும் இல்லை. சட்டென எடுத்த முடிவொன்றால், என்னிடம் பணியாற்றும் துப்புரவுப்பணி மேற்பாவையாளார் ஒருவரை கல்யாண வீட்டுக்காரர் ஆக்கினோம். 

பாக்கட்டில் கண்ட அலைபேசி எண்ணில் தொடர்பு கொண்டு, முன்னீர்பள்ளத்தில் வெள்ளியன்று நடைபெற உள்ள விசேஷத்திற்கு ஆயிரம் குளிர்பான பாக்கட்கள் வேண்டும், உங்கள் விலாசம் சொன்னால், வந்து எடுத்து செல்கிறேன் என்று லேசாய் வலை விரித்தார். விழுந்தது அந்த பறவை. ஆம், விலாசம் சொல்லி வந்து வாங்கிக்கொள்ளச் சொன்னார். மொத்தக் கொள்முதல் என்றால், தள்ளுபடியும் தருகிறேன் என்றார், மொத்தத்தையும் நாங்கள் குத்தகைக்கு எடுக்கப்போகிறோம் என்று அறியாமலே!

        என் சகாக்கள் சாகுல்ஹமீது(சாதிக்கத் துடிக்கும் இளவல்), சுப்பிரமணியன்(சொல்வது குறைவு, செய்வது நிறைய) மற்றும் பயிற்சி உணவு ஆய்வாளர்கள் ராமசுப்பிரமணியன், நாகசுப்பிரமணியன், பால்ராஜ், நீதிமோகன், செந்தில், பரமசிவம் மற்றும் சித்ரா அடங்கிய குழு திடீர் ஆய்வுக்கு தயாராகினர். செய்தியாளர்களுக்கு சென்றது செய்தி. விரைந்து வந்த பத்திரிக்கைத் துறை நண்பர்களுடன் புறப்பட்டது படை. அலைபேசியில் குறிப்பிட்ட இடம் சென்றதும் தெரிந்தது, அது ஒரு வீடென்று. வீட்டின் ஒரு பகுதியில் கலர் கலர் குளிர்பான பாக்கட்கள் கடைகளுக்குப் பயணப்பட காத்திருந்தது. வீட்டினுள் பெண்கள் இருந்ததால், சித்ராவை முதலில் அனுப்பினோம். சிக்னல் கிடைத்ததும், சீறிப்பாய்ந்த படை அள்ளியே எடுத்து வந்தது அத்தனையும். ஒரு பாக்கட்டிலும், தயாரிப்பு தேதி இல்லை, விதிகளின்படி விரிவாய் இருக்க வேண்டிய விபரங்கள் இல்லை. விலையை மட்டும் விபரமாய் அச்சிட்டிருந்தனர். பொது மக்கள் முன்னிலையில் போட்டு, அவற்றில் கிருமிநாசினி தெளித்து அளித்தோம்.

Ø   தயாரிப்புத் தேதி இல்லையென்றால், அந்த உணவுப்பொருளை உபயோகிக்கும் கால அளவு தெரியாது.

Ø   பேட்ஜ் எண் இல்லையென்றால், தரத்தில் புகார் வந்தால், குறிப்பிட்ட தயாரிப்பை கடைகளிலிருந்து திரும்பப்பெற இயலாது.

Ø   குளிர்பானம் தயாரிக்க பயன்படுத்திய மூலப்பொருட்கள் பட்டியல் பாக்கட்டில் இல்லையென்றால், அவற்றின் தரம் தெரியாது.

Ø   தரங்கெட்ட தண்ணீரில் தயாரிக்கப்பட்டிருந்தால், குடிப்பவருக்கு வாந்தி பேதி வராமலிருக்காது.        

எனவேதான், இத்தகைய திடீர் ஆய்வுகள் தரத்திற்கு கட்டுப்பாடும், பொது மக்கள் மத்தியில் விழிப்புணர்வையும் ஏற்படுத்தும் என்பதில் ஐயமில்லை. வரும் நாட்களில், கோடையில் கொடி கட்டிப் பறக்கும் வேறொரு உணவுப் பொருள் ஆய்வுக்கு விரிவாக களம் அமைத்துள்ளோம். மீண்டும் சந்திப்போம்.