பால் -குடிப்பதற்கு அல்ல!

                                                            

                                பாலில் கலப்படம்-பலவிதங்களில் உடல் நலம் பாதித்திடும். பாலில் பசும்பால், எருமைப்பால், ஆவின் பால் என அன்றாடம் கேள்விப்படும் பால் ஒருவகை. ஆனால், மனிதன் கண்டுபிடித்த இன்னொரு பால் தான் தண்ணிப்பால்.                  

                                     பாலில் தண்ணீர் சேர்ப்பது ஒரு வகை கலப்படம். தண்ணீரில் பாலை சேர்ப்பது கலைப்படம். நல்லா தண்ணி காட்ட தெரிந்த நம்மூர் வியாபாரிகளுக்கு இது கை வந்த கலை.

                                    வாரத்தின் முதல் வேலை நாள். வந்து சேர்ந்தன வகை வகையாய் புகார்கள் - தண்ணீரில் பால் சேர்த்து விற்பதாக. சென்றோம், சோதனை இட்டோம்.

                                  பால் விற்பனைக்கு கொண்டு வந்த அனைவரயும் நிறுத்தி சோதனையிட்டோம். அதை பார்ப்பதற்கு அந்த அதிகாலை பொழுதிலும் அலை மோதியது கூட்டம்.

                                    பால் விற்பனைக்கு அல்ல, என்றைக்கும்  பால் கொண்டு வரும் நண்பருக்கு உடல் நலமில்லை, அதனால் இன்று மட்டும் நான் வந்தேன், பாலை ஒரு திருமண/ விருந்து நிகழ்ச்சிக்கு கொண்டு செல்கிறேன் - இப்படி  பலர் ஏமாற்ற  எடுத்து விட்ட கதைகள் ஏராளம்.

அதிரடி ஆய்வு அனைத்து பகுதிகளிலும் தொடர்ந்தது. விளைவு: வீணாய் போன சில வீணர்கள் கொண்டு வந்த கலப்பட பால் சென்று விட்டது பகுப்பாய்விற்கு.

பாலை சோதனை செய்வது ஏன்?:

•  கறந்த பால், நான்கு மணி நேரம் மட்டுமே, சாதாரண தட்ப வெட்ப நிலையில் கெட்டு போகாமலிருக்கும்.
• கிராமங்களில் கறக்கப்படும் பாலை, நகர்ப்புறங்களுக்கு கொண்டு வர ஏற்படும் காலதாமதத்தை ஈடுகட்ட, பாலில் யூரியா உள்ளிட்ட பல கெமிக்கல்கள் சேர்த்து பசு தந்த பாலெனும் அமுதத்தை பாழ் படுத்திவிடுகின்றனர். 
• பால்ல தண்ணீர் சேர்த்தா, பல நாட்கள் பொறுத்திருக்காமல், பணக்காரன் ஆகலாம் உடனே! ஆனால், பாலும் கெட்டியா இருக்கனுமே! இதற்கு கண்டு பிடித்த குறுக்கு வழிதான் ஜவ்வரிசி மாவு. இதை தண்ணீர் பாலில் சேர்த்து விட்டால், பால் கெட்டியாகத்  தெரிய கேரண்டி. பருகும் நமக்குதான், சிறுநீரகம் செயலிழக்கும் அபாயம். 
• அடுத்தமுறை,  டீக்கடைகளுக்கு செல்லும்போது, பாலை காய்ச்சி கொண்டிருக்கும் பாத்திரத்தை பாருங்கள். ஜவ்வரிசி மாவை பொட்டலமாய் கட்டி உள்ளே போட்டிருப்பர். எச்சரித்து எடுத்துவிட சொல்லுங்கள்.
• பாலை வேகமாய் கறக்க வேண்டும்,  பருகுவதற்கு கூட  பாலின்றி கன்று கதறிட வேண்டும்- இதற்கு இந்த மனிதன் கண்டு பிடித்த உபாயம்தான் ஆக்சிடோசின்  எனும் அருமருந்து.பேறுகால பொழுதில்,  நஞ்சுகொடி வெளியேற, பதிவு பெற்ற மருத்துவர்கள் பயன்படுத்தும் இம்மருந்தை, பால் கொடுக்கும் பசுவிற்கு போட்டு, பசுவின் ஆயுளை பாவிகள் பாதியாகக் குறைத்திடுவர்.  
• பருகும் நமக்கென்ன பாதிப்பு?
      பள்ளி செல்லும் குழந்தைகள், துள்ளி விளையாடும் வயதில் பருவம் எய்துவதும்(PUBERTY), கர்ப்பிணி பெண்களின் கர்ப்பம் கலையவும் காரணம் பாலில் கலந்து விட்ட  ஆக்சிடோசினின் அபாயம்.
  மேலதிக தகவல்களுக்கு: பாலையும் பாழ் படுத்தும் பாவிகள்.