இதுக்கெல்லாம் இலவசமா இதை யார் கேட்டாக?

இலவசம், இலவசம், இலவசம்.  இப்படி கொடுத்து கொடுத்து, எதற்கெடுத்தாலும் இலவசம் கேட்டும் ,கொடுத்தும்  பழகிட்டோம்.  

அப்படிக் கொடுக்கப்பட்ட ஒரு இலவசம்தான், நெல்லையில் பிரச்சினையாயிருச்சு! அப்படி என்ன பிரச்சனைன்னு கேட்கிறீங்களா? சொல்றேன், கேளுங்க, கேளுங்க, கேட்டுகிட்டே இருங்க!

கடந்த வாரத்தில் ஒரு நாள்,காலை பொழுது. மாநகராட்சி சுகாதார ஆய்வாளர்களும், பயிற்சிக்கு வந்திருந்த உணவு ஆய்வாளர்களும் இணைந்து, மீன் கடைகளில் சுகாதாரம் சரியாக இருக்கிறதா என்று ஆய்வு செய்ய புறப்பட்டோம். சமாதானபுரம் பகுதியில், சாக்கடை மேலொரு கடை சற்றும்  சுகாதாரமின்றி செயல்படுவதாக  புகார்களை பெற்று வந்தோம்!

முதலில் சென்று பார்த்த கடையினில், மண் தரையினில் மீன்கள். மனம் வீசும் கழிவு நீரோடையும் அருகில். எப்படி மனம் வந்ததோ, தேடிப்பிடித்து மீன் வாங்க அங்கும் ஒரு கூட்டம். அப்படியே அள்ளி எடுத்து, அருகே குவித்து வைத்து, கிருமி நாசம் செய்து, அழித்தோம்.

தினசரி மார்கெட் சென்றோம். வைத்திருந்த  கருவாட்டில், வகை வகையாய் புழுக்கள்.ஆமா, இதுக்கெல்லாம்    இலவசமா இதை  யார் கேட்டாக?#டவுட்டு. ஏனிப்படி  என்றால், எடுத்து விடுகிறோம் என்றார். எங்கு செல்லும் என்று எங்களுக்கு தெரியாதா? நாங்கள் சென்ற பின்னர், நன்றாய் கழுவி, புதிய கருவாடாய் பிறப்பெடுக்கும். அங்கும், அந்த கருவாட்டிற்கு, பினாயில் அபிஷேகம்தான். 

மீன்கள் மீது ஏனிந்த கோபம்? 

                                     தண்ணீரில் வாழும் மீன்களை கொண்டு வந்து தரையினில் போட்டு விற்கும்போது,  மீன்களில் உள்ள பாக்டீரியாக்கள் பல்கிப்  பெருகும். மீனில் உள்ள பாக்டீரியாக்கள் அதன் புரதத்தை சிதைத்து, ஹிஸ்டமின்களை(HISTAMINES) உருவாக்கும். இரத்தத்தில் ஹிஸ்டமின் அளவு அதிகரிப்பதால், உடலில் அரிப்பு,வயிற்றோட்டம், வாந்தி, வாயிற்று வலி வர வழி வகுக்கும்.

என்னதான் எங்கள் பார்வை எல்லாப்  பொருள்களிலும் விழுந்தாலும், உங்கள் உடல் நலம் உங்கள் கைகளில் உள்ளது. எந்த பொருளானாலும், எப்படி இருக்கிறதென்பதை எல்லா நிலையிலும் பார்த்து வாங்குங்க. எந்தப்  புகார் என்றாலும், எடுத்து சொல்ல தயங்க வேண்டாம். உரிய இடங்களில், உரிய விதத்தில் தெரிவிப்பது மட்டுமே, இந்த சமுதாயத்திற்கு நாம் செய்யும் சிறந்த தொண்டாகும், மறவாதீர்!

டிஸ்கி-1:  இதற்கு முந்திய பதிவிடும் போது, பின்னூட்டம் போட்ட சி.பி. சார், நான், அதிகாலையில்  பதிவிடுவதாக புகார்(!) செய்ததால், இன்று அவர் விழித்தபின் இந்த பதிவு.

டிஸ்கி-2 :  அவரவர் பங்கிற்கு சி.பி.சாரை போட்டு வாங்கிட்டாங்க, இன்னும் உங்க பங்கை செய்யவில்லையே என்று என் மெயிலில் எச்சரிக்கை :)) விடுத்த அருவா சாரி அன்பு மனோவிற்கு நன்றி.