வாட்டர் கேன்களும் வாட்டும் நோய்களும்-அதிர்ச்சி தகவல்கள்.

                                  கத்திரி வெயில் உச்சியை பொளக்குது. கண்ட கண்ட தண்ணீர்  எல்லாம் குடிச்சி, தொண்டை கரகரங்குது.  காரணம்தான் தெரியாம, காச அள்ளி வீசறோம். காசுக்கேத்த தரம் தண்ணீரில் இருக்கா, தேடுறோம்! காசு கொடுத்து வாங்கி பருகும் தண்ணீரினால் பரவும் நோய்கள்- அதிர்ச்சி தகவல்கள்.

 வாட்டர் கேன்களில் வீடுகளுக்கு விநியோகம் செய்யப்படும் தண்ணீர் தரமானதுதானா? வீடுகளில் விநியோகிக்கப்படும் வாட்டர் கேன்களில், அறுபது சதவிகிதம் தரமற்றவையே! சொல்லியிருப்பது சுகாதாரத்துறை முன்னாள் இயக்குனர் டாக்டர். இளங்கோ. வெயிலில் வெளியே செல்கிறோம், தாகம் எடுத்தால், கிடைக்கும் தண்ணீர் என்றாலும் சரி, அது தரங்கெட்ட குளிர்பானங்கள் என்றாலும் சரி, வாங்கி அருந்துவது நம் வாடிக்கை ஆகி விட்டது.

 சாலை ஓரங்களில் கம்பங்கூழ் என்றும், கரும்புச் சாறென்றும், கண்ட கண்ட தண்ணீரில் தயாராகும் பானங்களை வாங்கி அருந்துகிறோம். விலை கொடுத்து, வீட்டிற்கு வாங்கும் வாட்டர் கேன்களுக்கும் இதே விதிதானா?

பாக்கெட்டு மற்றும் பாட்டில்களில் அடைத்து விற்பனை செய்யப்படும் தண்ணீருக்கு ஐ.எஸ்.ஐ. தரச் சான்று பெறுவது தவிர்க்க முடியாதது. அப்படி தரச் சான்று பெற்றிருப்பதாக போலி முத்திரை பதித்து  விற்பவர்கள் ஒருபுறம். தரச் சான்று பெற்ற பின்னர், தரத்திற்கேற்ப தயாரிக்காதவர்கள் மறுபுறம். தண்ணீர் பிடிக்கப்படும் கேன்கள் 'உணவு தரத்தில்'(FOOD GRADE) இருக்க வேண்டும். மொத்தத்தில் பாதிக்கப்படுவதோ காசை கொடுத்து, உடல் நலத்தை காவு கொடுக்கும் உபயோகிப்பாளர்கள்தான்.   

 தொடர்ந்து ஒரு கம்பனி தயாரிக்கும் தண்ணீரை மட்டும் வாங்கி பயன்படுத்தும்போது, நம் உடல் அந்த தண்ணீரின் தரத்திற்கு தன்னை தயார்படுத்தி கொள்கிறது. தண்ணீர் மாறும்போதுதான், தொற்றுநோய் பிரச்சனையே தெரிய வருகுது. வாகனங்களில் வாட்டர் கேன்களை கொண்டு செல்லும்போதும், கோடை  வெயில் கேன்கள் மீது கொடுமையாகப்படும் வண்ணம் கொண்டு செல்கிறார்கள்.அது மிக ஆபத்தானது.

 தொண்டை கர கரப்பில் தொடங்கும் தொற்று, காய்ச்சல் வரை வந்து நிமோனியா தொடராக மாறி, நுரையீரல் வரை பாதிக்கிறது.  நுரையீரல் தொற்று காரணாமாக  ஏற்படும் நிமோனியா, எந்த மருந்திற்கும் கட்டுபடாத கிருமியாக உருவாகி, உயிருக்கே ஆபத்து ஏற்படுத்தலாம் என்று உலக சுகாதார நிறுவனம் கூட எச்சரிக்கை விடுத்துள்ளது. 

அதிர்ச்சியின் உச்சம்:கடந்த சில மாதங்களாக, இந்தியாவில், குழந்தைகள் முதல் பெரியவர்கள் வரை, இறந்தவர்களில் சுவாச மண்டல தொற்று காரணமாக இறந்திருப்பதாகவும் அவர் தெரிவித்துள்ளார். 

தொண்டை தொற்றிலிருந்து காத்துக்கொள்ள:

• குடிக்கும் நீரை நன்றாகக் கொதிக்க வச்சு குடிங்க- அது கார்ப்பரேசன்  தண்ணீர் என்றாலும் , காசு கொடுத்து வாங்கும் கேன் வாட்டர் என்றாலும்!
• வெயிலில் அலைபவராக இருந்தால், கையில் இருக்கட்டும், வீட்டில் இருந்து எடுத்து செல்லும்  ஒரு பாட்டில் தண்ணீர். 
• நாவறட்சியை குளிர்பானங்களை  விட, சூடான ஒரு கப் தேநீர் தணிக்கும்.  
• சாலை ஓரங்களில் விற்கப்படும், தரமற்ற குளிர்பானங்களையும், சுகாதாரமற்ற பழங்களையும் தவிர்ப்போம்.நோயின்றி நம்மை நாம் காப்போம்.  
  டிஸ்கி-1 :   சோதனைகள், வழக்குகள், தண்டனைகள் என்று ஒரு பக்கம் தொடர்ந்தாலும், சந்தை படுத்துவோருக்கு, வாங்கி பயன்படுத்துவோருக்கும் அதை சரியாய் கொடுத்திடவும், வாங்கிடவும், சரியில்லை எனில், பயன்படுத்த மறுக்கவும் தொடங்கி விட்டால், துன்பங்கள் குறைந்துவிடும்.