ஒரு பயணம், பக்தி , பாராட்டு.

  ஒரு பயணம்:கத்திரி வெயில் சுட்டெரிக்க தொடங்கிருச்சு ! நெல்லையில் வெயில் நூற்றி நாலை நெருங்கிகிருச்சு.  நண்பர்கள் குழாம் நாலு நாளு, குளு குளு கொடைக்கானல், ஊட்டி என்று  நல்லா சுத்திட்டு வரலாமென்ற நச்சரிப்பு.  நமக்கோ, நாளும் ஒரு ரெய்டு என்று துலங்குது  காலைப்  பொழுது. 

                                      நண்பர்கள் கோரிக்கை தள்ளவும் மனமில்லை. ஒரு நாளின் மாலைப்  பொழுது.  உருவானது ஒரு கூட்டணி.ஆம், நண்பர் ஜோசப், செய்யது. இரு வேறு துறைகளில் கொடி கட்டி பறக்கும் நண்பர்கள்.  ஊட்டி கொடைக்கானல் ஊரு ரொம்ப தூரமப்பா- இது நான். நாளை காலை நானிங்கு இருக்க வேண்டும் முடியுமா சொல்லுங்க?  இப்படி என் கண்டிஷன்கள் எடுத்து வைத்தாலும், விட்டுச்செல்ல மனமில்லை அவர்களுக்கு.

தங்கிய அறையின் முன்புற தோட்டம்.

                                    அகஸ்தியர் அருவிக்கு மேலே, ஆனந்தமாய் தங்கிட கெஸ்ட் ஹவுஸ் உண்டே, போகலாமா?  நண்பர் ஜோசப் பத்திரிக்கை  துறை நட்பை பயன்படுத்தி, பாரெஸ்ட் ஏரியா செல்ல பர்மிசன் வாங்கினார். தங்கும் வசதி என் நட்பின் உபயம். செல்லும் வழியில், என் சொந்த ஊர் அம்பாசமுத்திரம் சென்று என் அன்னையை தரிசித்துவிட்டு, தங்கும் அறையினை அடைந்த நேரம், மாலை ஆறு  மணி. என்ன ஒரு அற்புதமான இயற்கையின் திருவிளையாடல். 

                                       நெல்லையில் சுட்டெரிக்கும் வெயில். இங்கோ மாலை ஆறு மணிக்கே, குளு குளு  தென்றல் கும்மியடித்தது. அங்கிருந்த வியூ பாய்ன்ட்டில் அமர அழகாய் சிமெண்ட் பெஞ்சுகள்.

வியூ பாய்ண்ட். 

நண்பர்கள் பட்டாளம்.

பொதிகைமலைத் தென்றல் தந்த  மெல்லிய வருடல, அப்பப்பா, சொர்க்கம் இங்கே இங்கே என்றது. சரியாய் அடுத்த ஒரு மணி நேரத்தில், வந்து சேர்ந்தது அடுத்த நண்பர்கள் பட்டாளம். அரட்டை,அரட்டை என்று நேரம் சென்றது தெரியாமல்  அரட்டை. இரவு பத்து மணிக்குமேல், அகஸ்தியர் அருவியில் ஆனந்த குளியல்.

இரவில் அகஸ்தியர் அருவி.

அந்த அதிகாலை பொழுதில், அருவிக்கரையில், மிளாக்கள் மற்றும் காட்டு பன்றிகளின் நடமாட்டம். தோட்டாவால் சுட்டால், துரத்திடுவார் ஜெயிலுக்குள் என்பதால்,  காமிராவில் மட்டும் சுட்டு வந்தோம், அவற்றை.

காட்டு பன்றிகள்.
 
குழந்தைக்கு பேன் பார்க்கும் தாய். 

 விடிகாலை மூன்று மணிக்கு அறைக்கு திரும்பினால், அன்று   எங்களுக்கு

 பத்து மணிக்குத்தான் பொழுது புலர்ந்தது. மீண்டும் அருவியில் ஒரு ஆனந்த குளியல். 

பகலில் அகஸ்தியர் அருவி.

 இந்த  அருவிக்கு மேல்பகுதியில் கல்யாண தீர்த்தம் அருவி உள்ளது. 

                                           கல்யாண  தீர்த்த அருவியின்   நீரோட்டம்.

அதற்கும் மேலே உள்ள பாறைகளின் மேல் உள்ளது, இந்த மண்டபம். அங்கு பதித்துள்ள கல்லில், வ.வே.சு. அய்யர் ஞாபகார்த்த மண்டபம் எனவும், சுதந்திர போராட்டத்தின் நூற்றாண்டு நினைவாக அமைக்கப்பட்டு 08 .08 .1957   இல்   அப்போதைய முதலமைச்சர் திரு.காமராஜ் அவர்களால் திறந்து வைக்கப்பட்டது என பொறிக்கப்பட்டுள்ளது. மனிதர்கள் நடமாட்டம் குறைவு என்பதால், இன்னும் அந்த மண்டபம் அப்படியே இருக்கிறது.

மலைகளின் மேல் மணி மண்டபம்.

 
கல்யாண தீர்த்த அருவியின் மேற்புற பாறைகள்.

தொலைவில் குளம் போல பாபநாசம் தலையணை.

பாபநாசம் சிவன் கோயில்.

சிங்க வால் குரங்கு.

மரங்களில்மனிதமூதாதையர்கள். 

பக்தி:இதோ இங்கே நீங்கள் பார்ப்பது அகஸ்தியர் அருவிக்கரையில் உள்ள அகஸ்தியர் கோயில். 

அகஸ்தியர் கோயில்

சிவபெருமானுக்கு நடைபெற்ற திருமணத்தை காண பூமியின் வட பகுதியில்  ஆன்றோர் பெரியோர் என அனைவரும் கூடி நின்றதால், பூமி வடபகுதி தாழ்ந்து விட்டதாம். அப்போது இந்த அகஸ்திய மாமுனியை இறைவன் பொதிகை மலை சென்று பூமியின் பாரத்தை சமன்படுத்த பணித்தாராம். அப்போது இங்கு வந்த அகஸ்திய மாமுனியும், பொதிகை மலையில் அமர்ந்து தவம் செய்து சமன் செய்தாராம். அதுமுதல், இயற்கை எழில் சூழ்ந்த பொதிகை மலையில், சித்தர்கள் பலரும் சிறப்புடன் வாழ்வதாக செய்தியுமுண்டு. சமீபத்தில், நெல்லை, தூத்துக்குடி மாவட்டங்களுக்கு மழை வேண்டி, கடல் மட்டத்திலிருந்து 6200 அடி உயரத்திலுள்ள பொதிகை மலைக்கு,  பக்தர்கள் கேரளம் வழியாக யாத்திரையாக சென்று , அங்குள்ள அகஸ்தியர் சிலைக்கு அபிஷேகம் செய்து வந்துள்ளனர். 

பாராட்டு: தொடர் ஆய்வுகள், தொடர்ந்து வந்த மிரட்டல்கள், எல்லையில்லா தொல்லைகள் என்றிருந்த ஏப்ரல் மாதம், சென்று வந்த பயணத்தினால், மனம் லேசாகிப் போனது,மே மாதத்தில். 
அன்று மாலையில், திருநெல்வேலி நகர் சுழற்கழகத்தில், மாவட்ட ஆளுநர் வருகையின்போது, என்னை அழைத்துப் பாராட்டி   சான்றிதழ் அளித்தனர்,  .பகிர்ந்து கொள்கிறேன் உங்களிடம். போலியோ ஒழிப்பு உள்ளிட்ட பல புனிதப்  பணிகள் செய்து வரும் சுழற்கழகம், என்னை  அழைத்து வாழ்த்தியதும், என் மீது வைத்துள்ள நம்பிக்கைகளும்,  என் பொறுப்புக்களை மேலும் உணரச் செய்தது. 

திருநெல்வேலி டவுண் சுழற்கழக விருது. 

                                                       சுழற்கழக சான்றிதழ்.

டிஸ்கி-1 : இன்று ஒரு பல்சுவை பதிவு-ஒரு பயணம், பக்தி,பாராட்டு. 

டிஸ்கி-2 :பதிவுலகில் ஆக்கமும், ஊக்கமும் அளித்து வரும் உங்களுக்கும் இந்த பாராட்டில்  பங்குண்டு.