அடுத்த தோசைக்கும், அவித்த இட்லிக்கும் மனம் ஆலாய் பறக்கும்!

                                   மல்லிகை பூப்போல் இட்லியும், மணக்கும் சட்னியும் எத்தனை வீடுகளில் காலை உணவாய் கமகமக்கும்!  ஆட்டு உரலில்  அரைத்த அரிசி மாவும், அதனோடு சேர்க்கப்படும் உளுந்த  மாவும், அளவான உப்பு சேர்த்து, அம்மாவின் கைகளால் பிசைந்து அடுத்த நாள் இட்லி, தோசையாக மலரும்போது, அடுத்த தோசைக்கும், அவித்த இட்லிக்கும் மனம் ஆலாய் பறக்கும். 

                                 இப்படி இருந்த காலம் மலையேறி போய்விட்டது. இன்று, தமிழகமெங்கும் தடுக்கி விழுந்தால், தெரு வீதியெங்கும், இட்லி தோசை மாவை விற்கும் கடைகள். சுலபமாய் இருப்பதால், இவற்றை வாங்கி சுகம் கண்டு விட்டோம்.

                                  கடந்த மாதம், சென்னையை சார்ந்த தன்னார்வ  தொண்டு நிறுவனம் ஒன்று (CONCERT- Centre for consumer education, research, teaching, training and testing), வேலை மெனக்கெட்டு, வீதிகளில் விற்கப்படும் இட்லி தோசை மாவு பாக்கெட்களை  எடுத்து அவற்றில் எத்தனை பாக்கெட்கள் தரமானவை என்று ஆராய்ந்தது.

                                  ஆய்வு முடிவுகள் பற்றி அறிந்து கொள்ள,  CONCERTஇன் இயக்குனராக பணிபுரியும் என் ஆசான்(ஆம், பாளையங்கோட்டை, உணவு பகுப்பாய்வு கூடத்தில், பொது பகுப்பாளராக பணியாற்றியபோது, எனக்கு உணவு ஆய்வாளர் பயிற்சி அளித்தவர்) திரு. சந்தானராஜன் அவர்களை தொடர்பு கொண்டபோது, அவர் சொன்ன தகவல்கள் அதிர்ச்சி அளிப்பதாக இருந்தது.    

             சென்னை மாநகரில், பதினாறு வெவ்வேறு இடங்களிலுள்ள பெரிய வணிக வளாகங்கள் மற்றும் சிறு கடைகளில் விற்பனைக்கு வைக்கப்பட்டிருந்த இருபது பாக்கட்கள் ஈர இட்லி தோசை மாவை எடுத்து, அதில் பாக்டீரியாக்கள் இருக்கின்றதா என  தமிழ்நாடு  குடிநீர்  வடிகால் வாரியம் சந்தைப்படுத்தும் ஹைட்ரஜன் சல்பைட் பாக்டீரியாவைக் கண்டறியும் டெஸ்ட் கிட்களால் சோதனை செய்தனர்.
            அதன் முடிவுகள் அதிர்ச்சி அளிப்பதாயிருந்தது. பதினொரு பாக்கட்களிலிருந்த இட்லி தோசை மாவில், ஹைட்ரஜன் சல்பைட் உருவாக்கும் பாக்டீரியாக்கள் இருந்தது தெரிய வந்தது. மனித மலத்தில் இருக்கும் பாக்டீரியாக்கள்,கோலிபார்ம்(COLIFORM) பாக்டீரியாக்கள் ஹைட்ரஜன் சல்பைட் உருவாக்கும் தன்மையுடையவை. தனி மனிதனின் சுத்தமின்மையும்(PERSONAL HYGIENE),மாவு அரைக்கும்போது சேர்க்ப்படும் அசுத்தமான தண்ணீருமே அதன் காரணங்களாகும். இது பற்றிய முழு விபரங்களை காண:  http://timesofindia.indiatimes.com/topic/search?q=idli-dosa%20batter .
            பத்திரிக்கை செய்தி கண்டவுடன் சென்னை, பொது சுகாதாரத்துறை இயக்குனர், மாநிலம் முழுவதும் விற்பனை செய்யப்படும் இட்லி தோசை மாவினை ஆய்வு செய்ய அறிவுறுத்தினார். அதனடிப்படையில், கடந்த இரு தினங்களாக மாநிலம் முழுவதும் அதிரடி ஆய்வுகள்.
            நெல்லையிலும் அதிரடி ஆய்வுகள் நடந்தன. அனுமதியற்ற அரிசி மாவு அரவை ஆலை இழுத்து மூடப்பட்டது. சுகாதாரமற்ற நூற்றி அறுபத்தி  நான்கு கிலோ இட்லி மாவு கிருமி நாசினி தெளித்து அழிக்கப்பட்டது. அத்தனை செய்தி தாள்களிலும் அது பற்றிய செய்தி வந்தது.                   

                செய்திகள் முக்கியமல்ல. செய்தி கண்டு சுதாரிக்கும் மக்களின் மனப்பக்குவமே முக்கியம். 

                   பார்த்து பார்த்து வாங்குங்க! அதைவிட வீட்டிலேயே 

                      பக்குவமா தயாரிங்க. 

                         காசு கொடுத்து கஷ்டங்களை வாங்காதீங்க!